الەۋمەتتىك مەديتسينالىق ساقتاندىرۋ قورى» كەاق استانا قالاسى بويىنشا فيليالى ءباسپاسوز قىزمەتىنىڭ حابارلاۋىنشا, مەكتەپ مەديتسيناسى ءبىلىم بەرۋ ۇيىمدارىندا, ياعني تىكەلەي مەكتەپتەردە, بالاباقشالاردا, شاعىن ورتالىقتاردا نەمەسە باسقا دا ءبىلىم بەرۋ ۇيىمدارىنداعى بالالارعا مەديتسينالىق قىزمەت كورسەتۋدى كوزدەيدى.
بۇرىن مەكتەپ مەديتسيناسى ۋچاسكەلىك قىزمەتكە بولىنگەن قاراجات ەسەبىنەن قارجىلاندىرىلعان. ءمامس جۇيەسىن ەنگىزۋ ارقىلى ول جەكە ۇستانىم رەتىندە بولەك قاراستىرىلدى. بۇل مەكتەپ جاسىنداعى بالالارعا ارنالعان الدىن الۋ شارالارىنىڭ كەڭ اۋقىمىن قامتۋعا مۇمكىندىك بەرەدى. ياعني بۇل مەديتسينانىڭ وسى بولىگىنە – سىرقاتتىڭ الدىن الۋ ءۇشىن تولىقتاي تەكسەرۋگە, قانداي دا ءبىر سىرقات انىقتالعان بالالاردى دەر كەزىندە «د» ەسەپكە الۋعا, بارلىق ستاندارتتىڭ ساقتالۋىن باقىلاۋعا, ت.ب. ەرەكشە نازار اۋدارىلادى.
وسى جىلى قور ءبىلىم بەرۋ ۇيىمدارىندا مەديتسينالىق قىزمەت كورسەتۋگە ەلىمىز بويىنشا 436 ەمحانامەن 26,1 ملرد تەڭگەگە جۋىق سوماعا شارت جاساعان. سالىستىرا قاراساق, 2021 جىلى 430 مەديتسينالىق ۇيىم قىزمەت كورسەتتى, شارتتاردىڭ قۇنى 22,2 ملرد تەڭگەنى قۇرادى.
مەكتەپ مەديتسيناسىنىڭ ءمانى – ءبىلىم بەرۋ ۇيىمدارىنداعى بالالاردى قاجەتتى مەديتسينالىق قىزمەتتەرمەن قامتاماسىز ەتۋ. بۇل جۇمىس مەكتەپ نەمەسە بالاباقشا ورنالاسقان اۋماققا قاراستى ەمحانا جاۋاپكەرشىلىگىندە بولادى. بۇل ءۇشىن مەكتەپتە مەديتسينا قىزمەتكەرىنىڭ جابدىقتالعان كابينەتتەرى بار ارنايى قىزمەت قۇرىلادى. پروفيلاكتيكالىق تەكسەرۋ نەمەسە ۆاكتسينالاۋ جۇرگىزۋ ءۇشىن مەكتەپكە نەمەسە بالاباقشاعا ءتيىستى پروفيلدەگى دارىگەرلەر كەلەدى. مۇنداي ءىس-شارالار الدىن الا جوسپارلانادى جانە اتا-انالارعا الدىن الا حابارلانادى.
«مەكتەپ مەديتسيناسى بولىمشەسىنىڭ مىندەتتەرى مەن ماڭىزدى باعىتتارىنىڭ ءبىرى – بولىمشە قىزمەتىنىڭ جۇمىسىن ۇيىمداستىرۋ. شىنىندا دا, مەكتەپكە دەيىن جانە مەكتەپ جاسىندا بالالاردىڭ سالاماتتى ءومىر ءسۇرۋى قالىپتاسادى, ولار ورتاعا بەيىمدەلەدى, بالانىڭ دەنساۋلىعى كۇشەيەدى نەمەسە كەرىسىنشە, تومەندەيدى. مەكتەپ مەديتسيناسى بولىمشەسىنىڭ جۇمىسى وسىنداي جاعدايلاردى باقىلاپ, دەنساۋلىق جاعدايىنداعى جاعىمسىز ۇدەرىسىنىڭ دامۋىن بولدىرماۋ ءۇشىن ۇيىمداستىرىلعان. ءبىلىم بەرۋ مەكەمەلەرىنىڭ وقۋشىلارى مەن تاربيەلەنۋشىلەرىن مەديتسينالىق كومەكپەن قامتاماسىز ەتۋ بالالار ەمحاناسىنىڭ مەكتەپكە دەيىنگى – مەكتەپ بولىمشەسىنە جۇكتەلگەن. بۇل بولىمشە بالالار ەمحاناسىنىڭ بارلىق باسقا بولىمشەلەرىمەن تىعىز بايلانىستا جۇمىس ىستەيدى. مەكتەپ مەديتسيناسى بولىمشەسىنىڭ قۇرىلىمىنا ءبىلىم بەرۋ مەكەمەلەرىندەگى مەديتسينالىق كابينەتتەر كىرەدى. ءبىزدىڭ ەمحانا اۋماعى بويىنشا بولىمشەدە 16 مەكتەپ پەن 10 مەملەكەتتىك بالاباقشا بار», دەيدى استانا قالاسىنداعى №9 ەمحانانىڭ مەكتەپ مەديتسيناسى بولىمشەسىنىڭ مەڭگەرۋشىسى ازامات مىڭباەۆ.
مەكتەپ مەديتسيناسىنىڭ تاريفىنە ۆاكتسينالاۋ, جىل سايىنعى پروفيلاكتيكالىق تەكسەرۋ, ءتىس دارىگەرىنىڭ تىكەلەي وقۋ ورنىندا جۇرگىزەتىن تەكسەرۋى كىرەدى. سونداي-اق وقۋ ورنىنداعى دارىگەرلەر بالالارعا سالاماتتى ءومىر سالتىن ۇستانۋ جونىندە ءىس-شارالار وتكىزەدى. ەگەر پروفيلاكتيكالىق تەكسەرۋدە پاتولوگيا انىقتالسا, وندا بالا تىركەلگەن جەرى بويىنشا ەمحاناعا تەرەڭدەتىلگەن مەديتسينالىق تەكسەرۋگە جىبەرىلەدى. بالالاردىڭ ۆاكتسينالاۋ اتا-انالارىنىڭ كەلىسىمىمەن ۇلتتىق ەگۋ كۇنتىزبەسى بويىنشا جۇرگىزىلەدى. شۇعىل جاعدايلاردا مەديتسينالىق پۋنكتتە جەدەل جاردەم بريگاداسى كەلگەنگە دەيىن بالالارعا العاشقى كومەك كورسەتىلەدى.
وسىلايشا, مەكتەپ مەديتسيناسى مەكتەپ وقۋشىلارىنىڭ دەنساۋلىق جاعدايىن ۇزدىكسىز باقىلاۋدى قامتاماسىز ەتۋگە جانە قاجەت بولعان جاعدايدا ۋاقتىلى العاشقى كومەك كورسەتۋگە مۇمكىندىك بەرەدى.
