– قازاقستاننىڭ اۆياتسيالىق بيلىگى حالىقارالىق ستاندارتتاردىڭ جوعارى دەڭگەيىنە ساي بولۋىنا بايلانىستى جاقسى جۇمىس اتقاردى. قازىر ەۋروپالىق كوميسسيانىڭ ۇشۋ قاۋىپسىزدىگى كوميتەتىمەن ءوزارا تىعىز بايلانىس ورناتىلعان. دەسە دە الدا اۋقىمدى جۇمىس كۇتىپ تۇر. ويتكەنى مەملەكەت باسشىسى قاسىم-جومارت توقاەۆ ۇشۋ قاۋىپسىزدىگىن قامتاماسىز ەتۋ مەن حالىق ءۇشىن قولايلى جاعداي جاساۋ ماسەلەلەرىنە باسىمدىق بەرىپ كەلەدى. سونىمەن بىرگە ەلىمىزدىڭ پرەزيدەنتى ۇشۋ گەوگرافياسىن كەڭەيتۋ مەن رەيستەر سانىن ۇلعايتۋعا بايلانىستى جۇمىستى جالعاستىرۋدى تاپسىردى, – دەدى قازاقستاننىڭ اۆياتسيالىق اكىمشىلىگىنىڭ قىزمەتىمەن تانىسقان يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ.
ونىڭ ايتۋىنشا, ۇشۋ گەوگرافياسىن كەڭەيتۋ مەن رەيستەر سانىن ۇلعايتۋ بويىنشا جۇمىستار كۇن تارتىبىنەن تۇسپەۋى كەرەك.
قازاقستاننىڭ اۆياتسيالىق اكىمشىلىگىنىڭ باس ديرەكتورى كاتالين رادۋ جۇرگىزىلىپ جاتقان جۇمىستار مەن ۇشۋ قاۋىپسىزدىگىن قامتاماسىز ەتۋ جونىندەگى مىندەتتەردى ىسكە اسىرۋ تۋرالى جەتكىزدى. ونىڭ ايتۋىنشا, وسى جىلدىڭ باسىنان باستاپ قازاقستان مەن امەريكا قۇراما شتاتتارى اراسىنداعى تىكەلەي رەيستەردى ىسكە قوسۋ ءۇشىن FAA (IASA) الداعى حالىقارالىق ۇشۋ قاۋىپسىزدىگىن باعالاۋعا دايىندىق شەڭبەرىندە تەحنيكالىق الەۋەتتى ارتتىرۋ بويىنشا جۇمىستار جۇرگىزىلىپ كەلەدى.
ازاماتتىق اۆياتسيا كوميتەتىنىڭ توراعاسى تالعات لاستاەۆ ايتقانداي, تەكسەرۋ قورىتىندىسىنا سايكەس قازاقستان ۇشۋ قاۋىپسىزدىگىن قامتاماسىز ەتۋ دەڭگەيىن 84 پايىزعا دەيىن ارتتىردى. بۇل الەمدىك ورتاشا كورسەتكىشتەن 15 پايىزعا جوعارى.
وسى ورايدا اۆياتسيالىق اكىمشىلىك ازاماتتىق اۆياتسيانىڭ ۇشۋ قاۋىپسىزدىگىنىڭ تەحنيكالىق باقىلاۋى مەن قاداعالاۋ جۇمىستارىنا جاۋاپتى ەكەنىن ايتا كەتكەن ءجون. قازىر قازاقستاننىڭ مەملەكەتتىك تىزىلىمىندە 912 اۋە كەمەسى بار. 75 كەمە تۇراقتى جولاۋشىلار رەيستەرىن جۇزەگە اسىرادى. تۇتاستاي العاندا, ەلىمىزدە 25 اۋەجاي مەن 6 تىكۇشاق ايلاعى جۇمىس ىستەيدى.
مينيستر اتالعان سالانى دامىتۋ بويىنشا بىرقاتار مىندەتتى اتاپ, ازاماتتىق اۆياتسيا كوميتەتىنە اۆياتسيالىق اكىمشىلىكپەن بىرلەسىپ, ۇشۋ قاۋىپسىزدىگى ماسەلەسىن ەرەكشە باقىلاۋدا ۇستاۋدى تاپسىردى.
– راس, قازىر اۋە كولىگىندە جولاۋشىلار اعىنىنىڭ ارتۋى بايقالىپ كەلەدى. سوندىقتان اۋە كەمەسىنىڭ پاركىن ۇلعايتۋ جانە قازاقستاندىق اۋە كومپانيالاردىڭ تاسىمالداۋ سىيىمدىلىعىن ارتتىرۋ بويىنشا جۇمىستى جالعاستىرۋ ماڭىزدى, – دەدى ق.وسكەنباەۆ.
