2018 جىلى ىسكە قوسىلعان كاسىپورىندا العاشقى جىلى جەلىدەن 150 تراكتور قۇراستىرىلىپ شىعارىلسا, بيىل ونىڭ سانى 1 200-گە جەتىپ جىعىلادى. الداعى مەجە – سىرتتان تاسىمالداناتىن بىرقاتار بولشەكتەردى وسى كاسىپورىندا دايىنداۋ. بۇگىندە زاۋىت جانىنان جەكە تسەح سالىندى. بۇل تسەحتا كابينا اينەگى, رادياتورلار, كاپوت جانە تراكتور كابيناسىنىڭ ىشكى-سىرتقى قاپتاماسى مەن ءتۇرلى قوندىرعى بولشەكتەر جاسالاتىن بولادى.
– ءدال وسى كۇندەرى وندىرىسكە قاجەت قۇرىلعىلاردى ورناتىپ جاتىرمىز. جاڭا تسەح ىسكە قوسىلسا, جىلىنا 10 مىڭ كابينا جاساپ شىعارا الامىز. كابينالار تولىقتاي وسى جەردە جاسالادى. ءوزىمىزدىڭ تەمىريگىش, دانەكەرلەۋ, بوياۋ قۇرىلعىلارىمىز بولادى. تەك مەتالدى عانا ساتىپ الامىز دا, ونى كەسىپ, ءپىشىپ, ءيىپ, دانەكەرلەپ, بوياپ, نولدەن باستاپ دايىن كابينا قۇراستىرىپ شىعارامىز. قازىرشە, ءبىزدىڭ تراكتورلارىمىز ىشكى نارىقتا عانا ساۋدالانىپ جاتىر. ال ءبىز جوسپارلاپ وتىرعان جاڭا ءوندىرىس ورنى ەڭ سوڭعى ۇلگىدەگى «بەلارۋس» تراكتورلارىن ەكسپورتقا شىعارۋعا مۇمكىندىك بەرەدى. سونداي-اق مينسك تراكتور زاۋىتىنىڭ ءوزىن كابينامەن قامتاماسىز ەتۋ جوسپاردا بار, – دەيدى زاۋىت ديرەكتورىنىڭ ورىنباسارى ۆالەنتين داشكەۆيچ.
قازىر قوستاناي تراكتور زاۋىتىنداعى ءوندىرىستىڭ جەرگىلىكتى ۇلەسى وسى ماڭايداعى كاسىپورىنداردان ساتىپ الىناتىن ۇساق-تۇيەك ماتەريالدار مەن قول ەڭبەگىن قوسقاندا شامامەن 20 پايىزداي عانا بولادى. ال ءوزى كوزدەگەن مەجەدە كابينا جاساۋعا كوشكەن جاعدايدا, كاسىپورىنداعى جەرگىلىكتى ءوندىرىستىڭ ۇلەسى 40 پايىزعا جۋىقتايدى.
زاۋىتتا قازىر 75 ادام ەڭبەك ەتەدى. مۇنداعى جۇمىسشىلار مينسك تراكتور زاۋىتىنا بارىپ, ءبىر-ەكى جىل سول جاقتا جۇمىس ىستەپ, بىلىكتىلىگىن ارتتىرىپ, شەبەرلىگىن ۇشتاپ وتىرادى. ونىڭ سىرتىندا, كاسىپورىندا ەڭبەك ادامىنا قاجەت جاعدايدىڭ ءبارى قاراستىرىلعان. مىسالى, ۇزاق جىل اۋىلدا مەحانيزاتور بولىپ ەڭبەك ەتكەن بورانباي شايكەن قالاعا كوشىپ كەلگەن سوڭ, ەڭبەك جاعدايى قولايسىز بولعاندىقتان ءبىر جەرگە تۇراقتاپ جۇمىس ىستەي الماعان. تراكتور زاۋىتى اشىلا سالىسىمەن وسىندا ورنالاسقان بورانباي ءتورت جىلدان بەرى تاپجىلماي ءبىر ورىندا جۇمىس ىستەپ كەلەدى.
– بۇعان دەيىن «تازالىق» سەرىكتەستىگىندە تراكتور جۇرگىزدىم. ودان سوڭ قۇرىلىستا دا جۇمىس ىستەدىم. وسى زاۋىتقا كىرگەنشە, ءبىرتالاي جۇمىستىڭ باسىن شالدىق قوي. ناعىز تۇراقتاعان جەرىم – وسى زاۋىت. جۇمىسىم جانىما جاقىن. جالاقىم دا تۇراقتى, ۋاقىتىندا بەرىلەدى. بەس كۇنگى جۇمىستان كەيىن ەكى كۇنگى دەمالىسىمىز بار. جىلى, جايلى جەردە ەڭبەك ەتەمىز. قۇرال-سايمانىڭ ساي. بىلمەگەنىڭدى وقىتىپ, ۇيرەتىپ وتىرادى, – دەيدى ب.شايكەن.
كاسىپورىن بولاشاقتا كەرەك كادرلاردى دايارلاۋ قامىندا تەحنيكالىق مامانداردى وقىتاتىن قوستاناي اۆتوجول كوللەدجىمەن دە تىعىز بايلانىس ورناتقان. بيىل زاۋىت باسشىلارىنىڭ ۇسىنىسىمەن اتالعان كوللەدجدە تراكتور جاساۋ سالاسىنا قاتىستى بىرنەشە ماماندىق اشىلعان. مۇندا وقىپ جاتقان ستۋدەنتتەر ەكى جىلدان كەيىن تراكتور زاۋىتىنا كەلىپ, سلەسار, ستانوك باسقارۋشى بولىپ جۇمىسقا كىرىسەدى.
«بەلارۋس» تراكتورى كابينالارىن جاساۋ تسەحى ىسكە قوسىلعان سوڭ, زاۋىت تاعى 100 ادامدى جۇمىسقا الماق.
قوستاناي وبلىسى
