ءبىرىنشىسى – قاتار مەن ەكۆادور اراسىنداعى ماتچ 2:0 ەسەبىمەن وڭتۇستىك امەريكادان كەلگەن كوماندانىڭ جەڭىسىمەن اياقتالعانى بەلگىلى. ەگەر تاريحقا جۇگىنسەك, جارىس قوجايىندارى بۇعان دەيىنگى الەم چەمپيوناتتارىنىڭ بىردە-ءبىر تۇساۋكەسەر كەزدەسۋىندە ۇتىلماعان. وسىعان دەيىنگى باسەكەلەردىڭ16-سىندا الاڭ يەلەرى باسىمدىق تانىتسا, التاۋى تەڭ ەسەپپەن اياقتالعان. ال جولى بۇل سول ستاتيستيكا بۇزىلىپ, قاتار ءوز جەرىندە قارسىلاسىنا ەسە جىبەردى. ەكىنشىسى – ءدال سول ويىندا العاشقى گول 11 مەترلىك نۇكتەدەن قاقپاعا ەندى. بۇعان دەيىنگى جارىستاردىڭ ەشقايسىسىندا العاشقى گول پەنالتيدەن سوعىلماعان ەدى. ءۇشىنشىسى – انگليا مەن يران اراسىنداعى كەزدەسۋ 117 مينۋتقا سوزىلدى. يران قۇراماسىنىڭ قاقپاشىسى اليرەزا بەيرانۆاندتىڭ جاراقات الۋىنا بايلانىستى تورەشى ءبىرىنشى تايمعا باقانداي 14 مينۋت قوستى. ەكىنشى تايمنىڭ نەگىزگى ۋاقىتى اياقتالعاننان كەيىن قوس كوماندا تاعى 13 مينۋت وينادى. ال ونىڭ الدىنداعى قاتار مەن ەكۆادور اراسىنداعى ماتچ 100 مينۋتقا سوزىلعان ەدى.
اقش پەن ۋەلس اراسىنداعى باسەكە 1:1 ەسەبىمەن اياقتالعانى بەلگىلى. امەريكالىقتاردىڭ ساپىندا تيموتي ۆەا گول سوقتى. ونىڭ اكەسى دجوردج ۆەا كەزىندە تەڭبىل دوپتىڭ تەڭدەسسىز شەبەرى بولعان. ول ليبەريا قۇراماسى ساپىندا ونەر كورسەتىپ, ءۇش رەت افريكانىڭ ەڭ ۇزدىك فۋتبولشىسى اتاندى. 1995 جىلى «التىن دوپتى» يەلەندى. ۆەا – قارا قۇرلىق فۋتبولىنىڭ تاريحىنداعى وسىنداي اتاققا قول جەتكىزگەن تۇڭعىش جانە ازىرگە جالعىز ويىنشى. ءوزىنىڭ سپورتتىق كارەراسىندا دجوردج پسج, «ميلان», «چەلسي» سەكىلدى بەلدى كلۋبتاردا ويناپ, كوپتەگەن بيىك بەلەستى باعىندىردى. ۇلكەن سپورتپەن قوشتاسقاننان كەيىن ساياساتپەن اينالىستى. 2017 جىلى ول ليبەريانىڭ پرەزيدەنتى بولىپ سايلاندى. ونىڭ ۇلكەن ۇلى دا فۋتبولشى. كىشى دجوردج ۆەا اقش قۇراماسى ساپىندا ەكى ويىن وتكىزىپ, ەۋروپانىڭ بىرقاتار كلۋبىنىڭ نامىسىن قورعادى. ال تيموتي ۆەانىڭ ءوزى 2000 جىلدىڭ 22 اقپانىندا اقش-تىڭ نيۋ-يورك قالاسىندا دۇنيەگە كەلدى. ول فرانتسيانىڭ پسج-سى مەن شوتلانديانىڭ «سەلتيگىندە» ويناپ, 2019 جىلى ء«ليللدىڭ» جەيدەسىن كيدى. بىلتىر تيموتي فرانتسيا چەمپيونى اتانىپ, ەل سۋپەركۋبوگىن يەلەندى. 2018 جىلدان بەرى ۆەا اقش-تىڭ ۇلتتىق قۇراماسى ساپىندا ونەر كورسەتەدى.
