جوعارىدا ايتىلعان جاڭالىقتى قازاق ەلىنىڭ جانكۇيەرلەرى جىلى قابىلدادى. ويتكەنى ولار ءالي احمەدوۆتىڭ قارۋلى بوكسشى ەكەنىن جاقسى بىلەدى. ساعاتبەك مۇساحانوۆتاي مىقتى باپكەردەن ءتالىم-تاربيە العان الماتى وبلىسىنىڭ تۋماسى اۋەسقوي رينگتە بىرقاتار حالىقارالىق تۋرنيردە توپ جاردى. 81 كيلو سالماق دارەجەسىندە ستۋدەنتتەر اراسىندا الەم جانە ازيا چەمپيونى اتاندى. قازاقستان بىرىنشىلىگىندە جۇلدەگەرلەر قاتارىنان كورىندى. ريو وليمپياداسىنا بارۋدان ءۇمىتى دە بولدى. بىراق تورتجىلدىقتىڭ باستى دوداسىنا ونىڭ جولى تۇسپەدى. سودان احمەدوۆ كاسىپقوي رينگتە كۇش سىناسۋعا بەل بۋدى. تۇساۋكەسەر كەزدەسۋىن 2016 جىلى استانادا بەلورۋسسيالىق سەرگەي كراپشيلاعا قارسى وتكىزىپ, ونى ءبىرىنشى راۋندتا ۇرىپ جىقتى. ودان كەيىن قاتارىنان 15 كەزدەسۋدە جەڭىسكە جەتىپ, 12 قارسىلاسىن نوكاۋتقا جىبەردى.
2020 جىلدىڭ اياعىندا ءالي WBC-تىڭ التىن بەلبەۋى ءۇشىن تالاسۋ مۇمكىندىگىنە يە بولدى. اقش-تىڭ فلوريدا شتاتىنداعى حولليۆۋد قالاسىندا ول ءالى ەشكىمنەن جەڭىلىپ كورمەگەن ەكۆادورلىق كارلوس گانگورومەن (18-0, 13 كو) جۇدىرىقتاستى. باستاپقىدا ءبىزدىڭ بوكسشى باسىم كورىنگەن ەدى. وكىنىشكە قاراي, بۇل جەكپە-جەكتىڭ 12 راۋندىندا جەرلەسىمىز نوكاۋتپەن ۇتىلدى. دەسەك تە ودان كەيىن پەرۋلىق داۆيد زەگاررا, مەكسيكالىق گۋەستا پاۋل جانە امەريكالىق گابريەل روسادودان باسىم ءتۇسىپ, جاعدايىن قايتا جاقسارتتى. قازىرگى كەزدە احمەدوۆ الەمدەگى ەڭ بەلدى نۇسقالار بويىنشا مىناداي ورىندارعا جايعاستى: WBس – 10, IBF – 6, WBO – 13 ورىن.
27 جاستاعى ءالي احمەدوۆتىڭ كاسىپقوي رينگتەگى جيعان مول تاجىريبەسىن ەسكەرە وتىرىپ, WBC-تىڭ باسشىلىعى وعان تاعى ءبىر مۇمكىندىك بەرۋدى كۇپ كورىپ وتىر. ەگەر ساعاتبەك مۇساحانوۆتىڭ شاكىرتى فرانتسيالىق كريستيان ءم’بيلليدى جەڭسە, وندا اقش-تىڭ قوس ءدۇلد ۇلى – دەۆيد بەناۆيدەس (26-0, 23 كو) پەن كالەب پلانت (22-1, 13 كو) اراسىنداعى جەكپە-جەكتىڭ جەڭىمپازىمەن جۇدىرىقتاسادى. ال وسى تارتىستا باعى جانعان بوكسشى وسى سالماقتا ۇستەمدىك قۇرىپ, بارلىق نۇسقانىڭ چەمپيوندىق بەلبەۋىن يەلەنىپ وتىرعان مەكسيكانىڭ مارقاسقاسى ساۋل «كانەلو» الۆارەسپەن (58-2-2, 39 كو) ايقاسادى.
