«كۇن سۋىپ باستاعان ەدى, گاز كەلگەلى ۇيىمىزگە جىلۋلىق كىردى. قالانىڭ ادامىمىز, بىراق جەر ۇيدە تۇرامىز. وتىن تاسىپ, پەش جاعىپ, كۇل شىعارىپ ابدەن قينالاتىن ەدىك. ەندى ءۇيىمىز تاپ-تازا, ءوزىمىز شارشامايتىن بولدىق. ءالى دە سەنبەي تۇرمىن», دەيدى ارىس قالاسىنىڭ تۇرعىنى.
ارىسقا گاز جۇرگىزۋ ءۇشىن «تەمىرلان» اۆتوماتتاندىرىلعان گاز تاراتۋ ستانتسياسىنان 43 كم جانە 107 كم كۆارتال ىشىندە گاز قۇبىرى تارتىلدى. ارىس قالاسى گازبەن تولىقتاي قامتىلعاننان كەيىن, كوگىلدىر وتىن اۋدانعا جاقىن ەلدى-مەكەندەرگە دە تارتىلادى.
«قازترانسگاز ايماق» اق تۇركىستان وندىرىستىك فيليالىنىڭ ديرەكتورى نۇرجان تۇيمەباەۆتىڭ ايتۋىنشا, وسى جىلدا فيليال 22 ەلدى-مەكەنگە گاز جۇرگىزىپ باستاعان. تاعى بىرنەشە ءوڭىردى گازبەن قامتۋ جوسپاردا.
ايتا كەتەيىك, بۇگىندە وڭتۇستىك ءوڭىر تابيعي گازدى ەڭ كوپ تۇتىنادى.
بۇعان دەيىن, ۇلتتىق كومپانيانىڭ باسقارما توراعاسى سانجار جاركەشوۆ پرەزيدەنتتىڭ تاپسىرماسى بويىنشا جاسالعان گاز سالاسىن دامىتۋدىڭ كەشەندى جوسپارىنا سايكەس, QazaqGaz 2030 جىلعا ەلىمىزدىڭ گازداندىرۋ كورسەتكىشىن 65 پايىزعا جەتكىزۋدى كوزدەپ وتىرعانىن ايتقان بولاتىن.
