كەڭەس وداعى كەزىنەن بەرى قاۋىپسىزدىك ورگاندارىندا قىزمەت ەتكەن, باسشىلىق قۇرامدا بولعان كوپتەگەن ارداگەر قىزمەتكەرلەر زەينەتكەرلىككە شىققاننان كەيىن دە قوعامدا ۇلتتىق رۋحتى كۇشەيتۋ, كەيىنگى تولقىندى پاتريوتيزمگە تاربيەلەۋ باعىتىندا ۇلكەن جۇمىس اتقاردى. ولار قازىر دە ارناۋلى قىزمەتتىڭ وزىق تاجىريبەلەرى مەن قالىپتاسقان داستۇرلەرىن ءىزباسارلارىنا ۇيرەتىپ, ورتامىزدا ءجۇر. سولاردىڭ ءبىرى – ۇقك تۇڭعىش توراعاسى, گەنەرال-لەيتەنانت بولات باەكەنوۆ بيىل 80 جاسقا تولىپ وتىر.
بولات ءابدىراحمان ۇلى تاۋەلسىزدىكتىڭ ەلەڭ-الاڭىندا وتاندىق كۇشتىك قۇرىلىمداردى جاساقتاپ, نىعايتۋعا سۇبەلى ۇلەس قوستى. تاۋەلسىزدىكتىڭ 30 جىلدىعى قارساڭىندا پرەزيدەنت قاسىم-جومارت توقاەۆتىڭ ۇلتتىق قاۋىپسىزدىك كوميتەتىنىڭ تۇڭعىش توراعاسى, قاۋىپسىزدىك كەڭەسىنىڭ حاتشىسى, ىشكى ىستەر ءمينيسترى, پرەزيدەنت كۇزەتى قىزمەتىنىڭ باستىعى لاۋازىمدارىن ابىرويمەن اتقارعان, ارناۋلى قىزمەتتەردى قالىپتاستىرۋعا ايرىقشا اتسالىسقان ونى ءى دارەجەلى «داڭق» وردەنىمەن ماراپاتتاۋى – وسىنىڭ ايعاعى.
بولات باەكەنوۆ 1960 جىلى ورال قالاسىنداعى اۋىل جانە ورمان شارۋاشىلىعى تەحنيكۋمىن بىتىرگەننەن كەيىن ەڭبەك جولىن قاراعاندى وبلىسى ساران قالاسىندا قالالىق دوسساف اۆتوكلۋبىنىڭ مەڭگەرۋشىسى, اۆتوبازا اۆتومەحانيگى بولىپ باستاعان. اسكەري بورىشىن وتەپ كەلگەننەن كەيىن ساران قالالىق حالىققا ءبىلىم بەرۋ بولىمىندە مەكتەپارالىق وقۋ-وندىرىستىك شەبەرحاناسىنىڭ مەڭگەرۋشىسى بولدى. 1966-1973 جىلدارى كومسومول جانە پارتيا جۇمىستارىنا ارالاسىپ, ساران قالالىق كومسومول كوميتەتىنىڭ ءبىرىنشى حاتشىسى, قالالىق پارتيا كوميتەتى ۇيىمداستىرۋ ءبولىمىنىڭ مەڭگەرۋشىسى قىزمەتتەرىن اتقارعان. بۇعان قوسا قاراعاندى مەملەكەتتىك ۋنيۆەرسيتەتىنىڭ تاريح فاكۋلتەتىن سىرتتاي ءبىتىردى.
1973 جىلى قازاقستان كومپارتياسى ورتالىق كوميتەتىنىڭ شەشىمىمەن ول كسرو مەملەكەتتىك كاۋىپسىزدىك كوميتەتى جوعارى مەكتەبىنىڭ باسشىلىق كۇرامدارىن دايارلاۋ كۋرسىنا جىبەرىلەدى. ونى بىتىرگەننەن كەيىن مەملەكەتتىك قاۋىپسىزدىك كوميتەتى قاراعاندى وبلىستىق باسقارماسى قارسى بارلاۋ ءبولىمى باستىعىنىڭ ورىنباسارلىعىنا تاعايىندالادى. بولاشاق ۇقك توراعاسىنىڭ قاۋىپسىزدىك قىزمەتىندەگى كارەراسى وسى كەزدەن باستالعان ەدى. ءارى قاراي قاجىرلى ەڭبەگىنىڭ ارقاسىندا وسى سالاداعى جاۋاپتى قىزمەتتەردى اتقارىپ, ەلىمىز ەگەمەندىك العان جىلدارى وسى سالاعا باسشىلىق جاساپ, جاڭادان قۇرىلعان ورگاندى نىعايتۋدى ۇيىمداستىردى.
