ايتا كەتەيىك, قۇبىر ارقىلى تاسىمالداناتىن مۇناي ونىمدەرى, اسىرەسە, قىس كۇندەرى قويۋلانىپ, قاتىپ قالماۋى, قۇبىردان جەڭىل ءوتۋى ءۇشىن جىلىتىلىپ وتىرادى. مۇنداي جىلىتۋ پەشتەرى ادەتتە ءار 100 شاقىرىم سايىن ورنالاستىرىلادى. كەيىنگى كەزدە مۇنداي پەشكە سۇرانىس ارتتى, سەبەبى سوڭعى حالىقارالىق وقيعالارعا بايلانىستى شەتەلدىك زاۋىتتار جابىلىپ قالعان. ال ەلىمىزدە, ءتىپتى تمد اۋماعىندا مۇنداي كۇردەلى قوندىرعىنى جاسايتىن ءوندىرىس ورنى جوق.
ءسويتىپ, ورال قالاسىندا ورنالاسقان «باتىس قازاقستان ماشينا جاساۋ كومپانياسى» اق قىزمەتكەرلەرى جاڭا جوباعا كىرىسىپ كەتتى. پەشتى جوبالاۋ, دايىنداۋ, مونتاجداۋ جانە ىسكە قوسۋ سەكىلدى كۇردەلى تىزبەكتى تولىق وزدەرى اتقارىپ شىقتى. كسرو كەزىندە «مەتالليست» اتىمەن تانىمال قارۋ-جاراق زاۋىتى سوڭعى جىلدارى باعىتىن كەڭەيتىپ, نارىقتا سۇرانىسى بار بىرنەشە جوبانى قولعا العان بولاتىن. ال مىنا PPN-10 مۇناي جىلىتۋ پەشى – باتىس قازاقستان ماشينا جاساۋ كومپانياسىن جاڭا قىرىنان كورسەتتى دەۋگە بولادى.
– ءبىزدىڭ پەشىمىز بارلىق سىناقتان ءساتتى ءوتىپ, قولدانىسقا ەنگىزۋگە قاۋىپسىز دەپ تانىلدى. بۇل بۇكىل تمد اۋماعىندا تەڭدەسى جوق ءىرى جوبا. ءبىز «قازترانسويل» كومپانياسىنىڭ تاپسىرىسىن العان سوڭ, بارلىق مۇمكىندىكتى, رەسۋرستى جۇمىلدىرىپ, وسى قۇرىلعىنى جاساۋعا تاۋەكەل ەتتىك. ەڭبەگىمىزدىڭ ناتيجەسى كۇتكەندەگىدەن دە اسىپ كەتتى. وندىرىستىك قۋاتى جوعارى, ءورت قاۋىپسىزدىگى كۇشەيتىلگەن مۇناي قىزدىراتىن اۆتوماتتاندىرىلعان PPN-10 پەشى قاشىقتان باسقارىلادى. سونىمەن قاتار ءورتتى ازوتتىڭ كومەگىمەن سوندىرەتىن اۆتوماتتىق ستانسامەن جاساقتالعان. بۇل پەشتىڭ پايدالى ارەكەت كوەففيتسيەنتى 85 پايىزعا دەيىن كوبەيتىلگەن. ساعاتىنا 825 تەكشەمەتر مۇناي وتكىزۋگە قاۋقارلى, – دەيدى «بقمك» اق باس ديرەكتورى ازامات بيتۋرين.
جاڭا پەشتىڭ اشىلۋ سالتاناتىنا باتىس قازاقستان وبلىسىنىڭ اكىمى عالي ەسقاليەۆ, «قازترانسويل» اق باس ديرەكتورىنىڭ ورىنباسارى ءسابيت ارىنوۆ جانە «بقمك» اق باس ديرەكتورى ازامات بيتۋرين باستاعان كومپانيا قىزمەتكەرلەرى قاتىستى.
عالي ەسقاليەۆتىڭ پىكىرىنە قاراعاندا, زاۋىتتىڭ جاڭا ءونىمى تەك وبلىستىڭ ەمەس, بۇكىل ەلىمىزدىڭ ماشينا جاساۋ سالاسىن دامىتۋعا قوسقان زور ۇلەس.
– بۇگىندە باتىس قازاقستان ماشينا جاساۋ كومپانياسى ەلىمىزدىڭ مۇناي-گاز سەكتورى سالاسىنا قاجەتتى جوعارى تەحنولوگيالىق جابدىقتاردى ازىرلەيتىن جانە وندىرەتىن جەتەكشى كاسىپورىنعا اينالدى. مۇنداي يننوۆاتسيالىق جابدىقتى ءوندىرۋ ءبىزدىڭ وڭىردە جوعارى بىلىكتى تەحنيكالىق كادرلاردىڭ جەتكىلىكتى ەكەنىن كورسەتەدى. «بقمك» بۇرىنعى «مەتالليست» قارۋ-جاراق زاۋىتىنىڭ مارتەبەسىن ساقتاي وتىرىپ, وندىرىستىك قۋاتىن ارتتىرۋ ارقىلى ازاماتتىق ونىمدەردىڭ جاڭا تۇرلەرىن يگەرە الدى. «قازترانسويل» اق-نىڭ ءبىزدىڭ كومپانيامىزعا دەگەن سەنىمى ءۇشىن العىس بىلدىرەمىن. مۇنداي ناتيجەلى ىنتىماقتاستىقتىڭ بولاشاعىنا زور سەنىم بىلدىرە وتىرىپ, الداعى ۋاقىتتا تاپسىرىستاردىڭ ودان ءارى ارتا تۇسۋىنە تىلەكتەسپىن, – دەدى وبلىس اكىمى.
ورالدىق كونسترۋكتورلاردىڭ بىرەگەي ادىستەرى قولدانىلىپ جاسالعان PPN-10 مۇناي جىلىتۋ پەشىندە قازاقستاندىق قامتۋ ۇلەسى شامامەن 80%-دى قۇرايدى. بۇل ورال زاۋىتىنا جەرگىلىكتى نارىقتاعى شەتەلدىك انالوگتارمەن باسەكەلەسۋگە مۇمكىندىك بەرەدى دەيدى ماماندار.
باتىس قازاقستان وبلىسى
