قكفل بىلتىردان باستاپ OLIMPBET فۋتبولدان قازاقستان چەمپيوناتىنىڭ ۇزدىكتەرىن انىقتاۋدى قولعا العان بولاتىن. ولاردى چەمپيوناتقا قاتىساتىن كلۋبتاردىڭ باس باپكەرلەرى مەن كوماندا كاپيتاندارى ارنايى ساۋالداما ارقىلى تاڭدايدى. اتاپ ايتار بولساق, ەڭ ۇزدىك قاقپاشىعا بەرىلەتىن قۇرالبەك ورداباەۆ اتىنداعى سىيلىققا بيىل قاراعاندىنىڭ «شاحتەرى» مەن قازاقستان ۇلتتىق قۇراماسىنىڭ قاقپاشىسى يگور شاتسكي يە بولدى. بيىلعى ۇلتتار ليگاسى تۋرنيرىندە ۇزدىك ويىنىمەن كوزگە تۇسكەن شاتسكي قاتارىنان ەكىنشى جىل اتالعان سىيلىقتىڭ يەگەرى اتاندى. سونداي-اق ول ەل بىرىنشىلىگىندە 21 ماتچ وتكىزىپ, ونىڭ بەسەۋىندە قاقپاسىنا گول جىبەرگەن جوق. كەيىنگى ورىنعا «اقتوبە» قاقپاشىسى ستاس پوكاتيلوۆ يە بولسا, ۇزدىك ۇشتىكتى «قايرات» كومانداسىنىڭ وكىلى دانيل ۋستيمەنكو قورىتىندىلادى.
سەيىلدا بايشاقوۆ اتىنداعى ەڭ ۇزدىك قورعاۋشى اتالىمىندا «استانا» مەن قازاقستان ۇلتتىق قۇراماسىنىڭ فۋتبولشىسى تيمۋر دوسماعامبەتوۆ ۇزدىك دەپ تانىلدى. 33 جاستاعى قورعاۋشى بيىلعى ماۋسىمدى «شاحتەر» كلۋبىندا باستاپ, جازدا «استانا» قۇرامىن تولىقتىرعان بولاتىن. دوسماعامبەتوۆ چەمپيوناتتا 23 ويىنعا قاتىسىپ, 9 مارتە مەرگەندىگىمەن كوزگە ءتۇستى. سونىمەن قاتار ول 2022 جىلى قازاقستان قۇراماسى ساپىندا 8 ماتچ وتكىزىپ, ءبىر ناتيجەلى پاسپەن كوزگە تۇسكەن-ءدى. كەيىنگى ورىنداردى چەمپيوناتتىڭ 25 ماتچىندا 7 گول سوققان الىبەك قاسىم جانە «توبىل» مەن قازاقستان قۇراماسىنىڭ قورعاۋشىسى الەكساندر ماروچكين تۇيىندەدى. ماروچكيننىڭ «توبىل» ساپىندا – 28, قازاقستان ۇلتتىق قۇراماسىندا 8 كەزدەسۋدە الاڭعا شىقتى. بىلتىرعى ماۋسىمدا اتالعان جۇلدەنى سەرگەي مالىي جەڭىپ العان ەدى.
ال ۇزدىك جارتىلاي قورعاۋشىعا بەرىلەتىن ۆاحيد ماسۋدوۆتىڭ ەسىمىمەن اتالاتىن جۇلدەنى قوستانايدىڭ «توبىلى» مەن قازاقستان ۇلتتىق قۇراماسىنىڭ كوشباسشىسى اسحات تاعىبەرگەن جەڭىپ الدى. 32 جاستاعى جارتىلاي قورعاۋشى بيىل قاتارىنان ەكىنشى رەت ۇزدىك اتاندى. بىلتىرعى ماۋسىمدا تاعىبەرگەن چەمپيوناتتا 24 ماتچ وتكىزىپ, 8 گول سوعىپ, 5 ناتيجەلى پاستىڭ اۆتورى اتانعان-دى. سونىمەن قاتار قازاقستان قۇراماسىنىڭ ساپىندا 7 ويىن وتكىزىپ, ارىپتەستەرىنە 2 ناتيجەلى پاس اسىرعان بولاتىن.
