لا-نۋسياعا اتتانعان 12 بۇرىمدىمىزدىڭ بەسەۋى جەڭىس تۇعىرىنان قول بۇلعادى. گۇلناز بورىباەۆا (48 كيلو), اسەم تاڭاتار (63 كيلو) جانە اسەل توقتاسىن (+81 كيلو) قولا مەدالدى مويىندارىنا ءىلدى. جارتىلاي فينالدا ولاردىڭ بارلىعى دا ءۇندىستاننىڭ وكىلدەرىنە جول بەردى. ال فينالعا شىققان بوكسشىلارىمىزدىڭ ەكەۋى دە نەمىس قىزدارىمەن قولعاپ ءتۇيىستىردى. 54 كيلو سالماقتاعى ەلينا بازاروۆا كۋتسوحريستا حريسوۆالانتۋدى باسەكە بارىسىندا ەكى رەت نوكداۋنعا جىبەردى. تورەشىلەردىڭ بارلىعى دا قانداسىمىزدىڭ جەڭگەنىن ءبىراۋىزدان مويىندادى. ءسويتىپ, ەلينا التىننان القا تاقتى. ءوزىنىڭ كوماندالىق ارىپتەسىنىڭ جەڭىستى جولىن باقىت سەيدىش جالعاستىردى. 66 كيلو سالماق دارەجەسىندە كۇش سىناسقان ول كارلوتتا شۋەنەمانعا شاڭ قاپتىرىپ كەتتى. وسىلايشا, 2 التىن جانە 3 قولا مەدالدى ولجالاعان قازاق قىزدارى جالپىكوماندالىق ەسەپتە ۇزدىكتەر ساناتىنان كورىندى.
پيرەنەي تۇبەگىندە شارشى الاڭعا شىققان قازاق جىگىتتەرى اراسىنان تەك نۇربەك مۇرسال مەن داۋلەت تولەمىسوۆتىڭ جەڭىس تۇعىرىنا كوتەرىلۋگە كۇش-جىگەرلەرى جەتتى. 67 كيلو سالماق دارەجەسىندە سىنعا تۇسكەن نۇربەك باستاپقى باسەكەلەردە لاتۆيالىق دەنيس سوروكين, ازەربايجاندىق سانان حاتاموۆ جانە دانيالىق بايەر لۋكاستى ويسىراتا ۇتىپ, جارتىلاي فينالدا يرلانديالىق دجەيمس فرەنسيستەن باسىم ءتۇستى. بىراق فينالدا نۇربەكتىڭ وزبەكستاندىق دجاۆوحير ۋمماتاليەۆكە ءالى جەتپەدى. 75 كيلو سالماقتا جۇدىرىقتاسقان داۋلەت العاشقى اينالىمداردا تۇركيالىق فۋركان قاراداق, گەرمانيالىق سەممو مالەك جانە ۇندىستاندىق دەپاك دەپاكتى سوققىعا جىعىپ, جارتىلاي فينالدا بەلگيالىق حاديت نوانى ەش قينالماي-اق ۇتتى. اقتىق سىندا ول دا وزبەكستاننىڭ وكىلىمەن كۇش سىناستى. بۇل تارتىستا تۇرابەك حابيبۋللاەۆتىڭ مىسى باسىم بولدى.
