ەۋرازيالىق ەكونوميكالىق وداققا بىرقاتار ءىرى مەملەكەتتەر كىرۋگە نيەتتى

استانا. 30 مامىر. ەۋرازيالىق ەكونوميكالىق وداققا وننان استام ەل مۇشە بولۋعا قۇمارتىپ وتىر. «نۇر وتان» پارتياسى توراعاسىنىڭ بiرiنشi ورىنباسارى باۋىرجان بايبەك وسىلاي دەدى. بۇل تۋرالى Bnews.kz حابارلادى. باۋىرجان بايبەكتىڭ ايتۋىنشا, تۇركيا, يران, جاڭا زەلانديا, ءۇندىستان ەلدەرى باستاعان وننان استام مەملەكەت ەۋرازيالىق ەكونوميكالىق وداققا قىزىعۋشىلىق ءبىلدىرىپ, مۇمكىندىك بولسا, ونىڭ قۇرامىنا قابىلدانۋعا مۇددەلى ەكەندەرىن بىلدىرۋدە. بۇدان ءبىز اتالعان وداقتىڭ ءتيىمدى ەكەنىن اڭعارامىز. «نۇر وتان» پارتياسى توراعاسىنىڭ بiرiنشi ورىنباسارى: «ەۋرازيالىق ەكونوميكالىق وداققا كىرۋ ءبىزدىڭ ەگەمەندىگىمىزگە نۇسقان كەلتىرەدى دەگەن ماسەلە كوپ كوتەرىلىپ ءجۇر. وسى تۇستا مەنىڭ ايتارىم, بۇگىنگى تاڭدا وننان استام مەملەكەت ەۋرازيالىق ەكونوميكالىق وداققا كىرۋگە نيەت ءبىلدىرىپ وتىر. اتاپ ايتار بولسام, ءۇندىستان, ۆەتنام, تۇركيا, يران, ارمەنيا, قىرعىزستان, چيلي, جاڭا زەلانديا جانە تاعى باسقالار. بۇل مەملەكەتتىڭ ەگەمەندىگىنە ەش نۇسقان كەلتىرمەستەن, ەركىن ساۋداعا ەنۋگە دايىن ەكەندىكتەرىن كورسەتىپ وتىر», – دەدى. ەستەرىڭىزگە سالا كەتەيىك, كەشە استانادا ەۋرازيالىق ەكونوميكالىق وداق قۇرۋ تۋرالى كەلىسىم-شارتقا قول قويدى. جولدىباي بازار. دەرەككوز: Bnews.kz. فوتو: «قازاقپارات».