كىلەڭ كۇمىس كومەي انشىلەر باس قوسقان ءداستۇرلى ءان مەرەكەسىندە نۇرجاننىڭ بۇرىن كوپ ايتىلماي كەلگەن «كوكەن-اي», «باتيماعا», «ارا-اي», «اسىل-اي», «جان ساۋلەم», «نازىم» اتتى شىعارمالارى شىرقالدى. ءار وڭىردەگى ءداستۇرلى ونەر مەكتەپتەرىنىڭ وكىلدەرى نۇرجاننىڭ نازىم-تەرمەلەرىن ورىنداۋمەن قاتار, قالاۋى بويىنشا وزدەرىمەن الا كەلگەن اندەردى دە شىرقادى.
بايقاۋعا قاتىسۋشىلاردى بەلگىلى جىراۋ, فولكلور زەرتتەۋشى الماسبەك الماتوۆ باستاعان قازىلار القاسى باعالاپ وتىردى.
– نۇرجان تەك قانا ءانشى ەمەس قوي. ول – ورىنداۋشى جانە ءوز جانىنان ءان شىعارعان سازگەر. نۇرجان – بالۋان, نۇرجان – جىرشى. تەرمە-تولعاۋلارى مەن شەشەندىك سوزدەرىن بىلاي قويعاندا, نۇرجان – اقىن. سوندىقتان الداعى ۋاقىتتا بۇل بايقاۋدىڭ اۋقىمىن كەڭەيتىپ, ۇلكەن فەستيۆال رەتىندە وتكىزۋ كەرەك سياقتى. ار جاعىندا بالۋاندار بەلدەسىپ جاتسا, ءبىر جاعىندا وسى قازىلار القاسىنىڭ قۇرامىندا وتىرعان اقىن-دراماتۋرگ اقىلبەك شاياحمەتتىڭ نۇرجان تۋرالى دايىن تۇرعان درامالىق تۋىندىسى ساحنالانىپ جاتسا, ەندى ءبىر جاعىنان ءداستۇرلى ءان بايقاۋى مەن اقىندار ءمۇشايراسى قىزىپ جاتسا, اقىن مۇرالارىنىڭ بۇدان دا كەڭىرەك ناسيحاتتالۋىنا جول اشىلار ەدى, – دەدى الماسبەك جىراۋ.
وبلىستىق مادەنيەت باسقارماسىنىڭ باسشىسى ەرلان قالماقوۆ بۇل ۇسىنىستىڭ ورىندى ەكەنىن, الداعى بايقاۋلاردا مۇمكىندىگىنشە قاپەرگە الىناتىنىن ايتتى.
وسىمەن ءۇشىنشى رەت ءوتىپ وتىرعان ونەر جارىسىندا بيىل ءبىرىنشى رەت قوستاناي وبلىسىنىڭ ونەرپازى جەڭىمپاز اتانعانىن دا ايتا كەتۋ كەرەك.
قازىلار القاسىنىڭ ۇيعارىمىمەن بايقاۋدىڭ باس جۇلدەسىن قوستاناي وبلىسى, فەدوروۆ اۋدانىنان كەلگەن ونەرپاز ارعىنبەك بەيبىتحان جەڭىپ الدى. 1-ورىنعا استانالىق جىرشى ۇلدانا نۇرتۋعان يە بولدى. بايقاۋعا استانا قالاسىنىڭ اتىنان قاتىسقان تاعى ءبىر تالانتتى جىرشى ايبات سەرىك جۇلدەلى 2-ورىندى يەلەنسە, قاراعاندى وبلىسى, شەت اۋدانىنان كەلگەن ەلدوس جاقيەۆ پەن الماتىلىق ايبيكە تاڭاتاروۆا ءۇشىنشى ورىندى ءوزارا ءبولىستى. ونەرپازداردىڭ بارىنە نۇرجان اندەرى بايقاۋىنىڭ ارنايى مۇسىنشەسى مەن اقشالاي سىيلىق تابىس ەتىلدى.
– نۇرجان ناۋشاباي ۇلى اتىنداعى بايقاۋدىڭ ءبىر پايداسى – وسى وڭىردەگى ءداستۇرلى مۋزىكانىڭ قايتادان جاندانۋىنا ءوز سەپتىگىن تيگىزىپ جاتىر. بايقاۋدى تۇراقتى تۇردە وتكىزۋ ارقىلى وسى توپىراقتا بار دۇنيەنى قايتا جاڭعىرتىپ جاتىرمىز. ءبىر قۋانتارلىعى, جىلدان-جىلعا قاتىسۋشىلاردىڭ دا گەوگرافيالىق اۋقىمى كەڭەيىپ كەلەدى. بۇرىن بىرنەشە وڭىردەن عانا كەلەتىن, بيىل قازاقستاننىڭ تۇكپىر-تۇكپىرىنەن كەلدى. قاتىسۋشىلار بۇدان ءارى ىزدەنىپ, ءوز رەپەرتۋارلارىنا نۇرجاننىڭ كوپشىلىككە ءالى دە بولسا جەتپەي جاتقان اندەرىن قوسادى دەگەن ۇمىتتەمىز, – دەيدى قازىلار القاسىنىڭ مۇشەسى, اقىن باتىرلان ساعىنتاەۆ.
بايقاۋدان كەيىن ايگىلى ونەرپاز الماسبەك الماتوۆ جاس جىرشى-تەرمەشىلەرگە شەبەرلىك ساعاتىن وتكىزدى.
قوستاناي وبلىسى,
توبىل قالاسى