وكىنىشكە قاراي, وزگە بىلعارى قولعاپ شەبەرلەرىمىز جوعارىدا ايتىلعان مەجەگە دە جەتە العان جوق. رامازان نۇرلىباەۆ (48 كيلو), جانداۋلەت سارسەنبيەۆ (54 كيلو), ماديار تايپاقوۆ (63,5 كيلو) جانە يسلام ماشكەنتاەۆ (81 كيلو) باستاپقى كەزەڭدەردە ءسۇرىندى. كوپ كەشىكپەي يليا كالينين (57 كيلو) مەن سۇلتانبەك ايبار ۇلى (80 كيلو) ۋكراينالىق ايدەر ابۋرايموۆ پەن نيكيتا زاسەنوكقا جول بەرىپ, كورەرمەندەر قاتارىنا قوسىلدى. سول سەكىلدى باقتيار انارباەۆ (60 كيلو) اعىلشىن بيرچالل نەلسوننىڭ وسال تۇسىن تابا المادى. ەگور ەگوروۆ (71 كيلو) پەن نۇرجان دۋماننىڭ (92 كيلو) جولىن كۋبانىڭ جاس قابىلاندارى بوگەدى. ەگور ۆەيتە لورەنتە پەدرودان, ال نۇرجان فرەسنەدا ريكاردو ادرياننان ايلاسىن اسىرا المادى. يۆان ەرمولەنكو (80 كيلو) گرەكيالىق رۋلياس ستيليانوسقا جانە تەمىرلان مۇقاتاەۆ (86 كيلو) يتاليالىق پاولو كارۋسودان جەڭىلدى. ءسويتىپ, قوس كۇمىستى قاناعات تۇتقان ەلىمىزدىڭ جاستار قۇراماسى قالىڭ توپتىڭ اراسىندا قالىپ قويدى. ەڭ وكىنىشتىسى, بۇل جولى دا ءبىزدىڭ جىگىتتەر وزبەكتەردىڭ ورەندەرىنە تاس-تالقان بولىپ ۇتىلدى.
اتالعان جارىستىڭ تاريحى جايىندا ايتار بولساق, قازاقستان قۇراماسى جاستار اراسىنداعى الەم بىرىنشىلىگىنە تۇڭعىش رەت 1994 جىلى قاتىستى. ىستامبۇلدا وتكەن جارىستا جەرلەستەرىمىزگە بەس قولا مەدال بۇيىردى. بۇل جۇلدەنى جەڭىپ العاندار – الەكساندر تسوي (54 كيلو), تالعات قاليموۆ (60 كيلو), اسان سەكسەنباەۆ (63,5 كيلو), دانيار مۇڭايتپاسوۆ (67 كيلو) جانە رۋسلان زۋماەۆ (81 كيلو). 1996 جىلى گاۆانادا ۇيىمداستىرىلعان ءدۇبىرلى دودادا باتىرحان جاقسىباەۆ (60 كيلو) كۇمىس مەدال السا, قۇرالبەك بۇقاروۆ (51 كيلو) قولاعا قول سوزدى. ولاردىڭ ەكەۋى دە شەشۋشى تۇستا رينگ قوجايىندارىنا ەسە جىبەردى.
1998 جىلى بۋەنوس-ايرەستە جالاۋى جەلبىرەگەن جارىس قازاق سپورتى تاريحىندا التىن ارىپتەرمەن جازىلدى. ولاي دەۋگە نەگىز, وتاندىق بىلعارى قولعاپ شەبەرلەرى اراسىنان تۇڭعىش رەت الەم چەمپيونى شىقتى. ونداي باق سەرىك ەلەۋوۆكە بۇيىردى. 51 كيلو سالماق دارەجەسىندە كۇش سىناسقان قاراعاندىلىق قىران فينالدا رەسەيلىك گەورگي بالاكشيننەن باسىم ءتۇستى. ۋاقىت وزا قازاق بوكسىنىڭ شوق جۇلدىزىنا اينالعان بەكزات ساتتارحانوۆ 54 كيلو سالماق دارەجەسىندە كۇمىس مەدالدى موينىنا ءىلدى. شيرەك فينالدا ول كەلەشەكتە وليمپيا ويىندارى مەن الەم چەمپيوناتتارىنىڭ ەكى دۇركىن جەڭىمپازى, قازىرگى كەزدە كاسىپقوي رينگتىڭ كوكجالىنا اينالعان كۋبالىق گيلەرمو ريگوندو ءوريستى 5:1 ەسەبىمەن ۇتقانى دا ەسىمىزدە. نەگىزى فينالدا بەكزات ۋكراينالىق سەرۆين سۋلەيمانوۆتى دا ۇتقان ەدى. بىراق ادىلدىكتى بەلدەن باسقان تورەشىلەر جەڭىستى قارسىلاسىنا بەردى. تاعى ءبىر كۇمىستى پاۆەل ستوروجۋك (+91 كيلو) يەلەنسە, امان باتىرباەۆ (48 كيلو), باۋىرجان قايىرمەنوۆ (75 كيلو) جانە ولجاس ورازاليەۆ (81 كيلو) قولا مەدالدى يەلەندى. ناتيجەسىندە, 1 التىن, 2 كۇمىس جانە 3 قولانى ولجالاعان جەرلەستەرىمىز جالپى ەسەپتە ۇزدىك بەستىكتى تۇيىندەدى.
