قوعام • 28 قاراشا، 2022

استانادا ميتينگ ۇيىمداستىرعان ادام 15 تاۋلىككە قامالدى

ەلوردادا زاڭسىز ميتينگ ۇيىمداستىرعان ادام 15 تاۋلىككە قامالدى. بۇل تۋرالى استانا قالاسىنىڭ اكىمشىلىك قۇقىق بۇزۋشىلىق جونىندەگى مامانداندىرىلعان اۋدانارالىق سوتى حابارلادى، دەپ جازادى Egemen.kz.

بوتاكوز باقبەرگەن

27 قاراشادا استانانىڭ اكىمشىلىك قۇقىق بۇزۋشىلىق جونىندەگى مامانداندىرىلعان اۋدانارالىق سوتى مارات ابيەۆكە قاتىستى ەكى ءىستى قارادى.

وعان قاتىستى اكىمشىلىك قۇقىق بۇزۋشىلىق تۋرالى ەكى حاتتاما جاسالدى:

بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭنامادا بەلگىلەنگەن ءتارتىپتى بۇزا وتىرىپ، رۇقسات ەتىلمەگەن ميتينگتى ۇيىمداستىرعانى جانە وتكىزگەنى ءۇشىن (اقبتك-ءنىڭ 488-بابىنىڭ 7-بولىگى);
پوليتسيا قىزمەتكەرلەرىنىڭ قىزمەتتىك مىندەتتەرىن اتقارۋىنا بايلانىستى ولاردىڭ زاڭدى تالاپتارىنا باعىنباعانى ءۇشىن (اقبتك 667-بابىنىڭ 1-بولىگى).

ءىس ماتەريالدارىنا قاراعاندا، 26 قاراشادا ابيەۆ جەرگىلىكتى اتقارۋشى ورگاننىڭ رۇقساتىن الماي، قورعالجىن تاس جولى بويىنشا ميتينگ ۇيىمداستىرىپ، پوليتسيا قىزمەتكەرلەرىنىڭ زاڭدى تالاپتارىنا باعىنباعان.

سوتتا ابيەۆ ەل باسشىلىعىنىڭ نازارىن اۋىل شارۋاشىلىعىن دامىتۋ جونىندەگى جوباعا اۋدارۋ ماقساتىندا بەيبىت ميتينگ ۇيىمداستىرۋعا شەشىم قابىلداعانىن ءتۇسىندىردى.

سوت حابارلاماسىندا اتاپ وتىلگەندەي، پروكۋرور سوتتان ابيەۆتى كىنالى دەپ تانىپ، ونى 15 تاۋلىككە قاماۋعا الۋدى سۇرادى.

«اقبتك-ءنىڭ 488-بابى 7-بولىگىنىڭ سانكتسياسىمەن 15 اەك مولشەرىندە ايىپپۇل نەمەسە 15 تاۋلىككە دەيىنگى مەرزىمگە اكىمشىلىك قاماققا الۋ تۇرىندەگى جاۋاپكەرشىلىك كوزدەلگەن. اقبتك-ءنىڭ 667-بابى 1-بولىگىنىڭ سانكتسياسىمەن 30 اەك نەمەسە 15 تاۋلىككە دەيىنگى مەرزىمگە ايىپپۇل سالىنادى»، دەپ اتاپ ءوتتى ەلوردالىق سوتتىڭ ءباسپاسوز قىزمەتى.

ناتيجەسىندە سوت ابيەۆتى جوعارىدا اتالعان قۇقىق بۇزۋشىلىقتاردى جاساعانى ءۇشىن كىنالى دەپ تانىپ، ەكى قۇقىق بۇزۋشىلىق بويىنشا 15 تاۋلىككە اكىمشىلىك قاماققا الۋ تۇرىندەگى جازانى قولداندى.

قاۋلىلار زاڭدى كۇشىنە ەنگەن جوق.