ءاربىر بالانىڭ ءوز ارمانى بار. بالالاردىڭ ارمانى – ءبىزدىڭ ارمانىمىز. ۇلى دالا ۇرپاعىنىڭ ماڭگى جاساۋى ءۇشىن الدىنا قويعان ماقساتتارىنا قولداۋ كورسەتۋ قاجەت ەكەنىن ءبارىمىز بىلەمىز. سول سەبەپتەن ولاردىڭ ارمان-تىلەكتەرىن ورىنداۋ ەلىمىزدىڭ ءار ازاماتىنا پارىز بولىپ قالا بەرمەك. بابالار سالعان ءىزدى, سالت-ءداستۇردى, ءتالىم-تاربيەنى قايتادان تۇلەتىپ, دارا جول سالىپ بەرۋ دە مىندەت. جاڭا قازاقستان تاريحىنداعى جاڭا ءداۋىر ۇرپاقتارىن ادامي قاسيەتتەر مەن رۋحاني قۇندىلىققا تاربيەلەۋ, ارمان-تىلەكتەرىنە جەتۋلەرىنە اركەز سەبىمىزدى دە تيگىزگەنىمىز ءجون.
مەملەكەت باسشىسى قاسىم-جومارت توقاەۆتىڭ 2022 جىلدى «بالالار جىلى» دەپ جاريالاعانى بەكەر ەمەس. «مەن مەملەكەت باسشىسى رەتىندە وسكەلەڭ ۇرپاقتىڭ بولاشاعىنا باسا ءمان بەرەمىن. جاستارعا زور ءۇمىت ارتامىن. جاستارىمىز اتقارىلىپ جاتقان اۋقىمدى جۇمىستىڭ, رەفورمالاردىڭ يگىلىگىن مىندەتتى تۇردە كورەدى. ولاردىڭ اراسىندا كوزى اشىق, كوكىرەگى وياۋ, ويى ۇشقىر ازاماتار از ەمەس. ءبىز وسكەلەڭ ۇرپاققا جول اشۋ ءۇشىن بارلىق جاعدايدى جاساۋىمىز كەرەك», – دەگەن بولاتىن پرەزيدەنت.
ءدال وسى «بالالار جىلى» اياسىندا «Qazaqconcert» ۇجىمى كوپتەگەن جوبانى قولعا الدى. 1 ماۋسىم – حالىقارالىق بالالاردى قورعاۋ كۇنىنە وراي باستاۋ العان «جازعى كينو» جوباسى 2 ايدان استام ۋاقىت بويى وتكىزىلىپ تۇردى. بۇل جوبادا كوپبالالى, الەۋمەتتىك تۇرعىدان از قامتىلعان وتباسىلاردان شىققان, ەرەكشە كومەككە مۇقتاج بالالار مەن جاسوسپىرىمدەرگە بالالار ۇيىندەگى تاربيەلەنۋشىلەر شاقىرىلىپ, وتاندىق كينوتۋىندىلار مەن قازاقشا مۋلتفيلمدەر تەگىن كورسەتىلدى. «جازعى كينو» جوباسىنىڭ «قازاقفيلم» اق, «ۇلتتىق كينونى قولداۋ مەملەكەتتىك ورتالىعى» كەاق جانە استانا قالاسى اكىمدىگىمەن بىرلەسىپ جۇزەگە اسىرىلعانىن ايتا كەتۋ كەرەك. كوپتەگەن ۇستازدار مەن اتا-انالاردىڭ وتىنىشتەرى بويىنشا جوبا «جاس كينومان» رەتىندە ءوز جالعاسىن تاپتى.