عاسىرلار توعىسىنداعى الەم بىرىنشىلىگىنىڭ شىمىلدىعى بۋداپەشتە ءتۇرىلدى. ماجارستاننىڭ باس شاھارىندا – گەننادي گولوۆكين (63,5 كيلو) باس جۇلدەنى ولجالادى. ال بەرىك سەرىكباەۆ (48 كيلو), ۇلان ساۋىتباەۆ (54 كيلو) جانە رۋستام ىرگەباەۆ (+91 كيلو) قولاعا قول سوزدى. 2002 جىلى جارىس قايتا بوستاندىق ارالىندا ءوتتى. سانتياگو دە كۋباداعى دودادا فينالعا شىققان ءۇش جىگىتتىڭ دە جولى جەرگىلىكتى بوكسشىلارمەن قيىستى. سولاردىڭ اراسىنان 63,5 كيلو سالماقتاعى قانات ءىلياسوۆتىڭ باق جۇلدىزى جاندى. ول ۆيلەر كينونەزدى قاپى قالدىرىپ, باس جۇلدەنى قانجىعاسىنا بايلادى. ال وسماي وكوستادان ۇتىلعان دميتري گوتفريد (75 كيلو) جانە ياسماني پەرەستەن جەڭىلگەن ەربول باباەۆ (+91 كيلو) كۇمىسپەن كۇپتەلسە, الەكساندر نيلگا (91 كيلو) قولا مەدالدى قاناعات تۇتتى.
بايىپتاپ قارساڭىزدار, جوعارىدا ەسىمدەرى اتالعان بىلعارى قولعاپ شەبەرلەرىنىڭ ءبىرازى ۋاقىت وزا وتاندىق بوكستى ورگە سۇيرەپ, حالىقارالىق ارەنادا تولاعاي تابىستارعا قول جەتكىزدى. ال كەي جىگىتتەر شارشى الاڭىنان مۇلدە كورىنبەي كەتتى. سونىڭ سەبەپ-سالدارىن ءبىز بىلىكتى مامان سۇلتان قاستوەۆتان سۇراعان ەدىك. توقسانىنشى جىلداردىڭ العاشقى جارتىسىنان باستاپ, 10 جىلدان اسا ۋاقىت قازاقستان جاستار قۇراماسىنىڭ اعا جاتتىقتىرۋشىسى بولعان باپكەر: ء«بىز كوپتەگەن دارىندى جاستى ۇلتتىق قۇراما ساپىنا قوستىق. ۋاقىت وزا سولاردىڭ دەنى اسا ءىرى بايراقتى باسەكەلەردە تەڭدەسسىز ونەرىمەن كوزگە ءتۇسىپ, مەملەكەتىمىزدىڭ ماقتانىشىنا اينالدى. ارينە, ول سپورتشىلارعا العىستان باسقا ايتارىمىز جوق. سونىمەن قوسا ەرەسەكتەر رينگىندە وزدەرىن مويىنداتا الماي, قالىڭ توپتىڭ اراسىندا قالىپ قويعاندارى قانشاما. بوزبالا شاقتارىندا كوماندا ساپىنا قابىلداعانىمىزدا ولاردىڭ بولاشاعى جارقىن بولاتىنىنا قىلاۋداي دا كۇمان كەلتىرمەدىك. ءبىر وكىنشىتىسى, جاستار اراسىندا جاسىنداي جارقىراعان جىگىتتەردىڭ دەنى ەرەسەكتەر دۋىنا قوسىلسا, قۇمعا سىڭگەن سۋداي جوق بولادى دا كەتەدى. ونىڭ بارلىعى ءوز باپكەرلەرىمىزدىڭ بىلىمدەرىنىڭ تايازدىعى جانە بىلىكتىلىگىنىڭ تومەندىگى سالدارىنان. تەك اقشا تاۋىپ, ابىروي جيۋدى عانا ويلايتىن جاتتىقتىرۋشىلارعا ۇلتتىق نامىس پەن پاتريوتتىق سەزىم دەگەن قاستەرلى ۇعىمداردىڭ قۇنى كوك تيىن», – دەپ اشىنا سويلەگەن ەدى.