قازىرگى كەزدە مەيىرىم نۇرسۇلتانوۆ پەن قامشىبەك قوڭقاباەۆتىڭ دا جاعدايلارى جاقسى. ورتا سالماقتا باق سىناپ جۇرگەن 29 جاستاعى مەيىرىم نۇرسۇلتانوۆ WBO-نىڭ رەيتينگىندە 4 ورىندا تۇر. 31 جاستاعى قامشىبەك قوڭقاباەۆ WBA تىزىمىندە ءدال سول مەجەدەن كورىندى. ەكەۋى دە ازىرگە جەڭىلىسسىز كەلەدى. مەيىرىم 18 رەت جەڭىسكە جەتىپ, 10 كەزدەسۋىن مەرزىمىنەن بۇرىن اياقتادى. سونداي-اق ول WBC مەن IBF-ءتىڭ رەيتينگىندە سەگىزىنشى ورىنداردى يەلەنۋدە. قامشىبەك بەس باسەكەنىڭ بارلىعىندا باسىمدىق تانىتتى. اۋىر سالماقتا ايقاسىپ جۇرگەن ول ءتورت قارسىلاسىن ەسىنەن تاندىردى.
بەلدى نۇسقالار بويىنشا توپ-10-دىقتىڭ قاتارىندا ەۆگەني پاۆلوۆ (WBA-6), سۇلتان زاۋىربەك (WBA-8, WBO-10), سەرگەي ليپينەتس (WBC-8), جان كوسوبۋتسكي (WBA-9, WBC-10) جانە بەك نۇرماعانبەت (WBA-10) بار. سولاردىڭ اراسىنان كوسوبۋتسكيدىڭ رەكوردى وتە جاقسى. 34 جاستاعى ارقالىقتىڭ تۋماسى كەزىندە اۋەسقويلار اراسىندا قازاقستاننىڭ ءۇش دۇركىن چەمپيونى اتانىپ, دۇنيەجۇزىلىك ۋنيۆەرسيادادا كۇمىس مەدالدى موينىنا ءىلدى. ءتىپتى ونىڭ وليمپيا ويىندارى مەن الەم چەمپيوناتىندا جۇلدەگەرلەر قاتارىنان كورىنىپ, ازيانىڭ ءۇش دۇركىن چەمپيونى اتانعان ۆاسيلي لەۆيتتى ويسىراتا جەڭگەنىن دە كوزىمىز كوردى. مينسكىدە وتكەن «ا» دارەجەلى تۋرنيردە لوندون وليمپياداسىنىڭ قولا جۇلدەگەرى, ءۇش دۇركىن الەم چەمپيونى ماگومەدراسۋل مەدجيدوۆتىڭ ءوزىن قاپى قالدىردى. 2017 جىلى جان كاسىپقوي بوكسقا اۋىستى. سول بەس جىل ۋاقىت ارالىعىندا 19 باسەكە وتكىزىپ, بارلىعىن ءوز پايداسىنا شەشتى. ءبىر كەرەمەتى, ول 18 قارسىلاسىن ج ۇلىنداي ۇشىردى. سوڭعى رەت كوسوبۋتسكي ءالى دە جەڭىلىستىڭ كەرمەك ءدامىن تاتپاعان گەرمانيالىق حۋسسەين مۋحامەدتى ءۇشىنشى راۋندتا ەسىنەن تاندىردى. كەلەسى جىلدىڭ باسىندا وتانداسىمىز ارسلانبەك ماحمۋدوۆپەن جۇدىرىقتاسادى. رەسەيدىڭ موزدوك قالاسىندا تۋىپ-وسكەن قۇمىق جىگىتىنىڭ دە رەكوردى وتە جاقسى. ول 15 كەزدەسۋدىڭ بارلىعىندا جەڭىسكە جەتىپ, 14 باسەكەلەسىن نوكاۋتقا جىبەردى. ەگەر وسى تارتىستا جاننىڭ مەرەيى ۇستەم بولسا, وندا ول التىن تۇعىرعا ءبىر تابان جاقىنداي تۇسەدى.
