تاراز قالالىق «اناعا تاعزىم» ورتالىعىنىڭ ۇيىتقى بولۋىمەن «التايدىڭ ار جاعىنان كەلگەن ارۋ» تاقىرىبىندا ادەبي-سازدى كەش ءوتتى. ءىس-شاراعا تىنىشباي ءراحيموۆتىڭ ۇلى تاڭات, قارىنداستارى ايتكۇل مەن امانكۇل قاتىسىپ, اقىن, كومپوزيتوردىڭ شىعارماشىلىعى, كىسىلىك كەلبەتى تۋرالى ويلارىن ورتاعا سالدى.
«اكەمنىڭ نوتاعا تۇسكەن 81 ءانى بار ەكەن. جۇرتتىڭ جۇرەگىنە جىلى تيگەن «التايدىڭ ار جاعىنان كەلگەن ارۋ» ءانى ءالى كۇنگە ءار جەرلەردە ورىندالىپ جاتادى. مەنىڭ اكەم – حالىقتىڭ ادامى. قاي كەزدە دە ەلدىڭ ورتاسىندا ءجۇردى. سەگىز بالانىڭ اكەسى رەتىندە ءبىزدىڭ بويىمىزعا تەك جاقسى قاسيەتتەردى دارىتتى», دەدى تاڭات راحيموۆ اكەسى تۋرالى تولعانا سويلەپ.
سىرشىل سازگەر, اقىن تىنىشباي ءراحيموۆتى ەسكە الۋعا ارنالعان ادەبي كەشتە جەرگىلىكتى اقىندار مەن جۋرناليستەر دە ءوز ويلارىن ورتاعا سالىپ, كومپوزيتوردىڭ مۇراسى قازاق حالقىمەن بىرگە جاساي بەرەتىندىگىن تىلگە تيەك ەتتى. ادەمى اندەرمەن ادىپتەلىپ, قازاقتىڭ قارا ولەڭى وقىلعان ءىس-شاراعا قاتىسۋشىلار تىنىشباي ءراحيموۆتىڭ ادامي قاسيەتىن جان-جاقتى اشۋعا تىرىستى.
تاراز