بيىلعى ۇزدىكتەر تىزىمىندە «استانانىڭ» حورۆاتيالىق لەگيونەرى مارين توماسوۆ ەكىنشى ورىنعا يە بولدى. ەلوردالىق كوماندانىڭ لەگيونەرى كەزەكتى ناتيجەلى ماۋسىمدى وتكىزىپ, چەمپيوناتتا بارلىعى 25 ماتچقا قاتىستى. ماۋسىم قورىتىندىسى بويىنشا ول 15 گول سوعىپ, 9 ناتيجەلى پاستىڭ اۆتورى اتاندى. ۇزدىك ۇشتىككە شىمكەنتتىڭ «ورداباسى» كومانداسىنىڭ ويىنشىسى ەلحان استانوۆ ەندى. 22 جاستاعى فۋتبولشى چەمپيوناتتاعى بارلىق
ويىندا الاڭعا شىعىپ, 7 مارتە مەرگەندىك تانىتىپ, 6 رەت ناتيجەلى پاسپەن كوزگە ءتۇستى.
چەمپيوناتتىڭ ۇزدىك شابۋىلشىسىنا بەرىلەتىن سەرگەي كۆوچكين اتىنداعى سىيلىق «استانانىڭ» پورتۋگاليالىق لەگيونەرى پەدرو ەۋجەنيوعا بۇيىردى. 2022 جىلعى فۋتبول ماۋسىمنىڭ قورىتىندىسى بويىنشا ەۋجەنيو بارلىق جارىستا 24 گول سوعىپ, 5 ناتيجەلى پاستىڭ اۆتورى اتاندى. ءوزىنىڭ ۇزدىك ونەرىمەن ول كومانداسىنىڭ ەل چەمپيونى اتانۋعا سۇبەلى ۇلەس قوسقانىن ايتا كەتەيىك. سونىمەن قاتار پورتۋگاليالىق ويىنشى چەمپيوناتتىڭ ۇزدىك سۇرمەرگەنى رەتىندە دە ەۆستافي پەحلەۆانيدي اتىنداعى سىيلىقتىڭ يەگەرى اتاندى. ساۋالدامادا ەكىنشى ورىندى «قايراتتىڭ» شابۋىلشىسى جواو پاۋلو يەلەنسە, «استانا» كلۋبى مەن قازاقستان ۇلتتىق قۇراماسىنىڭ شابۋىلشىسى ابات ايىمبەتوۆ ۇزدىك ۇشتىكتى تۇيىندەدى. بىلتىر سەرگەي كۆوچكين اتىنداعى سىيلىقتى «قايرات» شابۋىلشىسى ارتۋر شۋشەناچەۆ جەڭىپ العان ەدى.
سونىمەن قاتار اناتولي يونكين اتىنداعى «ماۋسىمنىڭ ەڭ ۇزدىك جاس ويىنشىسى» جۇلدەسىن «اقتوبە» مەن قازاقستان ۇلتتىق قۇراماسىنىڭ جارتىلاي قورعاۋشىسى ماكسيم سامورودوۆ يەلەندى. 20 جاستاعى ويىنشى بيىلعى ەل بىرىنشىلىگىندە قاتىسقان 22 ويىندا 3 گول سوعىپ, 5 ناتيجەلى پاستىڭ اۆتورى اتاندى. تىزىمدەگى ەكىنشى ورىن «قايراتتىڭ» فۋتبولشىسى ادىلەت سادىبەكوۆكە, ءۇشىنشى ورىن «تاراز» كومانداسىنىڭ جاس شابۋىلشىسى ابىلايحان جۇمابەككە بۇيىردى.
ال «اقتوبە» كلۋبىمەن ەل بىرىنشىلىگىنىڭ كۇمىس جۇلدەگەرى اتانعان اندرەي كارپوۆيچ لەونيد وستروۋشكو اتىنداعى ەڭ ۇزدىك باپكەر اتالىمىندا ۇزدىك شىقتى. كارپوۆيچ ءبىر جىل ىشىندە «قىزىلجار» جانە «اقتوبە» كلۋبتارىندا جۇمىس ىستەدى. سونىمەن قاتار ول ماۋسىم, تامىز جانە قىركۇيەك ايلارىندا ارىپتەستەرى اراسىندا وتكەن ساۋالدامادا جەڭىسكە جەتىپ, ءبىر جىل ىشىندە 3 رەت ايدىڭ ۇزدىك باپكەرى اتاعىن جەڭىپ العان بولاتىن.
