مەدەۋگە ەكوكولىكتەر كىرە الا ما؟

وسى ورايدا كاسىپكەرلەرگە ەلەك­تر كولىكتەرىمەن تاسىمالداۋ­دى جۇزەگە اسىرۋ ءۇشىن «مەدەۋ» پار­كىمەن كەلىسىم جاساۋ ۇسىنىلىپ وتىر. وتكەن اپتادا بيزنەس وكىلدەرى بۇل باستامانى پروكۋراتۋرامەن بىر­لەسىپ، الماتى قالاسىنىڭ كا­سىپ­كەرلەر پالاتاسى الاڭىندا تال­قىلادى.

الماتى كاسىپكەرلەر پالاتا­سىنىڭ اكىمشىلىك كەدەرگىلەردى ازايتۋ ءبولىمىنىڭ باستىعى نۇربول اشىربەكوۆ جيىندى اشا وتىرىپ، ەلەكتركارلاردىڭ مەملەكەتتىك ور­گاندارمەن ەرەكشە قورعالاتىن اۋماقتىڭ اشىق ايماعىنا كىرۋىن شە­كتەۋ ماسەلەسى بىرنەشە رەت تال­قىلانعانىنا قاراماستان، ماسەلە ءالى دە اشىق كۇيىندە قالىپ وتىرعانىن العا تارتتى.

«تاراپتاردىڭ بىرنەشە رەت كەلىسسوزدەرىنەن كەيىن پروكۋراتۋرا، «مەدەۋ» پاركى جانە الماتى كاسىپكەرلەر پالاتاسىنىڭ وكىلدەرى مەموراندۋمعا قول قويۋ تۋرالى شەشىم قابىلدادى»، دەدى ول.

بۇل كەلىسىم ەرىكتى جانە كاسىپ­كەرلەردىڭ قۇقىعى مەن مىندەتتەرىن قامتيدى. پروكۋراتۋرا وكىلى مەموراندۋم بارلىق كاسىپكەرلەرمەن جاسالاتىنىن اتاپ ءوتتى.

«پارك باسشىلىعىنىڭ اۋماققا كىرۋگە قاتىستى زاڭسىز ارەكەتتەرگە جول بەرگەنىن راستايمىز. ءبىز جاسىل ەكونوميكا باسقارماسىمەن، «مەدەۋ» پاركىنىڭ باسشىلىعىمەن كەلىسسوز جۇرگىزدىك جانە بۇل مەموراندۋم ىنتا بىلدىرگەن بارلىق كا­سىپكەرمەن جاسالادى دەگەن كەلىسىمگە كەلدىك»، دەدى پروكۋراتۋرا وكىلى سۆەتلانا كيم.

قۇجاتتى ازىرلەۋشىلەر مەم­لەكەت­تىك مەكەمەلەر تاراپىنان كا­­سىپ­كەرلەردىڭ قىزمەتىنە كيلىك­پەيتىنىن ايتادى. بۇل شەشىم پارك اۋماعىنا كىرەتىن ماشينالارعا قاتىستى ەكەنىن ايتا كەتۋ كەرەك.

«ەشكىم پارك اۋماعىنا كىرۋ ۋاقىتىن جانە پارككە اكەلىنگەن ادامداردىڭ سانىن بەلگىلەمەيدى. ويتكەنى «ەرەكشە قورعالاتىن تابيعي اۋماقتار تۋرالى» زاڭ بار، سوعان سايكەس كاسىپكەرلەر، مىسالى، تاستالعان قوقىس، رۇقسات ەتىلمەگەن اۆتوتۇراقتار ءۇشىن جاۋاپ بەرەدى»، دەدى پروكۋراتۋرا وكىلى.

بۇگىنگى تاڭدا پارك اۋماعىندا 2 كومپانيا جولاۋشىلار تاسىمالىمەن اينالىسىپ جاتىر، تاعى 5 كومپانيا مەموراندۋمعا قول قويىپ، جاقىن ارادا جۇمىسىن باستايدى. الايدا تاسىمالداۋشىلار بولسا مەموراندۋم كەدەرگى بولادى دەپ سانايدى. ويتكەنى پارك جەتەكشىلىگى اۆتوتۇراق ورىندارىن باقىلاي المايدى.

«الماتىدا قازىر ەلەكتر ماشينالارى سانگە اينالىپ تۇر. بۇگىندە «مەدەۋ» پاركىندە تىركەلگەن كولىك سانى 600-گە جۋىقتادى. بىلتىر عانا بۇل سان 60 ماشينانىڭ اينالاسىندا بولعان. ەكى جىلدان كەيىن كورسەتكىش 10 مىڭ بىرلىككە دەيىن جەتۋى مۇمكىن. وسىنداي اعىندى پارك قالاي باقىلاي الادى؟»، دەپ سۇراق قويدى Blu Sky جشس تاسىمالداۋشى كومپانيانىڭ وكىلى.

ءوز تاراپىنان «مەدەۋ» ۇلت­تىق پاركى ديرەكتورىنىڭ ورىنباسارى الماس اتتاپحانوۆ اۋماق­تا تۇراق ورىندارىنىڭ سانى شەك­تەۋلى ەكەنىن راستادى. ەلەكترمو­بيلدەردىڭ ءبىر بولىگى «مەدەۋ» پاركى ارقىلى «شىمبۇلاق» تاۋ شاڭعى كۋرورتىنىڭ مەيرامحانالارىنا ترانزيتپەن وتەدى.

«ەگەر دەمالىس كۇندەرى جۇرت مەدەۋگە جاپپاي اعىلاتىن بولسا، وندا كولىكتەردى جۇپ جانە تاق ساندار بويىنشا كىرگىزۋ تۋرالى ويلانۋ كەرەك شىعار؟ قازىر مۇنداي ماسەلە تۇرعان جوق. ويتكەنى مۇن­داي اعىن ازىرگە جوق. كەلەر شاقتا بۇل ماسەلەگە قايتا ورالۋىمىز كەرەك»، دەيدى ن.اشىربەكوۆ.

مەموراندۋم ارقىلى مەگاپوليس كاسىپكەرلەرى «مەدەۋ» پار­كىن­دە تاسىمالداۋ ىسىمەن اينالىسا الادى.

الماتى