بارشا قازاقستاندىقتى قاسىم-جومارت توقاەۆتىڭ سەنىمدى جەڭىسىمەن قۇتتىقتايمىن! مۇنداي جوعارى ناتيجە پرەزيدەنتتىڭ ادىلەتتى دە قۋاتتى قازاقستاندى قۇرۋ باعىتىنىڭ ەلىمىزدىڭ بارشا ازاماتىنىڭ باسىن بىرىكتىرىپ, قوعام ءۇمىتىن تولىق اقتاعانىن كورسەتەدى.
رەسپۋبليكالىق قوعامدىق شتاب مۇشەلەرى بارلىق ءوڭىر حالقىمەن كەزدەستى. 3 ملن سايلاۋشىنى قامتىعان 24 مىڭنان استام ۇگىت-ناسيحات ءىس-شاراسى وتكىزىلدى. بارلىق سالادا قازاقستاندىقتاردىڭ قاسىم-جومارت توقاەۆتى جانە ونىڭ رەفورمالار باعىتىن بەلسەندى تۇردە قولدايتىنى بايقالدى. كوپشىلىك ونىڭ حالىقارالىق دەڭگەيدەگى سارابدال ساياساتى مەن قاڭتار وقيعاسى كەزىندەگى باتىل ارەكەتتەرىن اتاپ ءوتتى.
ازاماتتار بەلسەندىلىك تانىتىپ, سۇراقتارىن قويىپ, ءوز پىكىرلەرىن اشىق ءبىلدىردى. حالىقتىڭ ناقتى وزگەرىستەر كۇتەتىنى جانە وعان وزدەرى اسەر ەتۋگە نيەتتى ەكەندەرى سەزىلىپ تۇردى. تۇرعىندار ساۋالىنىڭ باسىم بولىگى قاسىم-جومارت توقاەۆتىڭ سايلاۋالدى باعدارلاماسىندا قامتىلعان. ول كوپتەگەن وزەكتى الەۋمەتتىك ماسەلەنى شەشەدى جانە ونداعى ءاربىر ءىس-شارا ناقتى ەسەپتەلىپ, قارجىلاي قامتاماسىز ەتىلگەن.
باعدارلامانىڭ ارقاسىندا ءبىز الداعى 7 جىلدا ەل قالاي داميدى, حالىقتىڭ تۇرمىسى قالاي جاقسارادى دەگەن قوعامنىڭ باستى سۇراعىنا جاۋاپ بەرە الدىق.
2022 جىلدىڭ 20 قاراشاسىندا تاۋەلسىز قازاقستاننىڭ دامۋىنداعى جاڭا كەزەڭ باستالدى. پرەزيدەنتىمىز قاسىم-جومارت كەمەل ۇلى توقاەۆتىڭ باسشىلىعىمەن ءبىز العا قويعان بارلىق ماقساتقا بىرگە جەتەتىنىمىزگە سەنىمدىمىن!
قازاقستان حالقى ءوز تاڭداۋىن جاسادى! ەندى بىزگە تەك جۇمىس ىستەۋ كەرەك!
ەرلان قوشانوۆ,
ءماجىلىس توراعاسى