ءار ءفيلمنىڭ كورسەتىلىمى الدىندا بالالارعا ارنالعان مەرەكەلىك شوۋ-باعدارلاما, اكتەرلىك قۇراممەن كەزدەسۋلەر مەن ءمۇسىنشى گيپەررەاليست ايدوس ەسماعامبەتوۆ, سۋرەتشى گۇلميرا تەلعوزيەۆا جانە كوستيۋمەر-ديزاينەر ساندۋعاش تولىمبەكتىڭ تانىمدىق شەبەرلىك ساعاتتارى, ەكسكۋرسيالار مەن جەكە كورمەلەرى ءجيى ۇيىمداستىرىلىپ تۇردى. اتاپ ايتقاندا, سۋرەتشىلەر وداعىنىڭ مۇشەسى شىمىربەك مەيىرىمنىڭ «عاجاپ الەم» جانە سۋرەتشى سەيسەنبى ايباردىڭ «Big dream books» باسپا ورتالىعىنىڭ كورمەلەرى كورەرمەندەر نازارىنا ۇسىنىلدى. سونىمەن قاتار بالالار كينو كورىپ قانا قويماي «اstana sazy» فولكلورلىق ءانسامبلىنىڭ ونەرپازدارى, «Astana musical» مەملەكەتتىك تەاترىنىڭ اكتەرلەرى جانە «قازاقكونتسەرت» ارتىستەرى ۇسىنعان ءتۇرلى كونتسەرتتىك ءىس-شارالاردى تاماشالادى.
جوبا اياسىندا ۇسىنىلعان وتاندىق تۋىندىلاردىڭ شىعارماشىلىق ۇجىمى قوناق رەتىندە كەلىپ, كورەرمەندەرمەن كەزدەسۋلەر وتكىزىپ وتىردى. اتاپ ايتساق, 1 ماۋسىم كۇنى بالالار نازارىنا ۇسىنىلعان «مەنىڭ اتىم قوجا» كوركەم ءفيلمىنىڭ كورسەتىلىمىنە قوجانىڭ ءرولىن سومداعان قازاقستاننىڭ ەڭبەك سىڭىرگەن قايراتكەرى, اكتەر, ستسەناريست, كينودراماتۋرگ نۇرلان سانجار, جاناردىڭ ءرولىن سومداعان گۇلنار قۇراباەۆا, «مەنىڭ اتىم قوجا» پوۆەسىن جازعان ايگىلى جازۋشى بەردىبەك سوقپاقباەۆتىڭ قىزى سامال سوقپاقباەۆا جانە فيلم رەجيسسەرى ابدوللا قارساقباەۆتىڭ ۇلى, رەجيسسەر توقتار قارساقباەۆ ءوز وتباسىمەن, «ەرتوستىك», «مۇزبالاق» انيماتسيالىق فيلمدەرىنىڭ كورسەتىلىمىنە وسى تۋىندىلاردىڭ رەجيسسەرى قاسيەت ساقيوللا, «كەنجە قىز» انيماتسيالىق ءفيلمىنىڭ يليۋستراتورى كاميلا جاكيانوۆا بالالارمەن كەزدەسىپ, ءوز تاجىريبەلەرىمەن ءبولىستى. «نارتاي» فيلمىندە باستى رولدەردى سومداعان اكتەر شاريپبەك زاكيروۆ جانە اكتريسا اننا ستارچەنكو كەلدى. مەملەكەتتىك اكادەميالىق كورەي مۋزىكالىق كومەديا تەاترىنىڭ مۋزىكالىق جەتەكشىسى, فيلم كومپوزيتورى تەن روديون ۆياچەسلاۆوۆيچ «نارتاي» ءفيلمىنىڭ ساۋندترەگىن كىشكەنتاي كورەرمەندەرىمىزگە ورىنداپ بەردى. « ۇلى دالا تاڭى» فيلمىندە جاس قاسىم حاننىڭ ءرولىن سومداعان تەاتر جانە كينو اكتەرى دانيار ۋرازاەۆ پەن التىنبيكە ءرولىن سومداعان جاس اكتريسا ديلناز ەرتاەۆا دا بالالارمەن جۇزدەستى.