جوعارىدا اتاپ وتكەنىمىزدەي, ول تاۋەلسىزدىكتىڭ نىعايۋى جىلدارىندا قاۋىپسىزدىك قىزمەتىنەن باسقا دا بىرقاتار كۇشتىك قۇرىلىمدارعا جەتەكشىلىك ەتتى. 1993-1994 جىلدارى قاۋىپسىزدىك كەڭەسىنىڭ حاتشىسى مىندەتىن اتقارىپ, 1994-1995 جىلدارى ىشكى ىستەر ءمينيسترى بولدى. 1997 جىلدان پرەزيدەنت كۇزەت قىزمەتىنىڭ باستىعى بولىپ تاعايىندالدى. 2001 جىلى وتستاۆكاعا شىققان سوڭ بولات ءابدىراحمان ۇلى ۇستازدىق قىزمەتپەن اينالىسىپ, قازاق گۋمانيتارلىق زاڭ ۋنيۆەرسيتەتىندە الماتى زاڭ اكادەمياسىن, قازاقستان كۇزەت ۇيىمدارى اسسوتسياتسياسىن باسقاردى.
ۇقك ارداگەرىنىڭ اتقارعان قىزمەتتەرىنە جەكەلەي توقتالاتىن بولساق, بىرنەشە كىتاپقا جۇك بولاتىنى ءسوزسىز. ەلىمىز تاۋەلسىزدىك العاننان كەيىن كۇشتىك قۇرىلىمداردى رەفورمالاۋ, قايتا قۇرۋ ماسەلەسى كۇن تارتىبىنە شىقتى. تۇبەگەيلى وزگەرىسكە ۇشىراعان ساياسي, ەكونوميكالىق, قۇرىلىمدىق جۇيە بارلىق سالاعا جاڭا تالاپ, تىڭ مىندەت قويدى. ەڭ الدىمەن زاڭنامالىق نەگىز رەتىندە 1992 جىلعى ماۋسىمدا جوعارعى كەڭەس ۇلتتىق قاۋىپسىزدىك تۋرالى زاڭ قابىلدادى. بۇل زاڭدى ازىرلەۋگە تەك كۇشتىك قۇرىلىمدار قىزمەتكەرلەرى, دەپۋتاتتار عانا ەمەس, سونىمەن قاتار جالپى جۇرتشىلىق وكىلدەرى دە قاتىستى. سول تۇستا بولات ءابدىراحمان ۇلىنىڭ باسشىلىعىمەن ۇلتتىق قاۋىپسىزدىك ورگاندارىندا جاڭا زاڭ بويىنشا كوپتەگەن وزگەرىس جاسالدى. قۇجات قابىلدانعاننان كەيىن كوميتەتتىڭ, ءاربىر قىزمەتكەردىڭ اتقاراتىن قىزمەتتەرىن رەتتەيتىن نورماتيۆتىك اكتىلەر دايىندالدى.
