ول قالاداعى تاۋكە حان داڭعىلى بويىندا ورنالاسقان №101 سايلاۋ ۋچاسكەسىنە كەلىپ, جاشىككە تاڭداۋ بيۋللەتەنىن سالدى.
«مەن ۇزاق جىل سوت سالاسىندا قىزمەت اتقارىپ, زاڭ ۇستەمدىگىن قامتاماسىز ەتتىم. قازىر قۇرمەتتى ەڭبەك دەمالىسىندامىن. تاڭ سارىدەن تۇرىپ, داۋىس بەرۋگە وسىندا كەلدىم. پرەزيدەنتتىككە ۇمىتكەرلەردىڭ بىرىنە تاڭداۋ ءبىلدىردىم. وسى ىسىممەن شاڭىراعىمداعى بالا-شاعا نەمەرەلەرىمە دە ۇلگى كورسەتتىم دەپ ايتا الامىن. قازاقستان ەلىنىڭ ءار ازاماتى ساياسي ساۋاتتى بولۋ كەرەك. ءارى قازىرگى قوعام بىزدەن ساياسي بەلسەندىلىكتى تالاپ ەتەدى. سوندىقتان بارشا ازامات وسىنداي ەل تاعدىرى شەشىلەتىن ناۋقاندارعا قاتىسۋى مىندەتتى دەپ ەسەپتەيمىن», دەدى ومىربەك تەمىر ۇلى.
سونداي-اق سايلاۋ ارقىلى پرەزيدەنتتى تاڭداۋ بۇل الەمدە قالىپتاسقان ءداستۇر ەكەنىن اتاپ ءوتتى.
«مەملەكەتتىك قۇرىلىم وسىنداي دەموكراتيالىق جولدارمەن قالىپتاسادى. سول ءۇشىن ونىڭ ماڭىزدىلىعىن ۇلكەندەر جاعى جاستارعا ۇيرەتىپ وتىرۋى ءتيىس. قازاقستاندىقتار ادىلەتتى مەملەكەتتى قالايدى. بۇگىن سول ارماندى جۇزەگە اسىرۋ ءۇشىن بارلىعى تەگىس سايلاۋعا كەلەر دەگەن ۇمىتتەمىن. بۇيىرتسا, ەلىمىز جاڭارعان قازاقستانعا اينالادى. قازىر سول باعىتقا قاراي بار كۇش-جىگەر سالىنىپ جاتىر ەمەس پە؟! ەندەشە ءبىز دە ەلدىڭ پاتريوتى بولىپ, وسىنداي بولاشاق تاعدىر تالقىعا تۇسەر جاۋاپتى شاراعا نەمقۇرايدىلىق تانىتپاۋىمىز كەرەك. بۇگىن ەل ءۇشىن ءارى مەرەكە. سونىمەن بىرگە بۇگىنگى كۇندە ەلدىڭ كەلەشەگى شەشىلىپ جاتىر. ال ونىڭ قانداي بولارى ول مىنا ءسىز بەن ءبىزدىڭ ارەكەتىمىزگە بايلانىستى.
مەملەكەتتىڭ كوزدەگەن باستى ماقساتى ول حالىقتىڭ الەۋمەتتىك جاعدايىن جاقسارتۋ. ەلدە ءادىل قوعام قۇرىلسا سول ماقساتقا ءالى اق جەتەمىز. ول ءۇشىن ايتىپ وتكەنىمدەي حالىقتىڭ ساياسي بەلسەندىلىگى مەن ساۋاتتىلىعى قاجەت. سايلاۋ بۇل وزگەنىڭ شارۋاسى ەمەس, ءدال بىزگە قاتىستى ماسەلە. ويتكەنى بۇل ەلدىڭ ازاماتى ءبىزبىز, وسىندا تۇراتىن دا ارتىمىزدان قالعان ۇرپاقتىڭ ءومىر سۇرەتىن جەرى دە قازاقستان. سول سەبەپتى اركىم ءوزىن ەلدىڭ تاعدىرى ءۇشىن جاۋاپتى تۇلعا رەتىندە سەزىنۋى ءتيىس. مەن ەلىمنىڭ گۇلدەنگەن, دامىعان, دەموكراتيالى بولعانىن قالايمىن. وسىنداي پاتريوتتىق سەزىم مەنى بۇگىن سايلاۋعا جەتەلەپ الىپ كەلدى. مەملەكەتتىڭ بولاشاعىن قالاسۋعا از دا بولسا ۇلەس قوسۋ, ىسىڭمەن دالەلدەپ كورسەتۋ مەن ءۇشىن ۇلكەن باقىت. باسقالاردىڭ دا تاعدىرلى ساتتە بەلسەندى بولعانىن اسا قالايمىن» دەدى ەڭبەك ارداگەرى.
ۇزاق جىل سوت سالاسىندا قىزمەت اتقارعان اعامىزعا بەرىلگەن قۇرمەت تە جەتەرلىك. ول تۇركىستان وبلىسى ارداگەر سۋديالار كەڭەسىنىڭ توراعاسى, قۇرمەت وردەنىنىڭ, ءۇش بي قۇرمەت بەلگىسىنىڭ يەگەرى, قازاقستانداعى قۇرمەتتى ارداگەر سۋديا.