نەمىستەردىڭ Transfermarkt ۆەب-سايتى بۇل كۇندەرى فۋتبولدان قاتاردا ءوتىپ جاتقان الەم چەمپيوناتىنداعى ەڭ قىمبات ۇلتتىق قۇراما كوماندالاردىڭ ءتىزىمىن جاريالادى. ۇزدىكتەر كوشىن انگليا قۇراماسى باستاپ تۇر. اعىلشىنداردىڭ بارلىق ويىنشىنىڭ جالپى قۇنى – 1,26 ميلليارد ەۋرو. سولاردىڭ اراسىنداعى ەڭ قۇندىسى – فيل فودەن. 22 جاستاعى «مانچەستەر ءسيتيدىڭ» جارتىلاي قورعاۋشىسى 110 ميلليون ەۋروعا باعالانىپ وتىر. ودان كەيىنگى ساتىلارعا دجۋد بەللينگەم (100 ميلليون), باكايو ساكا مەن حارري كەين (90 ميلليون), دەكلان رايس (80 ميلليون), مەيسون ماۋنت (75 ميلليون), راحيم ستەرلينگ, دجەك گريليش جانە ترەنت الەكساندەر-ارنولد (70 ميلليون) سىندى تەڭبىل دوپ شەبەرلەرى جايعاستى. ەكىنشى جانە ءۇشىنشى ورىنداردا – برازيليا مەن فرانتسيا. بۇل مەملەكەتتەردىڭ فۋتبولشىلارى 1,14 جانە 1,03 ميلليارد شاماسىندا. برازيليانىڭ بەتكەۇستارى ۆينيسيۋس جۋنيور 120 ميلليونعا باعالانسا, فرانتسۋزداردىڭ ءدۇلد ۇلى كيليان مباپپەنىڭ ترانسفەرلىك قۇنى 160 ميلليون ەۋرونى قۇراپ وتىر. سونداي-اق توپ-10 كوماندانىڭ قاتارىندا پورتۋگاليا (€ 937 ملن), گەرمانيا (€ 886 ملن), يسپانيا (€ 872 ملن), ارگەنتينا (€ 645 ملن), نيدەرلاند (€ 587 ملن), بەلگيا (€ 563 ملن) جانە ۋرۋگۆاي (€ 450 ملن) قۇرامالارى بار.
ايگىلى NBC Sports سايتى الەمدىك دوپ دوداسىنىڭ ەڭ ۇزدىك ويىنشىلارىنىڭ رەيتينگىن جاريالادى. بۇل تىزىمدە ليونەل مەسسي كوش باستاپ تۇر. 35 جاستاعى ارگەنتينا قۇراماسىنىڭ سۇرمەرگەنى ءوز ەلىنىڭ ۇلتتىق قۇراماسى ساپىندا سوناۋ 2005 جىلدان بەرى ونەر كورسەتىپ كەلەدى. سول ارالىقتا ول 165 رەت جاسىل الاڭعا شىعىپ, 91 گولدىڭ اۆتورى اتاندى. ەكىنشى ورىندا – كيليان مباپپە. 23 جاستاعى فرانتسيانىڭ جۇلدىزى العاش رەت 2017 جىلى ۇلتتىق كوماندانىڭ جەيدەسىن كيگەن ەدى. بەس جىل ارالىعىندا ول 58 ويىنعا قاتىسىپ, 28 رەت قارسىلاستار قاقپاسىن ءدال كوزدەدى. ءۇشىنشى ساتىعا كەۆين دە بريوينە جايعاستى. 31 جاستاعى جارتىلاي قورعاۋشىنىڭ بەلگيا قۇراماسى ساپىندا ويناپ جۇرگەنىنە 12 جىلدان استى. سول كەزدەن بەرى 92 ماتچتا الاڭعا شىققان ول 25 مارتە مەرگەندىك تانىتتى. سونداي-اق توپ-10 فۋتبولشىنىڭ قاتارىندا كارىم بەنزەما (فرانتسيا), نەيمار (برازيليا), حارري كەين (انگليا), ساديو مانە (سەنەگال), اليسسون (برازيليا), روبەرت لەۆاندوۆسكي (پولشا) جانە ۆينيسيۋس جۋنيور (برازيليا) سىندى ساڭلاقتار بار. ال پورتۋگاليانىڭ اتاقتى ويىنشىسى كريشتيانۋ رونالدۋ 11-ساتىعا جايعاستى.
