وتكەن بەس جىلدا گازعا قول جەتكىزە الاتىن تالدىقورعاندىقتاردىڭ تەك جارتىسى عانا كوگىلدىر وتىنعا قوسىلعان. بۇل – 30 مىڭ ابونەنت, ياكي تۇرعىنداردىڭ 55 پايىزى عانا. قالا تۇرعىندارىمەن كەزدەسۋدە وبلىس باسشىسى بەيبىت يساباەۆ بۇل ءىستىڭ باياۋ جۇرۋىنە گازعا قوسۋ قۇنىنىڭ جوعارى بولۋى سەبەپ بولىپ وتىرعانىن جەتكىزدى. بۇگىندە قازاندىق پەن جيىنتىقتار قۇنىنا بايلانىستى گاز قوستىرۋ 700 مىڭ تەڭگەگە دەيىن بارادى. مۇنى ەستىگەن حالىق ابىگەرگە تۇسۋدە.
«زالدا مەردىگەر كومپانيالاردان كەلگەن وكىلدەر بار ما؟ قازاندىقتى ەسەپكە الماعاندا گازعا قوسىلۋ قۇنى نەگە قىمبات, سونى ءتۇسىندىرىپ بەرىڭىزدەرشى؟» دەپ سۇرادى ب.يساباەۆ. وعان زالدا وتىرعان «دات كونتينەنتال» جشس وكىلى الماس سماعۇلوۆ جيىنتىقتاردىڭ, سونىڭ ىشىندە قۇبىر باعاسىنىڭ وسۋىنە بايلانىستى ەكەنىن جەتكىزدى.
«ال ءبىز پروبلەماعا باسقا قىرىنان قارايمىز. ارينە, قازاندىقتىڭ, جيىنتىقتاردىڭ باعاسى وسكەنىن تۇسىنەمىز. بىراق گازعا قوسۋ جۇمىستارىنىڭ باعاسىن قولدان وسىرۋگە بولمايدى. سمەتالىق ەسەپتەرگە سايكەس ول قازاندىق پەن جيىنتىقتاردى قوسپاعاندا 170 مىڭ تەڭگەدەن اسپاۋى كەرەك. تۇرعىندارعا ادىلەتتى باعا ۇسىنىلۋى كەرەك. ولاي بولماعان جاعدايدا قالانى گازداندىرۋ جۇمىسى «جەتىسۋ گاز سەرۆيس» مكك-عا بەرىلەتىن بولادى. وعان قوسا «قازترانسگازايماق» اق حالىققا كورسەتەتىن قىزمەت مەحانيزمدەرى مەن مەرزىمدەرىن جەدەل تۇردە قايتا قاراۋعا ءتيىس. ويتكەنى كومپانيا تاراپىنان ءىستى سوزباققا سالعان جاعدايلار از ەمەس. رۇقسات الۋ پروتسەدۋراسى 3-4 ايعا سوزىلىپ كەتەدى, مۇندايعا جول بەرۋگە بولمايدى», دەدى ب.يساباەۆ.
وسى رەتتە قالا اكىمى اسەت ماساباەۆ پەن باسەكەلەستىكتى قورعاۋ مەن دامىتۋ دەپارتامەنتىنە ءتيىستى تاپسىرمالار بەردى. سونداي-اق قالا اكىمىنە «قازترانسگازايماق» اق-مەن بىرلەسىپ, قولدانىستاعى گاز قۇبىرلارىنىڭ تەحنيكالىق جاعدايىن تەكسەرۋ مەن دياگنوستيكالاۋ جۇمىستارىن جىلدام اياقتاۋدى مىندەتتەدى. قازىر گازدىڭ مولشەردەن از بولۋى ءجيى بايقالادى. تۇرعىندار قاقاعان قىستا ۇيدەن جىلۋ قاشا ما دەپ الاڭدايدى. ەگەر قۇرىلىس جۇمىستارىنىڭ ساپاسىز اتقارىلۋ فاكتىسى راستالعان جاعدايدا مەردىگەر كومپانيالارعا تالاپ قويىلماق. بۇل تىزىمدە «مۆك-قۇرىلىس», «اقنيەت-بن», «تۋرگاز» جشس-لارى بار.
جەتىسۋ وبلىسى اكىمىنىڭ ءباسپاسوز قىزمەتىنىڭ مالىمەتىنە سۇيەنسەك, قاراشا ايىنىڭ سوڭىنا دەيىن ء«ۇيتاس» ساياجايىنا, «ەكسپەديتسيا» جانە «يجس 3-بولىمشە» تۇرعىن ءۇي الاپتارىنا كوپتەن كۇتكەن كوگىلدىر وتىن بەرىلەدى. سونداي-اق كەلەر جىلى «جاستار-2» تۇرعىن ءۇي الابى مەن (295 ملن تەڭگەگە) ىنتىماق ەلدى مەكەنىندە (1,4 ملرد تەڭگەگە) جۇرگىزىلىپ جاتقان گاز قۇبىرىنىڭ قۇرىلىسى اياقتالادى. سول سياقتى 2023 جىلدىڭ ءىى توقسانىندا قالانى گازداندىرۋدىڭ نەگىزگى جوباسىنا كىرمەگەن ۋچاسكەلەردە گاز تاراتۋ جەلىسىنىڭ قۇرىلىسى باستالادى. اتاپ ايتقاندا, بۇل جۇمىستار 6, 7-شاعىن اۋدانداردا, «پلودوپيتومنيك», «اگروپرومىشلەننيك», «جاستار-1/1» تۇرعىن ءۇي الاپتارىندا, مويناق اۋىلىندا اتقارىلادى.
«مەنىڭ تاپسىرماممەن قالعان 8 ەلدى مەكەنگە, ناقتىراق ايتقاندا «المالى», «اششىبۇلاق», «مەرەكەلىك», «سارىبۇلاق», «قىزىل تاس», «بالىقتى», «قاراتال» ساياجايلارىنا جانە «يجس 1-بولىمشە» تۇرعىن ءۇي الابىنداعى قۇرىلىس جۇمىستارىنا قاتىستى جوبالىق-سمەتالىق قۇجاتتارعا قاجەتتى ەسەپتەۋلەر جاسالىپ جاتىر. ءسويتىپ, 2025 جىلى قالانىڭ ەلدى مەكەندەرىنىڭ بارلىعى گازداندىرىلادى», دەدى ب.يساباەۆ.
جالپى, وبلىس ورتالىعىنا گاز 2017 جىلى جەتكىزىلگەن. قازىرگى كەزدە قالانى گازداندىرۋ جۇمىستارى نەگىزىنەن اياقتالدى. كوگىلدىر وتىنعا تۇرعىنداردىڭ 90 پايىزىنىڭ قوسىلۋىنا مۇمكىندىك جاسالعان.
جەتىسۋ وبلىسى