سونداي-اق «پاراليمپيەتس» ءفيلمى دە كىشكەنتاي كورەرمەندەرىمىز ءۇشىن بىرنەشە رەت كورسەتىلدى. رەجيسسەر الديار بايراكيموۆ جانە ستسەناريست ۆەنەرا قايىرجانوۆا, باستى ءرولدى سومداعان اكتەر اسقار يلياسوۆ, ەكىنشى پلانداعى اكتەر جالعاس جانعازين, قويۋشى رەجيسسەر ازامات جانابەكوۆ جانە فيلم كومپوزيتورلارى ءادىلجان تولىقپاەۆ پەن شىرىن بازاركۇلوۆا دا بالالارمەن كەزدەسىپ, فيلم جايىندا ءوز ويلارىمەن ءبولىستى. كورسەتىلىم الدىندا كونتسەرتتىك زالدىڭ فويەسىندە «Saz and Soul» توبى ءوز رەپەرتۋارلارىنداعى اندەردى جانە فيلم ساۋندترەگىن ورىنداپ بەردى. وسى كينو تۋرالى ءبىر وقيعانى ايتقىم كەلىپ وتىر. «پاراليمپيەتس» ءفيلمى اياقتالعان سوڭ, مۇگەدەك ارباسىندا وتىرعان جاس كورەرمەن «مەن ەندى ەشقاشان مىنا اربادا وتىرمايمىن» دەپ, ورنىنان تۇرىپ, زالدان شىعىپ كەتە باردى. بارلىق جۇرت الگى بالاعا تاڭقالىپ, ۇزاق قاراپ تۇردى. كوردىڭىزدەر مە؟ وسىنداي ماعىنالى كينوتۋىندىلار ادامدارعا موتيۆاتسيا بەرەدى.
«جازعى كينو» كورسەتىلىمىنىڭ كورەرمەندەرى رەتىندە ەلوردامىزدىڭ مەكتەپتەرىندە ۇيىمداستىرىلعان «جازعى لاگەر» بالالارى, بالالار ءۇيىنىڭ تاربيەلەنۋشىلەرى, «مۇرا» اكتسيونەرلىك قوعامىنىڭ جانە استانا قالاسى اكىمدىگىنىڭ «نۇرلى جۇرەك» الەۋمەتتىك قىزمەت كورسەتۋ ورتالىعىنىڭ ينكليۋزيۆتى بالالارى, «التىن دومبىرا» ونەر مەكتەبى, «جاڭا بەلەس» مەكتەبى مەن «حاس ساق» سپورت ورتالىعىنىڭ بالالارى, ەلوردامىزدىڭ قوناقتارى جانە اتا-انالارى ءوز بالالارىمەن كەلدى. اتالعان جوبا بويىنشا ماۋسىم ايىنان بەرى 25 مىڭنان استام بالاعا وتاندىق كينوتۋىندىلار مەن مۋلتفيلمدەر تەگىن كورسەتىلدى. اتالمىش جوبا قىركۇيەك ايىندا باستالىپ, جىل سايىن جالعاسىن تابا بەرمەك.
سونىمەن قاتار «قازاقكونتسەرت» بالالاردى ونەرگە باۋلىپ, ولاردىڭ مادەني تالعامىن قالىپتاستىرۋ ماقساتىندا «بالالار فيلارمونياسى» اتتى جاڭا جوبانى باستادى. جوبا اياسىندا بۇلدىرشىندەر ءۇشىن 2022 جىلدىڭ ءار سەنبى كۇنى «قازاقكونتسەرتتىڭ» ايتۋلى ونەر ۇجىمدارى مەن تانىمال ارتىستەرى ءدارىس-كونتسەرتتەر, شەبەرلىك ساباقتار, ەكسكۋرسيالار وتكىزىپ, كاسىبي شەبەرلىكتەرىنىڭ سىرىمەن بولىسۋدە.
ءدال وسى ءۇردىستى جالعاستىرا وتىرىپ, «قازاقكونتسەرت» ۇجىمى «اstana Muzical» مەملەكەتتىك ميۋزيكل تەاترى بالالارعا ارنالعان «الدار كوسە» ميۋزيكلىن جەلتوقسان ايىندا كىشكەنتاي كورەرمەندەر نازارىنا ۇسىنعالى وتىر.
