قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل رۋستام ءجۇرسىنوۆ شىمكەنت قالاسىندا بيزنەس وكىلدەرىمەن اتالعان ماسەلەگە وراي جيىن وتكىزدى. كەڭەسكە جۇك تاسىمالداۋشىلار, تارماق يەلەرى جانە كولىك پروكۋراتۋراسى, كولىكتىك باقىلاۋ ينسپەكتسياسى, قتج جۇك تاسىمالدارىنىڭ وكىلدەرى قاتىستى.
ۇن تارتۋ كاسىپورىندارى جانە باسقا دا ۆاگونعا مۇقتاج كاسىپكەرلەر ەلىمىزدىڭ جۇك ۆاگون پاركى وپەراتورى – «قازتەمىرترانس» اق-نىڭ جۇمىسىنا كوڭىلى تولمايدى. ولاردىڭ ايتۋىنشا, كاسىپورىندار وتىنىمدەردى ۋاقتىلى بەرەدى, الايدا «قازتەمىرترانس» اق ستراتەگيالىق ماڭىزدى ونىمدەرگە ارنالعان استىق تاسىعىشتاردى ۇسىنباي جاتىر.
«بۇگىنگى تاڭدا ءبىز, وڭتۇستىكتىڭ ۇن تارتۋشىلارى, زاۋىتتارىمىزدى استىقپەن تولىق قامتاماسىز ەتە الماي وتىرمىز. «قازتەمىرترانستان» استىق تاسيتىن كولىكتەر تۋرالى قانداي دا ءبىر دەرەك بەرىلمەيدى. ۆاگوندار قانشا, نەشەۋى كەلەدى دەگەن سۇراقتىڭ جاۋابىن تاپپاي دال بولدىق. ءبىزدىڭ كاسىپورىنداردىڭ جۇمىسى وسى ۆاگوندارعا بايلانىستى. ەلدىڭ سولتۇستىگىنەن اكەلىنەتىن استىقتىڭ كەشىگۋىنە بايلانىستى جىلجىمالى قۇرامدى الۋ ءۇشىن ءدال سول «قازتەمىرترانستان» استىق تاسيتىن ۆاگونداردى جالعا الاتىن جانە ءتاريفى قىمباتىراق «استىق ترانس» جەكە كومپانياسىنا جۇگىنۋگە ءماجبۇرمىز. ماسەلە شەشىلمەسە, امال جوق, جۇمىستى مۇلدەم توقتاتىپ, قىزمەتكەرلەردى مەرزىمسىز دەمالىسقا جىبەرەمىز», دەيدى ۇن تارتۋ كاسىپورىندارىنىڭ باسشىلارى.
كاسىپكەرلەردىڭ بولجامى بويىنشا, كتت استىق تاسىمالداۋشىلارى قازىر ەكسپورت باعىتقا قارقىندى جۇمىس ىستەيدى. ويتكەنى ۆاگونداردى رەسپۋبليكاىشىلىك باعىتتان گورى سىرتتا جۇرگىزگەن تيىمدىرەك كورىنەدى.
«شىمكەنت پەن تۇركىستان وبلىسىندا بۇگىندە 25-كە جۋىق ديىرمەن تۇراقتى جۇمىس ىستەپ تۇر. ولار تاۋلىگىنە 4,5-5 مىڭ توننا استىق وڭدەيدى. ءبىز ەلدىڭ جەتى ءوڭىرىن تولىعىمەن ۇنمەن قامتاماسىز ەتەمىز. ياعني 6-7 ملن ادامدى اسىراپ وتىرمىز. تەك سولتۇستىك وڭىرلەردىڭ بيدايىن وڭدەيمىز. ال استىقتى ديىرمەنگە تەك تەمىر جولمەن عانا جەتكىزەمىز. ءبىزدىڭ تۇراقتى جۇمىس ىستەۋىمىز ەلدىڭ ازىق-ت ۇلىك قاۋىپسىزدىگىنە تىكەلەي بايلانىستى. نەلىكتەن ءبىزدى ەلدەگى استىق تاسيتىن جالعىز كومپانيامەن جۇمىس ىستەۋگە ءماجبۇر ەتەدى؟ سوندا بىزگە تاڭداۋ جوق پا؟», دەپ ناليدى كاسىپكەرلەر.
بيزنەس وكىلدەرىنىڭ مالىمدەۋىنشە, «قتج-جۇك تاسىمالى» باسشىلىعىمەن قانداي دا ءبىر مامىلەگە كەلۋ مۇمكىن ەمەس. بىرنەشە جىلدان بەرى ولار جۇكتەردى جەدەل جەتكىزۋگە ۋادە بەرىپ كەلەدى. ءتىپتى قاجەت بولعان جاعدايدا قاتاڭ شارالار قابىلدايمىز دەپ تە ايتىپتى. الايدا بەرىلگەن سەرت ءالى كۇنگە دەيىن مونوپوليست تاراپىنان ورىندالماي وتىر. ونىڭ ۇستىنە «قتج» اق قۇرىلىمدىق بولىمشەلەرىنىڭ ارەكەتى دە تۇسىنىكسىز. قتج-دان دا, كتت-دان دا, ەلدىڭ باس تاسىمالداۋشىسىنىڭ وزگە دە ەنشىلەس كاسىپورىندارىنان دا ماردىمدى جاۋاپ الا الماي جۇرگەندەرىن جەتكىزدى ۇن تارتۋشىلار.
كەڭەس قورىتىندىسىندا وسى ماسەلەگە قاتىستى كاسىپكەرلەر قۇقىقتارىن قورعاۋ جونىندەگى ۋاكىل بىلاي دەدى: «وكىنىشكە قاراي, بۇل ماسەلە بۇگىن عانا پايدا بولعان جوق. بۇل جىلدار بويى قوردالانىپ كەلگەن وزەكتى پروبلەما بولىپ تۇر. تۇپتەپ كەلگەندە, قتج-نىڭ جۇكتەردى جەتكىزۋ قارقىنى 3-4 ەسەگە باياۋلاپ كەتكەنى راس. ونىڭ بىرنەشە سەبەبى بار سەكىلدى. سولاردىڭ باستىلارىنا توقتالسام, بۇل لوكوموتيۆتىڭ بولماۋى جانە تاسىمالدى دۇرىس ۇيىمداستىرماۋ سالدارى. وسى ەڭ نەگىزگى ەكى ماسەلە شۇعىل تۇردە شەشىلۋگە ءتيىس. استاناعا ورالعاننان كەيىن ءبىز بىردەن كەڭەس وتكىزەمىز, وندا قتج-نىڭ, مونوپولياعا قارسى اگەنتتىكتىڭ, يندۋستريا جانە ساۋدا مينيسترلىگىنىڭ باسشىلىعىمەن اقىلداسامىز. بۇل وزەكتى پروبلەما بيىلدان قالماي قالايدا ءوز شەشىمىن تابۋعا ءتيىس. ويتپەگەن جاعدايدا مەملەكەت باسشىسىنىڭ تىكەلەي وزىنە شىعۋىمىزعا تۋرا كەلەدى», دەدى ول.
شىمكەنت
