بۇل – ازيا قۇرلىعىندا ءوتىپ جاتقان ەكىنشى الەمدىك دوپ دوداسى. العاش رەت 2002 جىلعى جارىستى جاپونيا مەن وڭتۇستىك كورەيا قابىلداعان بولاتىن. مىنە, سودان كەيىن اراعا 20 جىل سالىپ, مۋنديال قايتا سارى قۇرلىقتا وتۋدە. دەسەك تە, بۇل – اراب مەملەكەتىندە جالاۋى جەلبىرەگەن تۇڭعىش بايراقتى باسەكە. ونى ۇيىمداستىرۋ ءىس-شارالارىنا 200 ميلليارد اقش دوللارىنان اسا قاراجات جۇمسالدى. بۇعان دەيىنگى الەم چەمپيوناتتارىندا ءدال وسىنداي مول كولەمدە قارجى جۇمسالماعان ەدى.
الەم چەمپيوناتى العاش رەت كۇز ايلارىنىڭ اياعى مەن قىستا ءوتىپ جاتىر. ويتكەنى جازدا قاتاردا اۋانىڭ تەمپەراتۋراسى 50 گرادۋسقا دەيىن كوتەرىلەدى. سول سەبەپتى ونداي اپتاپ ىستىقتا دوپ تەبۋ مۇلدەم مۇمكىن ەمەس. ال قاراشا مەن جەلتوقسان ايلارىندا تەرمومەتر ءتىلى 20,8-25,4 گرادۋستى كورسەتەدى.
قاتاردا 32 مەملەكەتتىڭ ۇلتتىق قۇرامالارى ءوزارا شەبەرلىك بايقاسۋدا. ولار ءتورت-تورتتەن سەگىز توپقا ءبولىندى. ءار توپتان ۇزدىك شىققان ەكى كوماندا پلەي-وففقا جولداما الادى. توپتىق تۋرنير 20 قاراشا مەن 2 جەلتوقسان ارالىعىندا وتەدى. 1/8 فينالدىق سايىستاردى 3-6 جەلتوقسان ارالىعىندا تاماشالايمىز. شيرەك فينالعا شىققاندار 9-10 جەلتوقساندا ءوزارا كۇش سىناسادى. جارتىلاي فينالدىق باسەكەلەردى 13 جانە 14 جەلتوقساندا كورەمىز. 17 جەلتوقساندا دوحاداعى «حاليفا» ستاديونىندا قولا جۇلدەگەر انىقتالادى. ال باس جۇلدە ءۇشىن تارتىس 18 جەلتوقساندا لۋسيالداعى «ۇلتتىق ستاديوندا» وتەدى.
بيىلعى الەم چەمپيوناتىنىڭ جۇلدە قورى 440 ميلليون اقش دوللارىن قۇراپ وتىر. باس جۇلدەنى ولجالاعان كوماندا 42 ميلليون السا, فينالدا ۇتىلعانى 30 ميلليوندى ەنشىلەيدى. قولا جۇلدەگەرگە 27 ميلليون تابىس ەتىلسە, ءتورتىنشى ورىنعا تۇراقتاعانعا 25 ميلليون تيەسىلى بولادى. شيرەك فينالعا شىققاندار 17 ميلليوننان السا, پلەي-وففتىڭ العاشقى كەزەڭىندە سۇرىنگەندەردىڭ ەسەپشوتىنا 13 ميلليون اۋدارىلادى. اتالعان جارىسقا قاتىسقانى ءۇشىن عانا كوماندالارعا 9 ميلليوننان بەرىلسە, دايىندىق جۇمىستارىنا تاعى 1,5 ميلليون بولىنەدى. سونىمەن قاتار فيفا ءوز ويىنشىلارىن مۋنديالعا جىبەرگەن كلۋبتارعا وتەماقى رەتىندە قوسىمشا 209 ميلليون تولەۋدى قاراستىرىپ وتىر. وسى شىعىننىڭ بارلىعىن قوسا ەسەپتەگەندە, بۇل سوما 1 ميلليارد دوللاردان اسادى.
بۇعان دەيىنگى الەم چەمپيوناتتارىندا قاتىسۋشىلارعا مىناداي سومادا قاراجات تولەنگەن: 2018 جىل – 791 ميلليون, 2014 – 576 ميلليون, 2010 جىل – 420 ميلليون, 2006 – 282 ميلليون, 2002 – 156 ميلليون جانە 1998 – 103 ميلليون اقش دوللارى.
