باقىتتىڭ مەكەنىن ۇلىقتاعان جوبا

وتباسى قۇندىلىعى ارتقان سايى­ن قوعامداعى بىرلىكتىڭ نىعايا تۇسەرى انىق. ەلىمىزدىڭ باس قالاسىنىڭ دەمو­گرافيالىق وسىمىندە دە جىل سايىن وڭ كورسەتكىش بايقالادى. ىنتىما­عى­مىزدىڭ ۇيىتقىسى بولىپ وتىرعان باقىتىمىزدى باعالاي ءتۇسۋ ءۇشىن استانا قالاسىنىڭ جاستار ساياساتى ماسەلەلەرى باس­قارماسى ءداستۇرلى تۇردە «وتباسى – با­قىت مەكەنى» اتتى كەشەندى جوبانى ساتىمەن ۇيىمداستىرۋدا. جوبادا وتبا­سىلىق مارافون; جاس وتباسىلارعا، جۇكتى ايەلدەرگە جانە اتا-انا بولۋدى جوس­پارلاپ وتىرعان جاس جۇبايلارعا ار­نالعان سەمينار-ترەنينگتەر; كوللەدج­دەر مەن جوعارى وقۋ ورىندارىنىڭ ستۋدەنتتەرىنە ارنالعان سىنىپتان تىس ءىس-شارالار; بەينەبايقاۋلار; فوتوسۋرەتتەر بايقاۋلارى بار.

ەلوردالىق جاس وتباسىلارعا ارنالعان «ۇزدىك جاس وتباسى» جالپىقالالىق باي­قاۋى وسى جىلدىڭ 24 قازانىندا باستالعان-دى. ءبىر ايعا سوزىلعان بايقاۋ قو­رى­تىندىسى استانا قالاسىنداعى قازاقستان قارۋلى كۇشتەرىنىڭ اسكەري-تاريحي مۇرا­جايىندا ءوتتى.

بايقاۋ ەرەجەسىنە سايكەس، قاتىسۋشى وتباسىلار ۇزدىكتەر قاتارىنان تابىلۋ ءۇشىن «نەلىكتەن بۇل بايقاۋدا جەڭىسكە جەتۋىمىز كەرەك؟» تاقىرىبىندا بەينە ۆيزيتكا جازسا، ال فيناليستەر Instagram جەلىسىندە لۇپىلدەر جانە پىكىرلەر سانى بويىنشا انىقتالدى. بايقاۋعا 53 وتباسى قاتىسقانىمەن، فينالعا تەك 10-ى جولداما الدى.

جاستار ساياساتى ماسەلەلەرى باس­قار­ماسىنىڭ باسشىسى قايرات قامباروۆتىڭ ايتۋىنشا، جاس وتباسىلاردى قولداۋ – جاستار ساياساتى سالاسىنىڭ نەگىزگى مىندەتتەرىنىڭ ءبىرى. وسى باعىتتا «وتباسى – باقىت مەكەنى» ءىس-شارالار كەشەنى ەلوردادا بىرنەشە جىل قاتارىنان ۇيىمداستىرىلىپ كەلەدى. وسى ۋاقىتقا دەيىن جۇگىرۋ مارافونى، سەمينار ترەنينگتەر، ءتۇرلى بايقاۋلار وتكىزىلدى.

«بۇل بايقاۋعا بارلىعى مىڭنان اسا جاس وتباسى قاتىسىپ جاتىر. ءدال 1 اي بۇرىن وتىنىمدەر قابىلداۋ باستالعان ەدى. سولاردىڭ ىشىنەن فينالعا تەك 10 وت­باسى شىعىپ وتىر. ەلوردامىزدىڭ جاس وتباسىلارىن وسىنداي بايقاۋلارعا قاتىسۋعا شاقىرامىن. سايىس بولعاننان كەيىن جەڭگەنى دە، جەڭىلگەنى دە بولادى. بارلىعى لايىقتى، قازىلار القا­سىنا وڭاي بولمايتىنى انىق»، دەدى ق.قام­باروۆ.

