مازمۇندى ءىس-شارا «بەرەل» عىلىمي-زەرتتەۋ قورىنىڭ اشىلۋىمەن باستالدى. وندا زەينوللا ساماشەۆ جەتەكشىلىك ەتكەن ارحەولوگيالىق ەكسپەديتسيانىڭ ءار جىلدارى «بەرەل» ساق قورعاندارىنان تاپقان بىرەگەي ارتەفاكتىلەرى جيناقتالعان. قورعا ەنگەن 2 مىڭنان استام ارحەولوگيالىق زات تولىقتاي زەرتتەلىپ, قالپىنا كەلتىرىلگەن. اسىرەسە ساق قورعاندارىنان تابىلعان التىن بۇيىمدار مەن اشەكەيلەر, ات ابزەلدەرى مەن قارۋ-جاراق تۇرلەرى جانە اعاش قيمالارى مەن دىڭگەكتەرىنىڭ بولشەكتەرىنە جۇرتشىلىق تاڭىرقاپ قارادى.
ودان كەيىن ءىس-شارا «دالا قورعاندارىنىڭ قۇپيالارى» اتتى كورمەگە ۇلاستى. بۇعان مادەنيەت جانە سپورت ۆيتسە-ءمينيسترى نۇرعيسا داۋەشوۆ قاتىسىپ, ايتۋلى عالىمنىڭ ارحەولوگيا مەن تاريح عىلىمىنا سىڭىرگەن ەڭبەگىن ەڭبەگىن ەرەكشە اتاپ ءوتتى. عالىمعا مادەنيەت جانە سپورت ءمينيسترى داۋرەن اباەۆتىڭ قۇتتىقتاۋ حاتى مەن «مادەنيەت سالاسىنىڭ ۇزدىگى» توسبەلگىسىن تابىس ەتتى. سونىمەن بىرگە شىعىس قازاقستان وبلىسى مادەنيەت باسقارماسىنىڭ باسشىسى نۇربولات احمەتجانوۆ تا مەرەيتوي يەسىنە ىزگى لەبىزىن ءبىلدىردى. اتالعان كورمەگە شىعىس قازاقستان وبلىستىق تاريحي-ولكەتانۋ مۋزەيىنىڭ قورىنداعى جادىگەرلەر ۇسىنىلدى.
سونداي-اق مادەني ءىس-شارا بارىسىندا ارحەولوگيانىڭ وزەكتى ماسەلەلەرىنە, ەسكەرتكىشتەردى زەرتتەۋ مەن قورعاۋعا بايلانىستى دوڭگەلەك ۇستەل ءماجىلىسى ءوتىپ, وندا تاريحشىلار, ارحەولوگتەر جانە قوعام قايراتكەرلەرى وتاندىق ارحەولوگيا سالاسىنداعى ماڭىزدى ماسەلەلەر مەن وزەكتى تاقىرىپتاردى ورتاعا سالىپ, وي ءبولىستى.
كەش سوڭىندا زەينوللا ساماشەۆ ءوزىنىڭ بارلىق سانالى ءومىرىن ارناعان ارحەولوگيا عىلىمى تۋرالى پاراساتتى وي قوزعاپ, وسى ءىس-شارانى ۇيىمداستىرۋعا اتسالىسقان ازاماتتار مەن جينالعان قاۋىمعا العىسىن ءبىلدىردى.