ال تالاي جىلدان بەرى شارشى الاڭدى شايقاپ جۇرگەن جانقوش تۇراروۆ, سادريددين احمەدوۆ, باتىر جۇكەنباەۆ, رۋسلان ماديەۆ, بەكمان سويلىباەۆ, يسا اقپەرباەۆ جانە اۋەسقوي رينگتەن ەندى عانا اۋىسقان ءبىر توپ قازاق بوكسشىسىنا وزدەرىن تۇبەگەيلى مويىنداتىپ, الەمدىك ءتاج ءۇشىن تالاسۋعا لايىق ەكەندەرىن دالەلدەۋ ءۇشىن ءالى ءبىراز ەڭبەكتەنۋ كەرەك. سول سەكىلدى تاياۋدا عانا التىن بەلبەۋ ءۇشىن تالاسىپ, قارسىلاسىنان وڭباي ۇتىلعان ايدوس ەربوسىن ۇلىن دا مىقتىلار تىزىمىنەن سىزىپ تاستاۋعا بولمايدى. الايدا ەڭ ءبىرىنشى كەزەكتە اتاق-داڭق ەمەس, ادامنىڭ دەنساۋلىعى ماڭىزدى ەكەنىن ەستەن شىعارماعان ابزال. سول سەبەپتى دە ءبىز قازاقتىڭ قايسار ۇلىنىڭ تەزىرەك اياعىنان تىك تۇرىپ, قاتارعا قوسىلۋىنا تىلەكشىمىز.
بۇگىنگى تاڭدا قازاقستاننىڭ ەكى بوكسشىسىنىڭ ءداۋىرى ءجۇرىپ تۇر. ولار – ورتا سالماقتاعى گەننادي گولوۆكين مەن جانىبەك ءالىمحان ۇلى. جاسى 40-تان اسقان GGG WBA مەن IBF نۇسقالارى بويىنشا چەمپيوندىق بەلبەۋدى يەلەنۋدە. العاشقىسىنان ءتىپتى «سۋپەر چەمپيون» دەگەن اتاعى بار. جانىبەك – WBO-نىڭ تەڭدەسسىزى. دەسەك تە كوپشىلىك تاراپىنان 29 جاستاعى قانداسىمىزدىڭ الەۋەتى جوعارى باعالانۋدا. كاسىپقوي بوكستىڭ «وتىمەن كىرىپ, ك ۇلىمەن شىققان» مايتالمانداردىڭ وزدەرى كەلەشەكتە «قازاق ءستيلى» وسى سالماقتىڭ ءابسوليۋتتى چەمپيونى اتاناتىنىنا ەش كۇمان كەلتىرمەيدى.
سول سەكىلدى دانيار ەلەۋسىنوۆ IBO-نىڭ التىن بەلبەۋىن يەلەنىپ وتىر. بۇل الەمدەگى ەڭ بەلدى نۇسقالاردىڭ ساناتىندا بەسىنشى ورىندا تۇر. ياعني تولىققاندى مويىندالعان ءتورت تۇجىرىمنىڭ قاتارىنا ەنبەيدى. سوندىقتان دا 31 جاستاعى دانيار ءوزىن تۇبەگەيلى مويىنداتۋ ءۇشىن WBA, IBF, WBO نەمەسە WBC-نىڭ ءبىرىنىڭ چەمپيوندىق اتاعىنا قول جەتكىزۋگە ءتيىس. وعان قازاق جىگىتىنىڭ كۇش-جىگەرى جەتەدى دەپ ويلايمىز. كەزىندە اۋەسقويلار اراسىندا وليمپيادا, الەم جانە قۇرلىق چەمپيونى اتانىپ, ازيا ويىندارىندا باس جۇلدەنى ولجالاعان ەلەۋسىنوۆ كاسىپقوي رينگتە دە ءوزىن جاقسى قىرىنان كورسەتىپ, 11 جەكپە-جەكتىڭ بارىندە جەڭدى. سونىڭ جارتىسىنان كوبىن مەرزىمىنەن بۇرىن اياقتادى. ولاي بولسا, دانياردىڭ جەڭىستى جولى الداعى ۋاقىتتا دا جالعاسادى دەپ ويلايمىز.