سونىمەن، بايقاۋ ناتيجەسى بەلگىلى بولىپ، جەڭىمپازدارعا تۇرمىستىق تەحنيكا مەن ەلەكترونيكا ساتىپ الۋعا ارنالعان اقشالاي سەرتيفيكاتتار بەرىلدى. اتاپ ايتقاندا، 1-ورىن العان سەمبەكوۆتار وتباسى (قازىبەك سەمبەكوۆ، اقەركە تىلەۋ­بەكوۆا) – 500 مىڭ تەڭگە، 2-ورىن ال­عان بالابەكوۆتەر وتباسى (باعلان بالا­بە­كوۆ، ارۋنا نيازبەك) – 350 مىڭ تەڭگە جانە 3-ورىن العان بوتاشەۆتار وتباسى (ارمان بوتاشەۆ، ايعانىم بوتاش) 250 مىڭ تەڭ­گەنىڭ سەرتيفيكاتىمەن ماراپاتتالدى.

بۇعان قوسا بايقاۋ فينالىنا وتكەن قاتىسۋشىلاردىڭ بارلىعى ماراپاتسىز قالمادى. ياعني قالعان 7 وتباسى دا 100 مىڭ تەڭگەدەن جۇبانىش سىيلىعىنا يە بولدى.

اتالعان بايقاۋ ءار وتباسىنداعى قا­رىم-قاتىناستى نىعايتۋعا، بالالار مەن اتا-انالاردى جاقىنداستىرۋعا عانا ەمەس، سونداي-اق كىشكەنتايلاردى سالاماتتى ءومىر سالتىنا باۋلۋعا جانە قوعامعا بەيىمدەۋگە ىقپال ەتەدى.

«قۋانىشىمىزدا شەك جوق. ءبىز ءۇشىن ومىرىمىزدەگى ەرەكشە ءسات بولدى. وتباسىمىز ءتورت ادامنان تۇرادى. مەن – اسكەري قىزمەتكەرمىن، جۇبايىم بالا­باقشادا بالا تاربيەسىمەن اينالىسادى. ۇلىمىز – مەملەكەتتىك بالا­باقشا تاربيەلەنۋشىسى. قىزىمىز – ۇيدە اتا-اپاسىنىڭ قولقاناتى. ءبىزدىڭ وتاۋ قۇر­عانىمىزعا 5 جىل بولدى. العاش ءۇي بولعان ساتتەن تالاي قيىنشىلىق پەن قۋانىشتا ءبىر-بىرىمىزگە ارقا سۇيەپ، ءونىپ-ءوسىپ كەلەمىز. جۇبايىمىز ەكەۋمىزدىڭ دە تۋىپ وسكەن جەرىمىز – اباي وبلىسىنىڭ اباي اۋدانىنداعى ارحات اۋىلى. مەك­تەپ كەزىنەن باستالعان ماحابباتىمىز وتباسىن قۇرۋمەن جالعاستى. باعى­مىزدى سىناپ كورگەن بۇگىنگى سايىستا اتا-انا­لارىمىزدىڭ قولداۋىن جاقسى سەزىن­دىك. سايىستىڭ جاس وتباسىلارعا بەرگەن دۇنيەسى مول بولدى» دەپ اقجارما تىلەگىن ءبىلدىردى، جەڭىمپاز بولعان وتباسىنىڭ وتاعاسى قازىبەك سەمبەكوۆ.

بايقاۋ فينالىندا ەستراداداعى بەلگىلى جۇپ قىدىرالى مەن قاراقات انمەن شاشۋ شاشسا، street workout قوز­عا­لىسىنىڭ نەگىزىن قالاۋشى ايتىم جاكۋپوۆ، جۋرناليست ايكەرىم ەسەنالى، م.گوركي اتىنداعى مەملەكەتتىك ورىس دراما تەاترىنىڭ ديرەكتورى ەرنار جۇماتاەۆ، ء«مولدىر مۇقانوۆانىڭ ونەر-ءبىلىم ورتالىعىنىڭ» نەگىزىن قالاۋشى ءمولدىر مۇقانوۆا جانە مەديامەنەدجەر، پروديۋسەر الپامىس شاريموۆ جانە تاعى باسقالار جاس وتباسىلارعا ەرەكشە قولداۋ ءبىلدىردى.