قازاقستان • 29 قاراشا، 2022

Superpave تەحنولوگياسى ەنگىزىلەدى

ەلىمىزدە اۆتوموبيل جولدارىنىڭ ەكسپلۋاتاتسيالىق سيپاتتامالارىن ارتتىرۋ ماقساتىندا Superpave تەحنولوگياسى پايدالانىلاتىن بولادى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ءمالىم بولدى.

دۋمان اناش

كوللاجدى جاساعان زاۋرەش سماعۇل «EQ»

اتالعان تەحنولوگيا تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ اۆتوموبيل جولدارى كوميتەتىنىڭ توراعاسى تولەگەن ابدۋللين ايتىپ بەردى. ول جوبالاۋ كەزىندە ءار ايماقتىڭ كليماتتىق جاعدايى مەن تەمپەراتۋراسى ءارى قوزعالىس قارقىندىلىعى ەسكەرىلەتىنىن جەتكىزدى. جاڭا تەحنولوگيا ءوز كەزەگىندە ەكسپلۋاتاتسيالىق سيپاتتامالاردى ارتتىرۋعا مۇمكىندىك بەرمەك.

«قازىر بىزدە تەك 3 كليماتتىق ايماق، بيتۋمنىڭ 2 ماركاسى ەسكەرىلەدى. ال Superpave تەحنولوگياسىندا 10-15 كليماتتىق ايماق قاراستىرىلاتىن بولادى. ءاربىر ءوڭىر ءۇشىن اسفالتبەتون قوسپالارى، بيتۋم، قيىرشىق تاستىڭ جەكەلەگەن قۇرامى قۇرىلادى»، دەدى ت.ابدۋللين.

بۇل جاڭاشىلدىق مەملەكەت باسشىسىنىڭ اۆتوجول سالاسىن رەفورمالاۋ تاپسىرماسىن ورىنداۋ ماقساتىندا ەنگىزىلمەك. سونىمەن بىرگە كوميتەت وكىلى اۆتوجول جوبالارىن EPCM كەلىسىمشارتى قاعيداتىنا ىسكە اسىرۋ جانە كوشىرۋ تۋرالى ايتىپ بەردى. اتالعان كەلىسىمشارتتىڭ نەگىزگى ارتىقشىلىعى – ونىڭ قۇنى تەحنيكالىق-ەكونوميكالىق نەگىزدەمەگە جانە جوبا-سمەتالىق قۇجاتتاماعا بايلانباي، ىرىلەندىرىلگەن باعالار بويىنشا ايقىندالادى.

EPCM كەلىسىمشارتىنىڭ قاعيداتى بويىنشا ءبىر ورىنداۋشى جوبانىڭ تولىق ومىرلىك تسيكلىن جۇزەگە اسىرادى، ياعني جوبالاۋ ساتىسىنان باستاپ وسى ۋچاسكەنى ودان ءارى 10 جىل بويى كۇتىپ ۇستايدى. بۇل رەتتە ورىنداۋشى جوبانى ىسكە اسىرۋدىڭ بارلىق تاۋەكەلىن، ونىڭ ىشىندە قىمباتتاۋ بويىنشا مىندەتتەمەلەردى ءوز موينىنا الادى.

بۇدان بولەك اۆتوجول كەلىسىمشارتتارىنا FIDIC حالىقارالىق ەرەجەلەرىنىڭ تالاپتارىن ەنگىزۋ ماسەلەسى پىسىقتالۋدا.