مەرەكەلىك ءىس-شاراعا عىلىم جانە جوعارى ءبىلىم ءمينيسترىنىڭ جاستار ءىسى جونىندەگى كەڭەسشىسى ايسۇلۋ ەرنيازوۆا ارنايى كەلدى. قالالىق ىشكى ساياسات جانە جاستار ىستەرى جونىندەگى باسقارما باسشىسى مۇراتجان شوتانوۆ تا بايقاۋدىڭ قوناعى بولدى. ءوز كەزەگىندە شاھارداعى جوعارى وقۋ ورىندارىنىڭ ستۋدەنتتەرى تولى زال جاستار جيىنىنىڭ كورىگىن قىزدىرا ءتۇستى.
ءىس-شارادا العاشقى بولىپ ءسوز باستاعان ا.ەرنيازوۆا ستۋدەنتتەردى مەرەكەلەرىمەن قۇتتىقتاپ, مەملەكەتتىڭ كەلەشەك ۇستىنى جاستار ەكەنىن ايتىپ, ولاردى تولعاندىرعان كەز كەلگەن ماسەلە اشىق تالقىلانۋ قاجەتتىگىن اتاپ ءوتتى.
– ءبىز كەشە عانا تۇركىستان قالاسىندا بولدىق. وندا مينيسترلىك جانىنداعى ستۋدەنتتەر كەڭەسىنىڭ العاشقى وتىرىسىنا قاتىستىق. تۇتاس رەسپۋبليكادان كەلگەن 80-نەن استام جوعارى وقۋ ورىندارى ستۋدەنتتەرىنىڭ دەلەگاتتارىمەن بىرگە ءبىلىم سالاسىنداعى كۇيىپ تۇرعان بىرنەشە ماسەلەنى تالقىعا سالدىق. سونىمەن بىرگە ستۋدەنتتەر تاراپىنان قويىلعان سۇراقتارعا جاۋاپ بەرە وتىرىپ, ولاردىڭ دا ۇتىمدى ۇسىنىستارى مەن ويلى پىكىرلەرىن تىڭدادىق. ەندىگى جەردە وسى ۇسىنىستاردى باسشىلىققا الىپ, سول ارقىلى اۋقىمدى دا ماڭىزدى جوبالاردى جۇزەگە اسىرامىز. البەتتە, جاستاردىڭ بويىندا بۇلا كۇش بار. قوعامنىڭ ايناسى دا جاستار. سوندىقتان بۇگىندى وزگەرتەتىن, كەلەشەكتى جارقىن ەتەتىن, ەل ەرتەڭىن قالىپتاستىرۋشى ستۋدەنت جاستار دەپ بىلسەك, ولاردىڭ دا ماسەلەسىنە كوڭىل ءبولىپ, بارىنشا اشىقتىق پەن ەركىندىك مازمۇنىندا بايلانىس ورناتۋىمىز كەرەك, – دەدى عىلىم جانە جوعارى ءبىلىم ءمينيسترىنىڭ جاستار ءىسى جونىندەگى كەڭەسشىسى.
وسى تۇستا ايتا كەتكەن ءجون, شىمكەنت قالاسىندا جوعارى وقۋ ورىندارى اراسىندا ءوزىن ءوزى باسقارۋ جۇيەسىنىڭ ەنگىزىلگەنىنە ءبىرشاما ۋاقىت بولدى. وسى ارالىقتا قىركۇيەك ايىنان باستاپ ستۋدەنتتەر ورتاسىندا زياتكەرلىك ويىنداردىڭ سايىسى باستالدى. جاستار وسىنداي بايقاۋدا وزدەرىن جاقسى جاعىنان كورسەتە ءبىلدى. ءوز ويلارىن اشىق جەتكىزۋدى, پىكىرلەسۋ بارىسىندا ءوز ۇستانىمىنا باسقالاردى سەندىرە ءبىلۋدى ۇيرەندى. سونىمەن بىرگە كوشباسشى ستۋدەنتتەر وزدەرىنىڭ بەلسەندىلىگىن بايقاتىپ, جالپى جاستار وسى سايىستار ارقىلى ءوزارا تاجىريبە الماستى.
