اعاش كوشەتى ەگىلدى

بۇل اكتسيانىڭ وتۋىنە قالالىق جايلى ورتانى دامىتۋ باسقارماسى ۇيىتقى بولدى. شىمسيتي مەن تۇران شاعىن اۋداندارىندا ۇيىمداستىرىلعان سەنبىلىككە 650-دەن استام قىزمەتكەر مەن ەرىكتى قاتىستى. ولاردىڭ ىشىندە جۇمىسپەن قامتۋ جانە الەۋمەتتىك قورعاۋ باسقارماسىنا قاراستى مەكەمەلەردەن 146 قىزمەتكەر 2 مىڭ دانا تال-داراق ەكتى. سونىمەن بىرگە تۇرعىن ءۇي باسقارماسى مەن وعان باعىنىستى مەكەمەلەردىڭ 60 قىزمەتكەرى دە مىڭنان استام شىبىق شانشىدى. ال اۋدان اكىمدىكتەرىنەن سەنبىلىككە 100 قىزمەتكەر شىعىپ، 2 مىڭعا جۋىق اعاش كوشەتتەرىن وتىرعىزدى.

قىسقاسى، سەنبى كۇنى ۇيىمداستىرىلعان «جاسىل قالا» اكتسياسىنا جوعارىدا اتالعان مەكەمەلەردەن بولەك قالالىق سپورت، ساۋلەت قالا قۇرىلىسى جانە جەر قاتىناستارى، ءدىن ىستەرى، جولاۋشىلار كولىگى جانە اۆتوموبيل جولدارى، مادە­نيەت، تىلدەردى دامىتۋ جانە ارحيۆتەر، سونداي-اق جايلى ورتانى دامىتۋ باسقارمالارىنىڭ قىزمەتكەرلەرى بەلسەنە اتسالىستى. جالپى، سەنبىلىكتە 600-گە جۋىق قىزمەتكەر كوشەت ەگۋ ءىس-شاراسىنا قاتىسىپ، 6 ارنايى تەحنيكانىڭ قىزمەتى پايدالانىلدى.

ال جەكسەنبى كۇنى شىمكەنت قالالىق جايلى ورتانى دامىتۋ باسقارماسى تاعى ءبىر ەكولوگيالىق ءىس-شارانى قولعا الدى. بۇل جولى اتالعان مەملەكەتتىك ورگانعا قاراستى «دەندروساياباق»، «جا­سىل بەلدەۋ» قىزمەتكەرلەرى جانە «جاسىل جەر» مەردىگەر مەكەمەسىنىڭ جۇمىس­شىلارى بى­رىگىپ، قالا ىشىندە سەنبىلىك وتكىزدى. سو­نىڭ اياسىندا شاھارداعى شىم­سيتي شاعىن اۋدا­نىندا جابايى الما، ەمەن، ۇيەڭكى جانە جابايى ورىك سىندى جال­پى سانى 5 مىڭعا جۋىق تال كوشەتى وتىر­عىزىلدى. مۇنىمەن قوسا، كوگال­داندىرۋ اكتسياسىنا 4 تەحنيكا، اتاپ ايت­قاندا، 2 سۋ تاسىمالداۋشى كولىك پەن 2 كوشەت تاسىمالداۋشى تراكتور جۇمىلدى­رىلدى.

ءوتىپ بارا جاتقان كۇز ايىنىڭ سوڭ­عى سەنبىسىندە مەگاپوليستىڭ باس­قا دا اۋماقتارىن سەنبىلىك اكتسيا­لارى ۇيىم­داستىرىلدى. ماسەلەن، شاھار ىرگە­سىندەگى «وڭتۇستىك» ارنايى ەكونو­مي­كا­لىق ايماعىنا باراتىن جولدىڭ بو­يىنا ەڭبەكشى اۋدانى اكىمى اپپاراتىنىڭ قىزمەتكەرلەرى، «مۇراگەر» رەسپۋبليكالىق قوعامدىق بىرلەستىگىنىڭ «بەيبىتشىلىك شار­تى اسكەري كۇشتەرى» ارداگەرلەرى جانە «وڭ­تۇستىك» اەا جۇ­مىس­شىلارى ۇيىم­دا­سىپ، 1 800-گە جۋىق ءارتۇرلى اعاش كوشەتىن ەكتى.

كۇزدىڭ قارا سۋىعىندا كوشەت قون­دىرعان قالاي بولادى، تال-داراق ءۇسىپ كەتپەي مە دەگەن ساۋالعا قالالىق جايلى ورتانى دامىتۋ باسقارماسى باسشىسىنىڭ ورىنباسارى ماقسات ابدىقادىروۆ كە­رىسىنشە، شىبىقتار كوكتەمدە ەگىلسە تامىر الىپ كەتۋى قيىنعا سوعادى دەگەن جاۋابىن الدىق.

– قازىر تالدار قىسقى ۇيقىعا كەتتى. وسى كەزدى پايدالانىپ ەگىپ العان ءجون. ودان بۇرىن وتىرعىزىلعان كوشەتتەر سولىپ قالۋى مۇمكىن. سوندىقتان ءبىز ادەيى اعاشتاردىڭ جاپىراقتارى سارعايىپ ءتۇسىپ، ۇيىقتاعان مەزگىلىن كۇتتىك. بۇرىن شاھاردا تەك بىرىڭعاي قاراعاش ەگىلەتىن. بۇل شىنى كەرەك، قالاعا ونشا كورىك بەرمەيدى. ونىڭ ۇستىنە ساياسى دا از. سول ءۇشىن ارنايى تۇقىمباقتا ءوسىرىلىپ، ءوزىمىزدىڭ كليماتقا ابدەن جەرسىندىرىلگەن ەمەن مەن ۇيەڭكى تالدارىنىڭ كوشەتتەرىن ەگىپ جاتىرمىز. بۇلار ءارى قالا كوركىنە ءسان بەرەدى، ءارى جاپىراقتارى ۇلكەن بولعان سوڭ تۇبىندە سايالاۋعا دا جاقسى. سونىمەن بىرگە بۇگىنگى تاڭدا اعاش كوشەتتەرىن ساتىپ الۋ بويىنشا قوسىمشا قاراجات قاراستىرۋ ماسەلەسى دە جەرگىلىكتى اكىمدىك تاراپىنان قارالۋ ۇستىندە، – دەدى مامان.

شىمكەنت