دۇنيەجۇزىلىك دوپ دوداسىندا ميۋنحەننىڭ «باۆارياسىنىڭ» 17 ويىنشىسى جاسىل الاڭعا شىعادى. تارقاتىپ ايتساق, مانۋەل نويەر, لەون گورەتسكا, سەرج گنابري, لەروي زانە, دجامال مۋسيالا, يوزۋا كيمميح جانە توماس ميۋللەر گەرمانيانىڭ نامىسىن قورعايدى. فرانتسيانىڭ قۇرامىندا ميۋنحەندىك كلۋبتىڭ ءتورت فۋتبولشىسى وينايدى. ولار – لۋكاس ەرناندەس, دايو يۋپامەكانو, بەنجامەن پاۆار جانە كينگلي كومان. ال ەريك شۋپو-موتينگ كامەرۋننىڭ, الفونسو دەۆيس كانادانىڭ, يوسيپ ستانيشيچ حورۆاتيانىڭ, نۋسساير مازراۋي ماروككونىڭ, ماتتەيس دە ليگت نيدەرلاندتىڭ جانە ساديو مانە سەنەگالدىڭ ساپىندا ونەر كورسەتەدى. سونىمەن قاتار قاتارعا «مانچەستەر سيتي» مەن «بارسەلونانىڭ – 16, «مانچەستەر يۋنايتەدتىڭ» – 14 جانە «رەالدىڭ» 13 ويىنشىسى كەلدى.
بيىلعى الەم چەمپيوناتىندا ونەر كورسەتەتىن ەڭ ۇلكەن ويىنشى – 40 جاستاعى قاقپاشى الفرەدو تالاۆەرا. ول 1982 جىلدىڭ 18 قىركۇيەگىندە مەكسيكانىڭ حاليسكو شتاتىنداعى لا-باركا قالاسىندا دۇنيەگە كەلدى. «گۆادالاحارا» اكادەمياسىنىڭ تۇلەگى 2011 جىلى ءوز ەلىنىڭ ۇلتتىق قۇراما كومانداسىنىڭ ساپىنا قابىلداندى. سول كەزدەن بەرى 33 رەت جاسىل الاڭعا شىعىپ, 18 دوپ جىبەرىپ الدى. سونداي-اق «قارت» ويىنشىلاردىڭ قاتارىندا 39 جاستاعى كانادالىق اتيبا حاتچينسون (08.02.1983), پورتۋگاليالىق پەپە (26.08.1983), جاپونيالىق كاۆاسيما (20.03.1983) جانە برازيليالىق داني الۆەس (06.05.1983) سىندى ساڭلاقتار بار.
قاتارداعى ەڭ جاس ويىنشىلاردىڭ كوشىن 20 قاراشادا 18 جاسقا تولعان يۋسسۋفا مۋكوكو باستاپ تۇر. ول كامەرۋندا دۇنيەگە كەلگەنىمەن, بالالىق شاعى گەرمانيادا ءوتتى. جاسوسپىرىمدەر مەن جاستار بۋىنى اراسىنداعى جارىستاردا جاسىنداي جارقىلداعان شابۋىلشى بۇل كۇندەرى دورتمۋندتىڭ «بورۋسسياسى» ساپىندا ونەر كورسەتەدى. بۇل جىگىتكە بۋندەسليگاداعى كوپتەگەن رەكورد تيەسىلى. ۇستىمىزدەگى جىلدىڭ 16 قاراشاسىندا ومانعا قارسى جولداستىق كەزدەسۋدە مۋكوكا العاش رەت گەرمانيانىڭ ۇلتتىق قۇراماسى ساپىندا الاڭعا شىقتى. سونداي-اق ەڭ جاس ويىنشىلاردىڭ تىزىمىنە 18 جاستاعى اۋستراليالىق گارانگ كۋول (15.09.2004), يسپانيالىق گاۆي (6.08. 2004), كوستاريكالىق دجەۆيسون بەننەتت (15.06.2004) جانە ماروككولىق ءبىلال ءال-گاننۋس (10.05.2004) سىندى سايىپقىراندار ەنىپ وتىر.