بالالار جىلى اياسىندا مۇمكىندىگى شەكتەۋلى بالالاردى قولداۋ ماقساتىندا جاقىندا «Qazaqconcert» مەملەكەتتىك كونتسەرتتىك ۇيىمى «ارمان اسۋلارى» فەستيۆالىنىڭ گالا-كونتسەرتىن دە وتكىزدى. ەلىمىزدىڭ بولاشاعى بالالاردىڭ ارمان-تىلەكتەرىن ورىنداۋ ءۇشىن وسىنداي ءبىر جوبانى قولعا العان جايىمىز بار. فەستيۆال بارىسىندا قازاقستاننىڭ بارلىق ايماقتارىنان ەرەكشە قاجەتتىلىكتەرى بار دارىندى بالالاردى جيناپ, ءبىر ارنادا, ءبىر باعىتتا ونەرلەرىن كورسەتۋلەرى ءۇشىن جاعدايلارىن جاساۋعا تىرىستىق. جوباعا قاتىسۋشى ونەرپازداردىڭ «بي ونەرى», «ۆوكالدىق ونەر», «اسپاپتا ورىنداۋ», ء«اندى ىم-يشارامەن ورىنداۋ» جانە «ۇلتتىق كيىم ديزاينى» جانرلارى بويىنشا كورسەتكەن ونەرلەرىنە ءتانتى بولدىق. وسى ءىس-شارانى وتكىزگەننەن كەيىن دە كوپتەگەن بالالار مەن اتا-انالاردان جانە ۇستازداردان جاقسى پىكىرلەر الدىق. ءار جىل سايىن وتكىزىپ تۇرۋ وتىنىشتەرىن دە ايتتى. گالا-كونتسەرتتە دارىندى بالالار روزا رىمباەۆا, ايجان نۇرماعامبەتوۆا, قۇرماش ماحان, ازامات جىلتىركوزوۆ, سالتانات مەڭدىعاليەۆا, الىبەك الماديەۆ, رۋحيا بايدۇكەنوۆا, ديدار ابدىحالىق, «استانا سازى» مەملەكەتتىك فولكلورلىق ءانسامبلى, «TURAN» فولكلورلى-ەتنوگرافيالىق ءانسامبلى, «مەلومەن» توبى, «Forte Trio», «Saz&Soul», ءادىلحان ماكين, گۇلدانا اكيموۆا (فلەيتا) سىندى «قازاقكونتسەرتتىڭ» سوليستەرى, تانىمال ونەر جۇلدىزدارى مەن شىعارماشىلىق توپتارىمەن بىرگە ساحناعا شىقتى. ورتا ازياداعى ەڭ العاشقى «قاناتتىلار» ينكليۋزيۆتى تەاترىنىڭ ارتىستەرى دە ءوز ونەرلەرىن ورتاعا سالدى. سونداي-اق «Qazaqstan» ورتالىق كونتسەرت زالىندا جاس ونەرپازداردىڭ بەينەلەۋ جانە ساندىك-قولدانبالى ونەر تۋىندىلارى قويىلدى.
فەستيۆالگە ەلىمىزدىڭ ءار وڭىرلەرىنەن كوپتەگەن جاس ونەرپازدار كەلدى. اتاپ ايتاتىن بولساق, تۇركىستان, شىمكەنت قالالارىنان, شىعىس قازاقستان, اباي, قاراعاندى, پاۆلودار, سولتۇستىك قازاقستان وبلىستارىنان, استانا قالاسىنداعى BINOM مەكتەبى مەن «نۇرلى جۇرەك» مەكتەپ-ينتەرناتىنان 150-گە جۋىق دارىندى بالالار قاتىستى. سونىمەن قاتار گالا-كونتسەرتتە XVII «BI جۇلدىزاي» فەستيۆالىنىڭ لاۋرەاتى رۋزاحمەت ۆاليەۆتىڭ ورىنداۋىندا «مەيىرىم كەرەك» اتتى جاڭا بەينەباياننىڭ تۇساۋكەسەرى ءوتتى.
قاي زاماندا بولسىن, قانداي قوعامدا بولسىن بالا تاربيەسى وزەكتى دە ماڭىزدى. ەڭ العاش شىر ەتىپ دۇنيەگە كەلگەننەن باستاپ, ءوز ءتىلىن, ءدىنىن, سالت-ءداستۇرىن, رۋحانياتىن, تاريحىن بالا ساناسىندا ورنىقتىرۋعا تىرىسۋىمىز كەرەك. ۇلتتىق تاربيە, ۇرپاق مادەنيەتى, مىنە, وسىدان باستالادى.
اقتوتى رايىمقۇلوۆا,
«روزا باعلانوۆا اتىنداعى «قازاقكونتسەرت» ديرەكتورى,
كومپوزيتور, قازاقستاننىڭ ەڭبەك سىڭىرگەن قايراتكەرى
