ۇكىمەتتىڭ كەزەكتى وتىرىسىن اشا وتىرىپ, ءاليحان سمايىلوۆ ورتالىق سايلاۋ كوميسسياسىنىڭ الدىن الا قورىتىندىسى بويىنشا قاسىم-جومارت كەمەل ۇلى توقاەۆ ايقىن باسىمدىقپەن جەڭىسكە جەتكەنىن ايتتى.
ونىڭ كانديداتۋراسىن پارلامەنتتىك پارتيالار مەن ءىرى قوعامدىق ۇيىمداردى بىرىكتىرگەن حالىقتىق كواليتسيا ۇسىنعان بولاتىن جانە قازاقستان حالقى جاپپاي ءوز قولداۋىن ءبىلدىردى.
«ۇكىمەتتىڭ الداعى جەتى جىلداعى نەگىزگى مىندەتى – سايلانعان مەملەكەت باسشىسىنىڭ سايلاۋالدى باعدارلاماسىن ساپالى ىسكە اسىرۋ. ەكونوميكادا, الەۋمەتتىك سالادا جانە وڭىرلىك ساياساتتاعى تۇبەگەيلى وزگەرىستەر وسى سايلاۋالدى باعدارلامانىڭ نەگىزى بولماق. بارلىق مەملەكەتتىك ورگاندار مەن ۆەدومستۆولار وسى ماقسات ءۇشىن, ياعني ادىلەتتى قازاقستان قۇرۋ جولىندا حالىقتىڭ مۇددەسىنە ساي كۇش بىرىكتىرىپ, جۇمىلا ەڭبەك ەتۋى ءتيىس. ءبىز الەۋمەتتىك-ەكونوميكالىق ماسەلەلەردى شەشۋگە باعىتتالعان بارلىق ستراتەگيالىق قۇجاتتاردىڭ, باعدارلامالار مەن جوبالاردىڭ ناقتى ىسكە اسۋىن قامتاماسىز ەتۋىمىز كەرەك. ۇكىمەتتىڭ جۇمىسى نەگىزىنەن ەكونوميكانى دەمونوپوليزاتسيالاۋعا, كاسىپكەرلىك قىزمەتتى ىنتالاندىرۋعا جانە ازاماتتاردىڭ تابىسىن ارتتىرۋعا, ءبىلىم بەرۋ مەن دەنساۋلىق ساقتاۋ جۇيەلەرىن جاڭعىرتۋعا جانە حالىقتىڭ تابىسىن ارتتىرۋعا باعىتتالادى», دەدى ءاليحان سمايىلوۆ.
