مىسالى, قوستاناي قالاسىنداعى «ورلەۋ» بىلىكتىلىكتى ارتتىرۋ ورتالىعىنىڭ عيماراتىندا ورنالاسقان №11 سايلاۋ ۋچاسكەسىنە 2622 ادام تىركەلگەن. سايلاۋ ۋچاسكەسى تاڭعى ساعات 7:00-دەن بەرى جۇمىس ىستەپ جاتىر.
«تاڭەرتەڭ قازاقستان رەسپۋبليكاسىنىڭ مەملەكەتتىك گيمنىن تىڭداپ بولعان سوڭ, بىردەن جۇمىسىمىزدى باستاپ كەتتىك. ەندى ەل ءۇشىن بۇل دا ءبىر ۇلكەن مەرەكە عوي, سوندىقتان داۋىس بەرۋگە ءبىرىنشى بولىپ كەلگەن 20 شاقتى ادامعا شاعىن تارتۋ-تارالعىمىزدى ۇلەستىرىپ بەردىك. قازىرگە دەيىن مىڭنان استام تۇرعىن ءوز ۇمىتكەرلەرىنە داۋىس بەرىپ ۇلگەردى. ساعات 12:00-گە دەيىن ءبىز قانداي دا ءبىر سەبەپتەرمەن سايلاۋ ۋچاسكەسىنە كەلىپ داۋىس بەرە المايتىن 11 ازاماتتان ءوتىنىش قابىلدادىق. ولاردىڭ ىشىندە 80-نەن اسقان زەينەتكەر قاريالار, وزدىگىنەن ءجۇرىپ-تۇرا المايتىن مۇمكىندىگى شەكتەۋلى جاندار بار. ول كىسىلەردىڭ ارقايسىمەن جەكە-جەكە حابارلاسىپ, سويلەستىك. كولىگىمىز دايىن تۇر, قازىر سول كىسىلەردىڭ ۇيلەرىن ارالايمىز», دەيدى سايلاۋ ۋچاسكەسىنىڭ ءتورايىمى گۇلبانۋ سۇلتانعازينا.
سايلاۋ ۋچاسكەسىنە كەلگەن تۇرعىندارمەن سويلەسىپ كوردىك. اۋليەكول وڭىرىندەگى قازانباسى اۋىلىندا دۇنيەگە كەلگەن 73 جاستاعى داۋرەنبەك مۇحامەتجان ۇلى 40 جىلدان بەرى قوستانايدا تۇرىپ جاتىر ەكەن.
«داۋىس بەرۋدەن ەشقاشان باس تارتىپ كورگەن ەمەسپىن. سايلاۋ ۋچاسكەسى ۇيگە جاقىن, جۇبايىم ەكەۋمىز اياڭداپ جاياۋ كەلدىك. مەن ءوزىم سەنەتىن ۇمىكەرگە داۋىس بەردىم. مەنىڭ پرەزيدەنتىم, ەڭ باستىسى, ىرگەمىزدىڭ بۇتىندىگىن, ەل ءىشىنىڭ ىنتىماعى مەن بۇتىندىگىن ۇستاپ تۇرا الاتىن مىقتى تۇلعا دەگەن سەنىمدەمىن. جالپى, پرەزيدەنت سايلاۋى سياقتى ەل مۇددەسىنە كەلىپ تىرەلەتىن اسا ماڭىزدى شاراعا اتسالىسۋ ءاربىر وتانشىل ازاماتتىڭ قاسيەتتى پارىزى. بۇل دەموكراتيانىڭ, حالىق بيلىگىنىڭ ءبىر كورىنىسى. قازىر جامان تۇرىپ جاتىرمىز با؟ ءبارى دە بار, وسى ىنتىماق-بەرەكەمىز ورنىندا تۇرسا, اسپاس اسۋ, الىنباس قامال بولمايدى», دەيدى زەينەتكەر.
