ءبىلىم جۇيەسىنىڭ اسا كۇردەلى جانە جاۋاپتى سالا ەكەندىگىن, ونى رەفورمالاۋدا قاتەلىكتەر جىبەرىلسە, بىرنەشە ۇرپاقتىڭ تاعدىرىنا, مەملەكەتىمىز بەن ۇلتىمىزدىڭ تاۋەلسىزدىگى مەن قاۋىپسىزدىگىنە زيانىن تيگىزۋى مۇمكىن ەكەنىن بىلەمىز. سوندىقتان دا ءبىلىمنىڭ ساپاسىن ارتتىرۋ ءۇشىن ءبىلىم جۇيەسىندە قىسقا مەرزىم ىشىندە كۇرت وزگەرىستەر جاساۋدىڭ قاۋىپتى دە, قاتەرلى ەكەنىن ارقاشان ەسكەرگەنىمىز ءجون. سودان بولار, ەلىمىزدەگى ءبىلىم جۇيەسىن جاڭعىرتۋ قازىرگى وركەنيەتتىڭ وزگەرمەلى سيپاتىنا, عىلىمي جاڭالىقتارعا, تەز جەتىلدىرىپ وندىرىسكە ەنىپ جاتقان جاڭا تەحنولوگيالارعا سايكەس دەر كەزىندە جاڭارىپ, جەتىلىپ, بەيىمدەلىپ كەلەدى. ءبىلىم بەرۋ ورىندارىنىڭ وقۋ-ماتەريالدىق, كادرلىق بازاسىنىڭ مورالدىق تا, ماتەريالدىق تا جاعىنان بارىنشا جاڭارتىلۋى قاجەت-اق.
تاۋەلسىزدىك العان جىلداردان بەرى كلاسسيكالىق ۇلگىدەگى ءبىلىم جۇيەسى جاڭا يننوۆاتسياعا باعدارلانعان مودەلگە اۋىستىرىلىپ جاتىر. دەسە دە, ءالى كۇنگە دەيىن نارىق تالابىنا ساي بىلىكتى مامانداردى دايارلاۋدا پروبلەمانىڭ بار ەكەنى جاسىرىن ەمەس. بۇعان بىردەن-ءبىر سەبەپ – جوعارى وقۋ ورىندارىنداعى ماتەريالدىق-تەحنيكالىق بازانىڭ ءتيىستى دەڭگەيدە بولماۋى دەسەك ارتىق ايتقانىمىز ەمەس.
بۇل رەتتە قازىرگى تاڭداعى جاھاندانۋ مەن يندۋستريالاندىرۋ جاعدايىندا ەكونوميكانىڭ بارلىق سالاسى ءۇشىن كادرلار دايارلاۋ ماسەلەلەرىن جاقسارتۋ ەلىمىزدىڭ مەملەكەتتىك ساياساتىنداعى وزەكتى مىندەتتەردىڭ ءبىرى. كادرلار دايارلاۋ جۇيەسىن حالىقارالىق تالاپتارمەن ۇيلەسۋى ءۇشىن ءالى دە ءتيىستى جۇمىستار اتقارۋىمىز كەرەك, ونىڭ ىشىندە تسيفرلاندىرۋعا دا ايرىقشا نازار اۋدارۋىمىز قاجەت.
مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا دا تسيفرلاندىرۋدىڭ ەڭبەك نارىعىنداعى ءرولىن زەردەلەپ ايتتى. تەحنيكالىق جانە كاسىپتىك ءبىلىم بەرۋ مەن وقىتۋدى جاڭعىرتۋ ۇدەرىسى تسيفرلىق ەكونوميكا مەن تسيفرلىق قوعامعا كوشۋدىڭ جاھاندىق ۇدەرىستەرىنەن تۋىنداپ جاتىر. الەمدىك ەكونوميكاداعى, قوعامداعى ۇزدىكسىز وزگەرىستەر جاعدايىندا كادرلار دايارلاۋ جۇيەسىن ۇنەمى جاڭعىرتىپ وتىرۋ قاجەت, ءداستۇرلى فورماتتار ەسكىرگەن. ءوز كەزەگىندە, ءوندىرىستىڭ ترانسفورماتسياسى كادرلاردىڭ كاسىبي داعدىلارىنىڭ وزەكتى بولۋىن, زاماناۋي قۇرىلعىلاردا جۇمىس ىستەي الۋىن ۇنەمى قاجەت ەتىپ تۇرادى. قازاقستان رەسپۋبليكاسىنىڭ ءبىلىم بەرۋ جۇيەسىنىڭ رەفورمالانۋى قوعامنىڭ دەموكراتيالىق باعىتتا دامي باستاعانىن كورسەتەدى. بۇل رەتتە ءبىلىم بەرۋ وردالارىنىڭ جاڭا ءتيپتى يننوۆاتسيالىق باعىتتا جۇمىسىن جالعاستىرۋى جەكە تۇلعانى تولىق دامىتۋ تۇجىرىمداماسىنا سايكەس كەلەدى.
