ۇيىرمەنىڭ اشىلۋىنا «تەڭ مۇمكىندىكتەر الەمى» قوعامدىق قورى مۇرىندىق بولىپ وتىر. قور ديرەكتورى نۇرگۇل ۇلجەكوۆانىڭ ايتۋىنشا, بۇل ويىن وزدىگىنەن ءجۇرىپ-تۇرۋى قيىن مۇمكىندىگى شەكتەۋلى بالالاردىڭ ومىرگە دەگەن قۇلشىنىسىن وياتىپ, وڭالىپ كەتۋىنە سەپتىگىن تيگىزەدى.
– ەلىمىزدە ەرەكشە بالالارعا ارنالعان اداپتيۆتىك سپورت سەكتسيالارىنىڭ جۇمىسى جاقسى جاندانىپ كەلەدى. كەمتارلىعى بار بالالار مەن جاستاردى بەلسەندى ومىرگە بەيىمدەيتىن «سالاماتتى بولاشاق» الەۋمەتتىك جوباسى قوستاناي وبلىسىندا دا جۇزەگە اسىرىلا باستادى. باستى ماقسات – بالانى سپورتقا قىزىقتىرۋ ارقىلى ورتاعا بەيىمدەۋ, بەلسەندى قيمىل-قوزعالىسىن قالىپتاستىرۋ. بوچچامەن اينالىسقان بالانىڭ بۇلشىق ەتتەرى جاقسى داميدى. كەلەسى جىلى اقپان ايىندا وسى سپورت تۇرىنەن وبلىستىق جارىس ۇيىمداستىرۋدى جوسپارلاپ وتىرمىز, – دەيدى ن.ۇلجەكوۆا.
بوچچا ۇيىرمەسىنە ەرەكشە قاجەتتىلىكتەرى بار 30-دان استام بالا تەگىن قاتىساتىن بولادى. جاڭا ۇيىرمەدەن اتا-انالار دا ءۇمىت كۇتەدى.
– ۇيىرمەنىڭ اشىلاتىنىن ەستىگەندە قاتتى قۋاندىم. قانشا دەگەنمەن بۇل جەردە بالامنىڭ دامۋىنا قاجەتتى جاعداي بار عوي, – دەيدى يۋري ەسىمدى ەرەكشە بالانىڭ اناسى مارينا حيميچۋك.
قوستانايدا تىرەك-قيمىل اپپاراتى زاقىمدانعان 250-دەن استام بالا بار.
قوستاناي وبلىسى
