جاڭا قازاقستاننىڭ العاشقى كۇنى دەگەندە مەڭزەپ وتىرعانى – كەشەگى وتكەن پرەزيدەنت سايلاۋىنىڭ قورىتىندىسى ەكەنى كىم-كىمگە دە بەلگىلى. ورتالىق سايلاۋ كوميسسياسىنىڭ الدىن الا ەسەبى بويىنشا قاسىم-جومارت توقاەۆقا سايلاۋشىلاردىڭ 81,31 پايىزى داۋىس بەرگەن. ەل بولاشاعى الامان تاڭداۋعا تۇسكەن سايلاۋداعى قاسىم-جومارت توقاەۆتىڭ وسىناۋ سەنىمدى جەڭىسى جاڭا قازاقستانمەن بايلانىستىرىلۋى زاڭدى ءارى تابيعي. ويتكەنى «مىڭ ءولىپ, مىڭ تىرىلگەن» حالقىمىز جاڭا, ادىلەتتى قازاقستاندى قالاپ وتىر. سول سەبەپتى دە سايلاۋشىلاردىڭ كوپشىلىگى الداعى جەتى جىلدا قاسىم-جومارت توقاەۆتىڭ مەملەكەت باسشىسى بولعانىن قالايدى. بۇگىن سول حالىق قالاۋىنىڭ ناتيجەسىن كورىپ وتىرمىز.
سايلاۋ الدىندا كەسىر, كەراۋىز سوزدەر دە ايتىلدى. ب ۇلىككە شاقىرعان اۋمەسەرلەر دە تابىلدى. مۇندايلاردى حالىققا جانى اشيدى, ەلدىك مۇددەنى ويلايدى دەپ استە ايتا الماس ەدىك. حالىق تا مۇنى تۇسىنبەيتىن اقىماق ەمەس. وزىنە كىمنىڭ دوس, كىمنىڭ قاس ەكەنىن ايىرادى. بولاشاعىنىڭ كىممەن بىرگە ەكەنىن حالىق تامىرشىداي تاپ باسىپ, ءدال انىقتاپ بولجايدى. حالىق سەنىمى الدامايدى. سول سەبەپتى دە ەل ازعىرعاندارعا ەرمەي, سايلاۋعا ۇلكەن بەلسەندىلىكپەن قاتىستى. الامانعا تۇسكەن ۇمىتكەرلەر اراسىندا ءىس باسىنداعى پرەزيدەنتتىڭ وق بويى وزىقتىعى كورىنىپ تۇردى. مۇنى سايلاۋشىلار دا راستاپ بەردى.
ق.توقاەۆ جاڭا, ادىلەتتى قازاقستاندى ەلمەن بىرگە قالاي قۇرۋدىڭ جوسپار, باعدارلاماسىن تياناقتاپ بايانداپ بەردى. حالىق سوعان سەنگەندىكتەن دە زور ءۇمىت ارتىپ وتىر. وسى ارادا ۇلى ابايدىڭ مىنا ءبىر شۋماق ولەڭى ويعا ورالادى:
«سەنى جاقسى كورمەسە,
سەنەر مە ەدى سوزىڭە؟
اپىر-اي دەپ تەرلەسە,
ار ەمەس پە وزىڭە؟!»
حاكىم ايتسا ايتقانداي, حالىق جاقسى كورمەسە, ەل باسشىلىعىنداعى ەرەن ەڭبەگىن ەلەمەسە, سايلاۋدا سەنىم بىلدىرمەس ەدى, ەل پرەزيدەنتى ەتىپ تاڭداماس ەدى. سەنىم ءبىلدىردى دەمەك, حالىق جاقسى كورەدى. ارينە, ەندى وسى سەنىمدى اقتاۋ كەرەك. اباي ايتقانداي, وزىنە سەنىم بىلدىرگەن تۋعان حالقىن اپىر-اي دەگىزىپ تەرلەتكىزبەي, ازاماتتىق ارىن جوعارى ۇستايتىنىنا سەنىم مول.
قورعانبەك امانجول,
اقىن, ارداگەر جۋرناليست,
حالىقارالىق «الاش» ادەبي سىيلىعىنىڭ لاۋرەاتى