2004 جىلعى بايراقتى باسەكەنى وڭتۇستىك كورەيانىڭ چەدجۋ قالاسى قابىلدادى. بۇل جارىستا ءۇش قولانى قورجىنعا سالدىق. ول مەدالداردى ەلدوس سايدالين (51 كيلو), ەركەبۇلان جۇمانباەۆ (57 كيلو) جانە ۆلاديمير ۋليانوۆ (64 كيلو) ەنشىلەدى. 2006 جىلعى بىرىنشىلىك ماروككونىڭ اعادىر قالاسىندا ءوتتى. سول جارىستا ءۇش قانداسىمىز اقتىق سىنعا شىققانىمەن بارلىعى دا شەشۋشى تۇستا ۇتىلىپ, كۇمىس مەدالدى مويىندارىنا ءىلدى. ولار – ولجاس ساتتىباەۆ (48 كيلو), ازامات سماعۇلوۆ (60 كيلو) جانە ەركەبۇلان شىناليەۆ (81 كيلو). دانيار تولەگەنوۆ (51 كيلو) قولا الدى. 2008 جىلعى بىرىنشىلىكتىڭ جالاۋى مەكسيكانىڭ گۆادالاحارا قالاسىندا جەلبىرەدى. اتستەكتەر ەلى ساپارىنان جەرلەستەرىمىز قوس كۇمىسپەن ورالدى. 60 كيلو سالماقتاعى دانيار ەلەۋسىنوۆتىڭ فينالدا يرلانديالىق رايمون مايلەتكە ءالى جەتپەدى. اسا اۋىر سالماقتاعى يۆان دىچكو كۋبالىق ەريسلاندي ساۆونعا نەبارى ەكى ۇپاي ايىرماشىلىعىمەن ەسە جىبەردى.
2010 جىلى الەم بىرىنشىلىگىنىڭ جالاۋى ازەربايجاندا جەلبىرەدى. بىراق باكۋدە باعىمىز جانبادى. ەلىمىزدىڭ دارىندى جاستارى ەل سەنىمىن اقتاي العان جوق. ناشار ونەر كورسەتكەنىمىز سونشالىق, تەك ەكى بوكسشىمىز عانا شيرەك فينالعا جەتتى. ال 2012 جىلى ەرەۆانداعى جارىستا جالعىز داۋلەت بايعاباتوۆ (75 كيلو) جۇلدەگەرلەر قاتارىنان كورىندى.