العاش ەلىمىز ەگەمەندىك الىپ, دەربەس مەملەكەت بولعان جىلدارى قاي سالادا بولسىن ءارتۇرلى قيىندىق بولعانى بەلگىلى. قارجى ماسەلەسى, جابدىقتاۋ, ءتىپتى كادر تاپشىلىعى دا باستى پروبلەمانىڭ ءبىرى بولدى. جاسىراتىنى جوق, ماتەريالدىق جاعداي دا بۇل تۇستا ماڭىزدى ءرول اتقاردى. كسرو ىدىراعان كەزدە ۇلتتىق قاۋىپسىزدىك ورگاندارىنىڭ جان-جاقتى دايىندىقتان وتكەن بىلىكتى ماماندارى مەملەكەتتىك قىزمەتكە, جەكە كوممەرتسيالىق كومپانيالارعا شاقىرتۋ الا باستادى. كاسىپكەرلەر جوعارى جالاقى تاعايىنداپ, مامانداردى فيرمالاردا جۇمىس ىستەۋگە تارتتى. كوپتەگەن بىلىكتى وفيتسەرلەر وزدەرىنىڭ تاريحي وتاندارىنا قونىس اۋداردى. سول سەبەپتى ۇلتتىق قاۋىپسىزدىكتى قامتاماسىز ەتەتىن, ەل مۇددەسىن قورعايتىن ماماندار قاتارى سيرەپ قالدى. وسى تۇستا شەتتە جۇرگەن ماماندارىمىزدى ەلگە قايتارۋ, جاڭا كادرلاردى دايارلاۋ جۇمىستارى قولعا الىندى. ادامدارمەن جۇمىس ىستەۋدىڭ جاڭا تەحنولوگيالارى مەن ادىستەرىن مەڭگەرۋ, پوستكەڭەستىك كەڭىستىكتەگى باسقا ەلدەردەگى ارىپتەستەرمەن بىرلەسىپ قارسى بارلاۋ, ۇيىمداسقان قىلمىسپەن جانە ەسىرتكى بيزنەسىمەن كۇرەسۋ سالاسىندا ءوزارا ىنتىماقتاستىق ورناتۋ قاجەت بولدى. وسىنداي قيىن تۇيىندەردىڭ شەشىمىن تابۋ بولات ءابدىراحمان ۇلىنىڭ باسقارۋىمەن ىسكە اسىرىلدى.
ۇزاق جىلدار كۇشتىك قۇرىلىمدار سالاسىنا سىڭىرگەن ەڭبەگى ءۇشىن ول «پاراسات», «قۇرمەت», «داڭق», «دوستاستىق جۇلدىزى», «زا بلاگورودستۆو پومىسلوۆ ي دەل», «ەڭبەگى ءۇشىن» وردەندەرىمەن, كسرو, قازاقستان جانە شەتەل مەملەكەتتەرىنىڭ 32 مەدالىمەن ماراپاتتالعان. «گەنەرالدار كەڭەسى» رەسپۋبليكالىق قوعامدىق بىرلەستىگى پرەزيديۋمىنىڭ مۇشەسى, ۇقك جانە پرەزيدەنت كۇزەتى قىزمەتىنىڭ قۇرمەتتى قىزمەتكەرى, قازمزۋ قۇرمەتتى پروفەسسورى, ساران قالاسىنىڭ قۇرمەتتى ازاماتى بۇگىندە زايىبى تامارا ۆاسيلەۆنا ەكەۋى ءۇش قىزدى ءوسىرىپ, نەمەرە تاربيەلەپ وتىر.
ارداگەردىڭ 80 جىلدىق مەرەيتويى ەلىمىزدە كەڭىنەن اتالىپ وتۋدە. «ۇلتتىق قاۋىپسىزدىك كوميتەتى ورگاندارىنىڭ ارداگەرلەرى» رەسپۋبليكالىق قوعامدىق بىرلەستىگى ورتالىق كەڭەسىنىڭ توراعاسى, وتستاۆكاداعى پولكوۆنيك كەنجەبولات بەكنازاروۆتىڭ باستاماسىمەن مەرەيتوي قارساڭىندا الماتىداعى ۇقك عيماراتىندا ۇلتتىق قاۋىپسىزدىك كوميتەتى ءبىرىنشى توراعاسىنىڭ مۇراجاي-بولمەسى اشىلدى, سونداي-اق ارناۋلى قىزمەت ورگاندارى ارداگەرلەرىنىڭ اراسىندا بيلياردتان جارىس ۇيىمداستىرىلدى. بولات ءابدىراحمان ۇلىنىڭ قاۋىپسىزدىك ورگاندارىنىڭ قۇرىلىمىن نىعايتۋ جانە رەتكە كەلتىرۋدەگى قاجىرلى ەڭبەگى, يگى باستامالارى ارناۋلى قىزمەت جانە قۇقىق قورعاۋ ورگاندارىنىڭ تاريحىنان ويىپ ورىن الادى.