– بۇگىنگى تاڭدا شىمكەنت قالاسىنداعى تۇرعىنداردىڭ 240 مىڭنان استامىن جاستار قۇرايدى. مەگاپوليستە پرەزيدەنت تاپسىرماسىنا سايكەس ءتيىمدى جاستار ساياساتىن جۇرگىزۋ كەزەڭ-كەزەڭىمەن جۇزەگە اسىرىلىپ كەلەدى. سونىڭ بىردەن-ءبىر ايعاعى رەتىندە «Smart student» سەكىلدى اۋقىمدى جوبانى ەرەكشە اتاۋعا بولادى. ەڭ ماڭىزدىسى, وسىنداي جوبالار ارقىلى جاستاردىڭ ورەسى وسەدى. ءبىلىمىن ارتتىرۋ ناتيجەسىندە كەلەشەكتە بۇدان دا ۇلكەن مۇمكىندىكتەرگە قاراي جول اشىلادى. قازىرگى قوعامدا جاستاردىڭ تاباندى ەڭبەك ەتۋى ماڭىزدى. قالامىزدى گۇلدەندىرەتىن, ادىلەتتى قازاقستاندى قۇراتىن ەرتەڭگى جاستار. وسى جولدا بىزگە ۇلكەن سەنىم ارتىلىپ وتىر. ياعني جاستار مەملەكەتتى وركەندەتۋ ىسىنە بەلسەنە اتسالىسار بولسا, ەلىمىزدىڭ جاقىن كەلەشەكتە ۇلكەن جەتىستىكتەرگە قول جەتكىزەتىنىنە ءوز باسىم كامىل سەنەمىن. جوعارى وقۋ ورنىندا ءتالىم الىپ جاتقان جاستاردىڭ ستۋدەنتتىك شاعى قازاقستاننىڭ تاريحي كەزەڭىمەن تۇسپا-تۇس كەلىپ وتىر. مەملەكەت باسشىسى قاسىم-جومارت توقاەۆتىڭ باستاماسىمەن ەلىمىزدە اۋقىمدى رەفورمالاردىڭ باستالعانىن بىلەسىزدەر. ءار سالادا قولعا الىنىپ جاتقان ءىس كوپ. حالقىمىز اشىق ءارى ءادىل قوعام قۇرۋدى قولداپ, سول يدەيا توڭىرەگىندەگى بىرلىك تۋى استىندا توپتاسىپ جاتىر. سوندىقتان ەلدىڭ جاڭعىرۋى البەتتە جاستارعا تاماشا مۇمكىندىك سىيلايدى. سونىمەن بىرگە زور جاۋاپكەرشىلىك جۇكتەيتىنىن دە ەستەن شىعارماعان ابزال. ەندەشە, ستۋدەنت جاستاردى ينتەللەكتۋالدى جوبالاردا بەلسەندى بولۋعا, بيىككە سامعاۋعا شاقىرامىن. ال بۇگىنگى جوبا جەڭىمپازدارىنىڭ ماراپاتى قۇتتى بولسىن, ءاردايىم جولدارىنىڭ اشىق بولعانىن تىلەيمىن, – دەدى باسقارما باسشىسى مۇراتجان شۇكىرحان ۇلى.
مەرەكەلىك ءىس-شارا سوڭىندا باسقارما باسشىسى جوباعا بەلسەنە اتسالىسقان جانە جۇلدەلى ورىن العان جاستارعا ارنايى سىيلىقتار تابىستادى. جارىس قورىتىندىسىنا كەلسەك, ءى ورىندى وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتى الدى. وڭتۇستىك قازاقستان مەديتسينا اكادەمياسى ءىى ورىن يەلەندى. اكادەميك قۋاتبەكوۆ اتىنداعى حالىقتار دوستىعى ۋنيۆەرسيتەتى ءىىى ورىنعا تۇراقتادى. زياتكەرلىك سايىستا وزا جاپقان بارشا جەڭىمپازدار ديپلوممەن جانە قارجىلاي سىيلىقپەن ماراپاتتالدى.
شىمكەنت
