قازاقستان • 24 قاراشا، 2022

سالىق كودەكسىنە قانداي وزگەرىستەر ەنگىزىلدى؟

45 رەت كورسەتىلدى

قازاقستان پارلامەنتى ەلىمىزدىڭ سالىق كودەكسىنە ەنگىزىلگەن تۇزەتۋلەردى ەكىنشى وقىلىمدا قابىلدادى، دەپ حابارلايدى Egemen.kz.

ۇلتتىق ەكونوميكا ءمينيسترى الىبەك قۋانتىروۆ اتاپ وتكەندەي، تۇزەتۋلەردىڭ ءبىرىنشى بلوگى ەڭبەكاقى تولەۋ قورىنا جۇكتەمەنى ازايتۋعا قاتىستى. ونىڭ ايتۋىنشا، بۇگىنگى كۇنى ەڭبەكاقى تولەۋ قورىنان ءارتۇرلى مولشەرلەمەلەرمەن، ەسەپتەۋ بازالارىمەن بىرنەشە تولەمدەر تولەنەدى.

«بۇل تولەمدەردى ءبىر تولەمگە بىرىكتىرۋ ۇسىنىلادى. ونى ارنايى سالىق رەجيمدەرىن قولداناتىن ميكرو جانە شاعىن بيزنەس سۋبەكتىلەرى ەرىكتى نەگىزدە قولدانادى. سوما بىرىڭعاي جيىنتىق تولەم مەحانيزمىنە ۇقساس بولىنەدى»، دەدى الىبەك قۋانتىروۆ.

وسىلايشا، بىرىڭعاي تولەم جالاقىدان سالىقتار مەن تولەمدەردى ەسەپتەۋدى جەڭىلدەتىپ قانا قويماي، سالىق جۇكتەمەسىن ازايتۋعا مۇمكىندىك بەرەدى.

تۇزەتۋلەردىڭ ەكىنشى بلوگى سالالىق زاڭناماداعى وزگەرىستەرگە بايلانىستى. زاڭ جوباسىندا كونستيتۋتسيالىق سوتقا جۇگىنگەن كەزدە مەملەكەتتىك باجدار بەلگىلەۋ جانە حالىقتىڭ الەۋمەتتىك وسال توپتارىن سالىقتان بوساتۋ ۇسىنىلادى.

كەلەسى نورما وتاندىق تاۋار وندىرۋشىلەردى ىنتالاندىرۋعا باعىتتالعان. بالىق اۋلاۋ كاسىپورىندارى بالىقتى وڭدەۋ كەزىندە ققس-تى 70%-عا تومەندەتۋ بويىنشا نورما ۇسىنىلدى. قازىر مۇنداي جەڭىلدىكتى بالىق وسىرەتىن شارۋاشىلىقتار قولدانادى.

«قانت ءوندىرىسىن ىنتالاندىرۋ ماقساتىندا قامىس شيكىزاتىنىڭ يمپورتىن ققس-تان بوساتۋ، سونداي-اق قانت وندىرۋشىلەرگە ققس جەڭىلدىكتەرىن قولدانۋ مەرزىمىن ۇزارتۋ ۇسىنىلادى»، دەپ قوستى ۇلتتىق ەكونوميكا ءمينيسترى.

ايتا كەتسەك، زاڭ جوباسىندا نولدىك ءتاريفتى قولدانا وتىرىپ، جولاۋشىلار تاسىمالداۋشىلارىنا ماگيسترالدىق تەمىرجول جەلىسىنە قىزمەت كورسەتۋ كەزىندە سالىق سالۋ ماسەلەلەرىن رەتتەۋ كوزدەلگەن.

ازاماتتىق اۆياتسيا سالاسىندا سەرتيفيكاتتار بەرگەنى ءۇشىن الىمداردى الىپ تاستاۋ بويىنشا نورمالار ەنگىزىلەدى.

بۇدان باسقا، جاڭا تۇزەتۋلەرمەن چەكتى بەرمەۋ، يپوتەكالىق كرەديت بويىنشا بەرەشەكتى ەسەپتەن شىعارۋ، جالداۋ قۇنىن تومەندەتۋ جانە تۇرعىن ءۇيدى جالعا الۋعا بيۋدجەتتىك سۋبسيديالار الۋ فاكتىلەرى تۋرالى حابارلاعانى ءۇشىن سىياقى الۋ كەزىندە سالىقتىق تاۋەكەلدەر الىنىپ تاستالادى.

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار