بارشا الاش جۇرتى 18 جەلتوقساندا اقش-تىڭ لاس-ۆەگاس قالاسىندا جالاۋى جەلبىرەيتىن جارىستاعى دامير يسماعۇلوۆ پەن ارمان تسارۋكياننىڭ جەكپە-جەگىن كورۋگە ايرىقشا قۇشتارلىق تانىتىپ وتىر. جەڭىل سالماقتا كۇش سىناساتىن بۇل سپورتشىلاردىڭ ەكەۋى دە UFC-دە وزدەرىن مويىنداتىپ ۇلگەردى. قازىرگى كەزدە 31 جاستاعى ورىنبوردىڭ قازاعى اتالعان پروموۋشەننىڭ رەيتينگىندە 11-ورىندى يەلەنۋدە. قانداسىمىزدىڭ رەكوردى – 25 كەزدەسۋ, 24 جەڭىس, 13 نوكاۋت. رەسەيدىڭ نامىسىن قورعاپ جۇرگەن 26 جاستاعى ارميان ۇلتىنىڭ وكىلى يسماعۇلوۆتان ەكى ساتى جوعارى تۇر. ونىڭ كورسەتكىشى – 21 كەزدەسۋ, 18 جەڭىس, 12 نوكاۋت. ءبىر ايتا كەتەرلىگى, بۇل ەكى سپورتشىنىڭ دا مەنەدجەرى ءبىر. ول – قازاق جىگىتى سايات ابدراحمانوۆ.
ءدال سول تۋرنيردە قازاقستاندىق سەرگەي موروزوۆ پەن قىتايدا تۋىپ-وسكەن قانداسىمىز قايسار ماقسات تا ءوز ونەرلەرىن ورتاعا سالادى. 33 جاستاعى سەرگەي –اقتوبە وبلىسىنىڭ تۋماسى. بىلتىر ول يسلام ءدىنىن قابىلداپ, نامازعا جىعىلدى. ءوزىنىڭ سپورتتىق مانسابىندا 23 رەت وكتاگونعا شىققان وتانداسىمىز 18 رەت باسىمدىق تانىتىپ, 11 باسەكەنى مەرزىمىنەن بۇرىن اياقتادى. لاس-ۆەگاستا موروزوۆ ءوزىنىڭ قۇرداسى, اقش-تىڭ ءاپايتوسى دجۋرني نيۋسونمەن (10-3-0-1) ايقاسادى. ال 22 جاستاعى قايسار سپورتتىڭ وسى ءتۇرىن سەرىك ەتكەلى بەرى 10 كەزدەسۋ وتكىزىپ, سونىڭ بىرەۋىندە عانا ۇتىلدى. بيىل UFC-گە قابىلدانعان ول جاز ايىندا امەريكالىق ستيۆ گارسيانى ۇرىپ جىققان ەدى. ەندى ول 28 جاستاعى مەكسيكانىڭ مارقاسقاسى رافا گارسيامەن (13-3) شەبەرلىك بايقاسادى.
ال ولاردان بۇرىن مۇحيتتىڭ ارعى جاعالاۋىندا جالعاس جۇماعۇلوۆ (14-7) ءوزىنىڭ كەزەكتى جەكپە-جەگىن وتكىزەدى. ول وسى اپتانىڭ اياعىندا لاس-ۆەگاستا جۇدىرىقتاسادى. جالعاس ءۇشىن قازىر وتە جاۋاپتى ءسات. 34 جاستاعى قازاق سپورتشىسى الەمنىڭ ەڭ بەلدى پروموۋشەنىمەن كەلىسىمشارتقا وتىرعالى بەرى بەس باسەكەنىڭ تورتەۋىندە ۇتىلدى. بۇل جولى ول 31 جاستاعى امەريكالىق چارلز دجونسوندى (11-3) قالاي دا ۇتۋى كەرەك. ەگەر جۇماعۇلوۆ جەڭىلەتىن بولسا, وندا قانداسىمىز ءۇشىن بۇل UFC-دەگى سوڭعى جارىس بولۋى مۇمكىن.
23 جەلتوقساندا ماسكەۋدە وتەتىن اسا ءتۋرنيرى دە كوپشىلىكتىڭ قىزىعۋشىلىعىن تۋدىرۋدا. ويتكەنى جۇلدە قورى شامامەن
1 ملن اقش دوللارىن قۇرايتىن جارىستا «الاش پرايدتىڭ» فايتەرى, 30 جاستاعى ارتەم رەزنيكوۆ (23-6) كۇش سىناسادى. قاتارىنان توعىز باسەكەدە باسىمدىق تانىتقان شىعىس قازاقستان وبلىسىنداعى ريددەر قالاسىنىڭ تۋماسى جەڭىل سالماقتىلار اراسىندا اتالعان جارىستىڭ گران-پري دوداسىنىڭ جارتىلاي فينالىنا شىقتى. ەندى رەزنيكوۆ رەسەيلىك اندرەي كوشكينمەن (22-8) ايقاسادى. ەگەر ونى وتسە, فينالعا شىعادى. شەشۋشى ايقاستا ارتەمدى رەسەيدىڭ تاعى ءبىر وكىلى ەدۋارد ۆارتانيان كۇتىپ تۇر.
داڭقى جەر جارعان ارالاس جەكپە-جەكتىڭ حاس شەبەرى حابيب نۋرماگومەدوۆ قۇرعان Eagle FC ليگاسىنىڭ كەزەكتى جارىسى 10 جەلتوقساندا الماتىدا ۇيىمداستىرىلادى. سول كەشتە داۋرەن ەرمەكوۆ (15-5) فاريدۋن وديلوۆپەن (14-2-2) ايقاسادى. بىردەن ايتا كەتەيىك, تاجىكستاننىڭ سپورتشىسى وتە قارۋلى. بۇعان دەيىن ءبىز UFC-دەگى قازاقتىڭ باستى جۇلدىزى شاۆقات راحمونوۆتىڭ وكتاگوندا 16 كەزدەسۋ وتكىزىپ, بارلىعىندا ايقىن باسىمدىقپەن جەڭىسكە جەتكەنى جايىندا تالاي رەت جازدىق. بارلىعى دا باستاپقى كەزەڭدەردە ۇتىلدى. ونىمەن ءۇشىنشى راۋندقا دەيىن ايقاسۋعا تەك ءبىر سپورتشىنىڭ عانا كۇش-جىگەرى جەتتى. ول ءدال وسى وديلوۆ. وسىدان ءتورت جىل بۇرىن استانادا وتكەن جارىستا فاريدۋن ءبىزدىڭ شاۆقاتتى ءبىراز ابىگەرگە سالعان ەدى. ءتىپتى ۇرىپ قۇلاتۋعا دا شاق قالدى. دەسەك تە ءوزىنىڭ وجەتتىگىنىڭ ارقاسىندا راحمونوۆ سول باسەكەنى ءوز پايداسىنا شەشكەن-ءتىن. ەندى تاجىكتىڭ تارلانى قازاقتىڭ تاعى ءبىر قايسار ۇلى ەرمەكپەن «تىرەسەدى». 30 جاستاعى وديلوۆتىڭ سامبودان ازيا چەمپيوناتىنىڭ كۇمىس جۇلدەگەرى, جابىق عيماراتتاعى ازيا ويىندارىنىڭ قولا جۇلدەگەرى دەگەن اتاقتارى بار. سونداي-اق ول – Eagle FC-نىڭ ورتا سالماقتاعى چەمپيوندىق بەلبەۋىنىڭ يەگەرى.
سونىمەن قاتار 26 قاراشادا يندونەزيانىڭ بالي ارالىندا وتەتىن BRAVE CF جارىسىنداعى اسۋ الماباەۆ (16-2) پەن باحرەيندىك ماگومەد ءيدريسوۆتىڭ (6-0) جانە 2 جەلتوقساندا تاتارستاننىڭ المەتەۆسك قالاسىندا تۇساۋى كەسىلەتىن Eagle FC تۋرنيرىندەگى رۋسلان ساريەۆ (13-1) پەن رەسەيلىك رامازان اماەۆتىڭ (7-1) اراسىنداعى جەكپە-جەكتەردى دە جانكۇيەرلەر تاعاتسىزدانا كۇتۋدە. بۇل باسەكەلەردە اتالعان ۇيىمداردىڭ التىن بەلبەۋلەرى ساراپقا سالىنادى. ولاردان بولەك, وتاندىق «الاش پرايد» جانە «نايزا» پروموۋشەندەرى دە رەسپۋبليكامىزدىڭ بىرقاتار ايماقتارىندا قىزىقتى جارىستار ۇيىمداستىرۋدى كوزدەپ وتىر.
