ەلىمىزدە تەرروريزمگە قارسى ورتالىق 2003 جىلدىڭ 29 جەلتوقسانىندا قۇرىلدى. بۇل ورتالىقتىڭ نەگىزگى مىندەتتەرى – تەرروريزممەن كۇرەستى تىكەلەي ىسكە اسىراتىن مەملەكەتتىك ورگانداردىڭ, سونداي-اق تەرروريستىك جانە وزگە دە ەكسترەميستىك بەلگىلەرگە قارسى ءىس-ارەكەت ەتۋ سالاسىنداعى مۇددەلى مينيسترلىكتەر مەن ۆەدومستۆولاردىڭ قىزمەتىن ۇيلەستىرۋ, سونداي-اق تەرروريستىك جانە وزگە دە ەكسترەميستىك قاۋىپ-قاتەرلەر جانە بەلگىلەر تۋرالى اقپاراتتى جيناۋ, رەتتەۋ, تالداۋ جانە ساراپتاۋ بولىپ سانالادى.
ورتالىق ماماندارىنا جۇكتەلگەن مىندەتتەردىڭ تاعى ءبىرى – تەرروريزمگە قارسى قىزمەتتىڭ كونتسەپتۋالدى ەرەجەلەرى مەن باعدارلامالارىن, تەرروريستىك جانە وزگە دە ەكسترەميستىك اكتسيالاردىڭ الدىن الۋ جانە جولىن كەسۋ جوسپارلارىن ازىرلەۋ. سونىمەن قاتار مۇندا ارناۋلى تەرروريزمگە قارسى بولىمشەلەردىڭ جەكە قۇرامىن كاسىبي دايارلاۋدى ۇيلەستىرۋ جانە ادىستەمەلىك قامتاماسىز ەتۋگە دە باسىمدىق بەرىلەدى. تەرروريزممەن كۇرەس ماسەلەلەرىمەن اينالىساتىن حالىقارالىق ورتالىقتار جانە ۇيىمدارمەن جۇمىس بايلانىستارىن ورناتۋ جانە ۇستانۋ ماسەلەسى دە نازاردان تىس قالعان ەمەس. تەرروريزم جانە ەكسترەميزمنىڭ وزگە دە بەلگىلەرىمەن كۇرەس ماسەلەلەرىن قوزعايتىن نورماتيۆتىك-قۇقىقتىق اكتىلەر جوبالارىن دايىنداۋعا بىلىكتى, تاجىريبەلى ماماندار جۇمىلدىرىلىپ كەلەدى.
ەلىمىزدەگى تەرروريزم قاۋىپ-قاتەرىن جان-جاقتى زەردەلەپ جۇرگەن وتاندىق ساياساتتانۋشىلار دا از ەمەس. ولاردىڭ دەنى تەرروريزم قاۋپىن دۇرىس باعالاماي, ونى ەلەمەي جانە جەكەلەي الىنعان ەلدە قاۋىپتىڭ ءوزىن جوققا شىعارۋعا بولمايتىنىن ايتادى. «بىراق تەرروريزمدى اسىرا باعالاۋدىڭ دا قاجەتى جوق. قوعامدا دۇربەلەڭ سالىپ, ۇرەي مەن قورقىنىش ۇيالاتىپ, قوعامدىق رەزونانس اسەرىن كۇشەيتۋ ارقىلى تەرروريستەرگە قولداۋ كورسەتۋگە بولمايدى, سەبەبى كەز كەلگەن تەراكت, ەڭ الدىمەن, كەڭ اقپاراتتىق اسەرگە ەسەپتەلگەن. وسىنداي تەڭگەرىمدى ۇستاپ تۇرۋ قاۋىپسىزدىكتى قامتاماسىز ەتۋدىڭ ءتيىمدى جۇيەسىن قالىپتاستىرۋعا مۇمكىندىك بەرەدى. بىراق, ەڭ باستىسى, تەرروريزم, ەكسترەميزم سياقتى قاۋىپ-قاتەرگە توتەپ بەرىپ, ءتيىمدى قارسى تۇرۋدىڭ نەگىزگى شارتى – قوعام مەن بيلىكتىڭ ءوزارا كەلىسىمى, ۇلتتىق بىرلىك», دەيدى ماماندار.
تەرروريزمدى بولدىرماۋ, الدىن الۋدىڭ ەڭ وڭتايلى جولى – ورتالىق ازيا مەملەكەتتەرى ءدىني بىرلەستىكتەرمەن بىرلەسىپ, قوعامعا شىنايى ءدىننىڭ شاپاعاتى مەن تەرىس پيعىلدى ءدىني اعىمداردىڭ كەساپاتىن ءتۇسىندىرىپ, اراجىگىن اشىپ بەرۋ. ءار ازاماتتىڭ ءدىني ساۋاتتىلىعىن كوتەرۋ قاجەت. سونىمەن بىرگە حالقىمىزدىڭ دىنمەن ۇشتاسقان سالت-ءداستۇرىن ۇستانۋ اسا ماڭىزدى.
قايرات سالىقباەۆ,
تۇركىستان وبلىسى ءدىن ىستەرى باسقارماسىنىڭ ءبولىم باسشىسى
