ونەر • 29 قاراشا، 2022

قاسقىر

ۇلى سۋرەتشى مارك كيتلي امەريكانى ءسۇيدى، توپىراعىنا تابىندى، تابيعاتىنا سىيىندى. كوركەم ونەردىڭ كونستيتۋتسياسىن جازعان پاريج زاڭىنا باعىنبادى. ول تۋعان جەرىنە قاسقىرداي ادال بولدى. مۇنى ءتىپتى بوياۋمەن دە ادىپتەدى. العاشقى كارتيناسى – ماڭگىلىك ساعىنىشىنىڭ مەكەنى بولدى.

مۇحتار كۇمىسبەك

ادالدىق دەگەن ۇعىمدى ەستىگەندە يت پەن قاسقىردى مىسالعا الۋعا اسىعامىز. نەگە؟ سەبەبى يت يەسىنە، ءبورى تاڭىرىسىنە باس يەدى. تابيعاتتىڭ زاڭى سولاي. مۇنى سۋرەتشىنىڭ شىعارماسىنان اڭعارۋعا بولادى. ول بەس جاسىندا قولىنا قىلقالام ۇستادى. تاڭعالارلىعى سول، تۋعاننان سۋرەت سالىپ جۇرگەن جانداي ءاربىر بەينەنى اينىتپاي كوشىردى. ول ءبىر اڭىزعا بەرگىسىز اڭگىمە.

بالالارمەن اۋلادا ويناپ جۇرگەن كىشكەنتاي مارك ءۇيدىڭ قاسىنداعى فەرمانىڭ شاتىرىنا شىعۋعا بەكىنەدى. ونداعى ويى اتا-اناسىنىڭ نازارىن وزىنە اۋدارۋ ەدى. وسىلايشا، ول شاتىر ىشىندەگى ۇيشىكتەن ءارتۇرلى بوياۋ قۇرالدارىن تاۋىپ الادى. قىلقالامدى قولىنا العاندا ىزدەگەن زاتىن تاپقان جانداي الاسۇرادى. قابىرعانى شيماقتاعان بالاداي اق قاعازدىڭ بەتىن قان-جوسا ەتەدى.

جەتى جىلدان كەيىن، ياكي ون ەكى جاسىندا ءبىرىنشى تولىققاندى كارتيناسىن ومىرگە اكەلدى. بۇل شەبەردىڭ ءوزى ايتقانداي، پەيزاج بولاتىن. ايتسە دە العاشقى باستامالار پەيزاج ءۇشىن تىم جاسىل بولىپ كورىندى. تاعى ءۇش جىل شەبەرحانا ىشىندە ويىن ءپىسىردى. ءسويتىپ، 15 جاستاعى بولاشاق اتاقتى سۋرەتشى اكريل بوياۋلارىنىڭ جيىنتىعىن ۇسىندى. بۇل – «قاسقىر» كارتيناسى ەدى.

ول بەينەلەگەن پەيزاج جۋرنالدىڭ مۇقاباسىنان تابىلدى. بۇل وقيعا ونى شابىتتاندىرا ءتۇستى. ءتىپتى سول كۇننەن باستاپ، كۇنىنە 14 ساعات شەبەرحانادا تاپجىلماي سۋرەت سالدى. كەيىن سۋرەتكەر وڭتۇستىك افريكاداعى تۋىستارىمەن بىرگە تۇرۋعا ءماجبۇر بولادى. ايتسە دە جاڭا قونىس وعان سۇراپىل شابىت سىيلادى. كارتينالارى ساتىلدى، ناعىز كاسىبي سۋرەتشى مارتەبەسىنە يە بولدى. بىراق تۋعان جەرگە دەگەن ماحابباتى كوكەيىنە مۇڭ ۇيالاتا بەردى.

كەنەپتەگى قاسقىر – بۇل سۋرەتشىنىڭ ءوزى. ونى قورشاپ تۇرعان پەيزاج امەريكا! ايتكەنمەن، قىلقالام شەبەرى بۇل كورىنىستى ويدان قۇراعان. تەك بالا كۇنىندە اكەسى ايتقان اڭگىمە سەبەپ بولسا كەرەك. ول – قاسقىردىڭ جابايى تابيعاتتىڭ جارشىسى ەكەندىگى.