ءبىلىم كوگىندە – 80 جىل!

الاتاۋدىڭ ەتەگىندەگى ستۋدەنتتەر قالاشىعىندا ءال-فارابي اتىنداعى قازاق ۇلتتىق ۋنيۆەرسيتەتى ءوزىنىڭ 80 جىلدىق مەرەيتويىن ۇلكەن ءسان-سالتاناتپەن اتاپ ءوتتى. ءبىلىم دارياسىندا جەلكەنىن جايعان بۇل وقۋ ورنى ءوزىنىڭ عاسىرعا جۋىق عۇمىرىندا قازاق ەلىنە ەرەن ەڭبەك سىڭىرگەن تالاي الىپتاردى تاربيەلەپ شىقتى. قارا شاڭىراقتىڭ مەرەيلى مەرەكەسىنە جوعارعى سوت توراعاسى قايرات ءمامي, ءبىلىم جانە عىلىم ءمينيسترى اسلان ءسارىنجىپوۆ, كونستي­تۋتسيالىق كەڭەس توراعا­سى يگور روگوۆ, سونىمەن قاتار, ءما­جىلىس دەپۋتاتتارى مەن وسى وقۋ ورنىن ءتامامداپ, بۇگىندە مەم­لە­كەت­تىك قىزمەتتە جۇرگەن بىرقاتار بەلگىلى تۇلعالار استانادان ارنايى كەلدى. مەرەكەلىك شارا ستۋدەنتتەرگە قىزمەت كورسەتەتىن «كەرەمەت» جان-جاقتى جابدىقتالعان كەشەنىن اشۋ سالتاناتىنان باستالدى. ايتا كەتۋ كەرەك, ستۋدەنتتەردىڭ الەۋمەتتىك-تۇرمىس جاعدايىنىڭ بارلىعىنا ىقپال ەتەتىن «كەرەمەت» ورتالىعى – تمد ەلدەرىندە بۇرىن-سوڭدى بولماعان جوبا. بۇل جەردە ستۋدەنتتەر قاجەتتى قۇجاتتارىن رەسىمدەۋگە, زاڭگەرلەر مەن بىلىكتى مامانداردىڭ كەڭەسىنە جۇگىنۋگە, قىزمەتكە ورنالاسۋ ءۇشىن قۇجات تاپسىرۋعا, ءتىپتى, مەديتسينالىق كومەك, ينتەرنەت-كافە, ۇشاق جانە تەمىرجول كاسسالارى, كينوتەاتر, كيىم-كەشەكتى حيميالىق تازالاۋ, شاعىن سۋپەرماركەت سەكىلدى اسا قاجەتتى قىزمەتتىڭ بارلىق تۇرىنە قولجەتىمدى. تاۋلىگىنە ءبىر­نەشە مىڭ ستۋدەنتكە قىزمەت كورسە­تۋگە مۇمكىندىگى بار بۇل ورتالىق بۇگىنگى جاس شاكىرتتەردىڭ بارلىق مۇقتاجدىقتارىن وتەۋ ءۇشىن ءوز جۇمىسىن باستاپ كەتتى. ءو.جولداسبەكوۆ اتىنداعى ستۋ­دەنتتەر سارايىندا ءال-فا­رابي اتىنداعى قازاق ۇلتتىق ۋني­ۆەر­سيتەتىنىڭ 80 جىلدىعىن اتاپ ءوتۋ اياسىندا «قازۇۋ تۇلەك­تەرى­نىڭ فورۋمى» بولىپ ءوتتى. وعان جو­عارىدا اتالعان قۇرمەتتى قوناق­تارمەن قاتار, قالا اكىمى احمەت­جان ەسىموۆ, قازۇۋ رەكتورى عا­لىمقايىر مۇتانوۆ, ءماجىلىس دەپۋتاتى قۋانىش سۇلتانوۆ, سونداي-اق, ەلىمىزدەگى ىرگەلى وقۋ ورىندارىنىڭ رەكتورلارى مەن مەملەكەت جانە قوعام قايراتكەرلەرى, بيزنەس ەليتا وكىلدەرى, وليمپيادا چەمپيوندارى مەن زيالى قاۋىم وكىلدەرى قاتىستى. مەرەكەلىك سالتاناتتى كەشتى ع.مۇتانوۆ قۇتتىقتاۋ سوزىمەن اشىپ, ودان كەيىن ا.ەسىموۆ قازاق­ستان پرەزيدەنتى نۇرسۇلتان نازار­باەۆتىڭ قۇتتىقتاۋ حاتىن وقىپ بەردى. ەلباسى جولداعان حاتتا ءال-فارابي اتىنداعى ۋنيۆەرسيتەتتىڭ قازاق قوعامىنا, عىلىمى مەن بىلىمىنە, سونىمەن قاتار, رۋحاني-مادەني قازىناسىنا قوسقان ولشەۋسىز ۇلەسى, اتالعان شاڭىراقتان تۇلەگەن بىلىكتى مامانداردىڭ ەل ەكونوميكاسى مەن دامۋىنا ۇلكەن ۇلەس قوسىپ كەلە جاتقاندىعى ايتىلعان. جوعارعى سوت توراعاسى ءارى ءال-فارابي اتىنداعى قازاق ۇلتتىق ۋنيۆەرسيتەتى تۇلەكتەرى قاۋىمداستىعىنىڭ پرەزيدەنتى ق.ءمامي ءوز سوزىندە ۋنيۆەرسيتەت تۇلەكتەرى ەلىمىزدىڭ ماڭىزدى سالالارىندا عانا ەمەس, الىس-جاقىن شەتەلدەردىڭ عىلىمي ورتاسىندا ەڭبەك ەتىپ, ەل ابىرويى مەن كەلەشەگى ءۇشىن ايانباي ازاماتتىق بورىشىن وتەپ جۇرگەنىن ايتا كەلىپ, ءوزى جەتەكشىلىك ەتەتىن قاۋىمداستىق تاعايىنداعان ارناۋلى ستيپەنديانى عىلىمي وليمپيادالار مەن كەڭەستەردە ۇزدىك تانىلعان جاس عالىمدارعا, ۋنيۆەرسيتەت شاكىرتتەرىنە تابىس ەتتى. قانات ەسكەندىر, «ەگەمەن قازاقستان».