ءال-فارابي اتىنداعى قازاق ۇلتتىق ۋنيۆەرسيتەتىندە دە ءبىلىم ساپاسىن ارتتىرۋدىڭ تىڭ تەتىكتەرى قولعا الىنىپ, ءبىلىم بەرۋدىڭ جاڭا مودەلى قالىپتاسىپ كەلەدى. ءبىلىم وشاعىندا ستراتەگييالىق HR جۇيەسىن ەنگىزىپ, پروفەسسورلىق-وقىتۋشىلىق قۇرام مەن قىزمەتكەرلەردىڭ كاسىبي بىلىكتىلىگىن ارتتىرۋعا ارنالعان ونلاين-پلاتفورمانى جەتىلدىرۋ جۇمىستارى قولعا الىنباق. سونداي-اق الەۋمەتتىك ينكليۋزيا مەن قولايلى وقۋ شارتتارىن نىعايتۋ, تسيفرلىق مەنەدجمەنت پەن «paper free university» (قاعازسىز ۋنيۆەرسيتەت) جۇيەسى, ت.ب. وزەكتى ءىس-شارالار جەتىلدىرىلەدى.
ءيا, ءبىلىم بەرۋ جۇيەسىنىڭ جاھاندىق سىن-قاتەرلەرىن ەسكەرسەك, ءبىلىم بەرۋ سالاسىنداعى ىنتىماقتاستىق پەن مادەني الماسۋدىڭ ماڭىزى ەرەكشە. قازىرگى ۋاقىتتا ءال-فارابي اتىنداعى قازۇۋ ماكرو دەڭگەيدە ءبىلىم بەرۋ جانە عىلىمي-يننوۆاتسيالىق قىزمەت ناتيجەلەرىنە قول جەتكىزۋگە باعىتتالعان دامۋ باعدارلاماسىن ىسكە اسىرىپ جاتىر. ءبىزدىڭ ۋنيۆەرسيتەت QS جاھاندىق رەيتينگىندە الەمدەگى ەڭ ۇزدىك ۋنيۆەرسيتەتتەر اراسىندا 150-ورىندا, سونداي-اق ۇلتتىق جانە حالىقارالىق رەيتينگتەردە الدىڭعى ورىنداردان ءجيى كورىنەدى. وقۋ ورنىنىڭ ءبىلىم بەرۋ جانە عىلىمي الەۋەتىن ەسكەرە وتىرىپ, قازاقستانداعى الەمدىك دەڭگەيدەگى زەرتتەۋ ۋنيۆەرسيتەتى مودەلىن قۇرۋعا مۇمكىندىگى زور. بۇگىندە ۋنيۆەرسيتەتتىك ءبىلىم بەرۋدىڭ پەرسپەكتيۆالىق مودەلى قالىپتاسۋدا: وقۋ ورنىندا 500-دەن استام ءبىلىم بەرۋ باعدارلاماسى ىسكە اسىرىلۋدا, 137 ءبىلىم بەرۋ باعدارلاماسى QS by Subject رەيتينگىندە 500 توبىنا كىردى. الەمنىڭ جوعارى وقۋ ورىندارى جانە عىلىمي ورتالىقتارىمەن ستراتەگيالىق ارىپتەستىك جۇزەگە اسىرىلادى. قوس ديپلوم باعدارلامالارى, حالىقارالىق جوبالار, وپق ءۇشىن تاعىلىمدامالار جانە ءبىلىم الۋشىلاردىڭ اكادەميالىق ۇتقىرلىعى تابىستى جۇرگىزىلىپ جاتىر. مۇنىڭ ءبارى جاڭا قازاقستانعا نىق قادام باسىپ, ءبىلىم سالاسىن جەتىلدىرۋگە باعىتتالعان باياندى جوبالار ەكەنى ءسوزسىز.
باقىت سۇلتانوۆا,
ەكونوميكا عىلىمدارىنىڭ كانديداتى, دوتسەنت