2014 جىلى سوفيادا ساتسىزدىكتىڭ سەڭىن بۇزىپ, قايتا ەڭسە تىكتەدىك. سول جارىستا عالىم كەنجەباەۆ تىزگىنىن ۇستاعان كوماندا تاماشا ونەر كورسەتتى. بولگاريانىڭ باس شاھارىندا شالقار ايقىنباي (49 كيلو) مەن ابىلايحان ءجۇسىپوۆتىڭ (60 كيلو) جۇلدىزى جارقىراي جاندى. قوس قانداسىمىز التى بىردەي قارسىلاسىن بەت قاراتپاي ۇتىپ, الەم چەمپيونى اتاندى. فينالدا ۇتىلعان سۇلتان زاۋىربەك (56 كيلو) پەن ۆاديم كازاكوۆ (81 كيلو) ەكىنشى ورىنى يەلەندى. وتانداستارىمىزبەن بىرگە اقش, كۋبا جانە رەسەي قۇرامالارى دا ەكى التىننان ولجالادى. الايدا ولاردىڭ بىرەۋى دە كۇمىسكە قول جەتكىزە المادى. سونىڭ ارقاسىندا قازاقستاننىڭ جاس ورەندەرى ءوز تاريحىندا تۇڭعىش رەت الەم بىرىنشىلىگىنىڭ كوماندالىق ەسەبىندە كوش باستادى.
2016 جىلى رەسەيدىڭ سانكت-پەتەربۋرگ قالاسىندا قازاقتىڭ ءۇش بىردەي ورەنى اقتىق سىندا كۇش سىناستى. امەريكالىق مارك كاسترودان ايلاسىن اسىرا الماعان ءساماتالى تولتاەۆ (56 كيلو) پەن شوتلانديالىق ۆيليام حاتچينسونعا جول بەرگەن بەك نۇرماعامبەت (75 كيلو) كۇمىس السا, سادريددين احمەدوۆ (69 كيلو) التىن تۇعىرعا كوتەرىلدى. جارتىلاي فينالدا اعىلشىن حارريس اقباردان باسىم تۇسكەن ول فينالدا ۋكراينالىق پاۆەل گۋلانى قاپى قالدىردى. نەۆا جاعالاۋىندا بەكزات نۇرداۋلەتوۆكە (81 كيلو) قولا مەدال بۇيىردى.
2018 جىلى بۋداپەشتە اعايىندى ورالبايلار اتوي سالدى. 75 كيلو سالماقتاعى نۇربەك الەم چەمپيونى اتانسا, 91 كيلو سالماقتاعى ايبەك كۇمىس مەدالدى يەمدەندى. سونداي-اق ەرماحان جاقپەكوۆ (69 كيلو), ساعىندىق توعامباي (81 كيلو) جانە دامير تويباي (+91 كيلو) ەكىنشى ورىنعا تۇراقتادى. جوعارىدا اتالعان جىگىتتەرىمىزدىڭ بارلىعى دا فينالدا رەسەيلىكتەرمەن كەزدەستى. سولاردىڭ اراسىنان تەك نۇربەكتىڭ شوقتىعى بيىك بولدى. ال قالعاندارى ەسە جىبەردى. اسا جەڭىل سالماقتا قولعاپ تۇيىستىرگەن ماحمۋد سابىرحان ءۇشىنشى ورىندى قاناعات تۇتتى. كوماندالىق ەسەپتە قازاقستان رەسەي مەن تايلاندتان كەيىنگى ءۇشىنشى ساتىعا جايعاستى.
2021 جىلى پولشانىڭ كەلتسە قالاسىندا وتكەن جارىسقا قازاقستان قۇراماسىن قايرات ءساتجانوۆ باستاپ اپاردى. بۇل جارىستا 2 التىن, 2 كۇمىس جانە 1 قولا مەدالدى يەلەنگەن جەرلەستەرىمىز كوماندالىق سايىستا ەكىنشى ورىن الدى. ءبىزدىڭ جۋان جۇدىرىقتى جىگىتتەردىڭ اراسىنان سانجار تاشكەنباي (49 كيلو) مەن سابىرجان اقحالىقوۆقا (64 كيلو) تەڭ كەلەر ەشكىم تابىلمادى. سابىر ەربولات (57 كيلو) پەن ەلنۇر ءسۇيىنباي (60 كيلو) كۇمىس جانە دياس مولجىگىتوۆ (75 كيلو) قولا مەدالدى يەلەندى. مىنە, جاستار اراسىنداعى الەم بىرىنشىلىگىنىڭ قىسقاشا تاريحى وسىنداي.
