«بۇگىن, 17 قاراشادا بۇكىل الەمدە حالىقارالىق شالا تۋىلعان نارەستەلەر كۇنى اتاپ وتىلەدى. قازاقستاندا نەوناتولوگتاردىڭ قۇزىرەتتىلىگى مەن وتاندىق ورتالىقتاردى جاڭا جابدىقتارمەن قامتاماسىز ەتۋدىڭ ارقاسىندا بالالاردى وڭالتۋ جوعارى دەڭگەيدە وتۋدە. جىل سايىن الەمدە 15 ميلليون ءسابي مەرزىمىنەن بۇرىن دۇنيەگە كەلەدى. قازاقستاندا جىل سايىن 22 مىڭعا جۋىق وسىنداي ءسابي تۋىلادى, نەوناتولوگتاردىڭ جۇمىسىنىڭ ارقاسىندا بالالاردىڭ ءومىر ءسۇرۋ كورسەتكىشى ارتىپ, بۇگىندە 70-80% جەتىپ وتىر», دەپ جازدى مينيسترلىكتىڭ ءباسپاسوز قىزمەتى.
شالا تۋعان بالالار كۇنى العاش رەت ۆەنادا 2009 جىلى اتاپ وتىلگەن. ءبىر جىل بۇرىن, 2008 جىلى قازاقستان دۇنيەجۇزىلىك دەنساۋلىق ساقتاۋ ۇيىمىنىڭ شالا تۋعان نارەستەلەردى كۇتۋ جونىندەگى باعدارلاماسىنا قوسىپ, سوعان سايكەس رەسپۋبليكادا 2008 جىلدان باستاپ ءتىرى تۋىلۋ كريتەريلەرى ەنگىزىلگەن. ول بويىنشا جۇكتىلىكتىڭ 22-اپتاسىندا دەنە سالماعى 500 گرامم جانە ودان دا كوپ تۋىلعان نارەستەلەردى كۇتۋ قاراستىرىلعان.
«2022 جىلدىڭ 9 ايىندا ەلىمىزدە 299 711 ءسابي دۇنيەگە كەلدى, ولاردىڭ 16,3 مىڭى مەرزىمىنەن بۇرىن تۋىلعان سابيلەر. شالا تۋىلعان نارەستەلەردىڭ ءومىر ءسۇرۋ كورسەتكىشىن جاقسارتۋ ءۇشىن قازاقستاندا ددسۇ ۇسىنعان جانە دالەلدى مەديتسينا قاعيداتتارىنا نەگىزدەلگەن وكپە ءتىنىنىڭ جەتىلۋىنە ارنالعان جاڭا تەحنولوگيالاردى جانە زاماناۋي دياگنوستيكالىق جانە ەمدەۋ اپپاراتۋراسى مەن دارىلىك زاتتاردى پايدالانا وتىرىپ, جاڭا تۋعان نارەستەلەردى رەانيماتسيالاۋ جانە قارقىندى تەراپيا ادىستەرى ەنگىزىلىپ, ۇزدىكسىز دامۋدا», دەپ قوسىپ ءوتتى مينيسترلىك وكىلدەرى.
ۆەدومستۆو مالىمەتىنشە, قازاقستاندا 39 پەريناتالدىق ورتالىق جانە 2 رەسپۋبليكالىق دەڭگەيدەگى اكۋشەرلىك ۇيىم جۇمىس ىستەيدى, ولاردا جاڭا تۋعان نارەستەگە دەر كەزىندە مەديتسينالىق كومەك كورسەتۋ جانە قاجەت بولعان جاعدايدا بوسانعاننان كەيىنگى العاشقى كۇندەرى حيرۋرگيالىق ارالاسۋ جاساۋ ءۇشىن ايەل بوسانعانعا دەيىن اۋرۋحاناعا جاتقىزىلادى.
سونداي-اق بالانىڭ اۋرۋلارىن ەرتە دياگنوستيكالاۋ ماقساتىندا, تۋىلعاننان كەيىن بىردەن پەرزەنتحانادا تۇقىم قۋالايتىن مەتابوليكالىق اۋرۋلاردى ەرتە انىقتاۋعا باعىتتالعان جانە فەنيلكەتونۋريا مەن تۋا بىتكەن گيپوتيرەوزعا تەكسەرۋدى قوسا العاندا, نەوناتالدى سكرينينگ جۇرگىزىلەدى.
دەنە سالماعى وتە تومەن تۋىلعان بالالاردا (2500 گ-نان از) شالا تۋىلعان نارەستەلەردىڭ رەتينوپاتياسىنا سكرينينگ جۇرگىزىلەدى, ودان كەيىن نەعۇرلىم ەرتە مەرزىمدە حيرۋرگيالىق ەمدەۋ جۇرگىزىلەدى.
«ەلىمىزدە بالالاردىڭ دەنساۋلىعىن جاقسارتۋ, سونداي-اق نارەستە ءولىمىن ازايتۋ ءۇشىن بىرقاتار جۇيەلى شارالار جۇزەگە اسىرىلۋدا. اتاپ ايتقاندا, اۋرۋلار مەن دامۋ بۇزىلىستارىن ۋاقتىلى انىقتاۋ ءۇشىن جىل سايىن 3,1 ميلليوننان استام بالانى, سكرينينگتىك تەكسەرۋلەر – 1,6 ميلليوننان استام جاس بالالاردى قامتيتىن پروفيلاكتيكالىق تەكسەرۋلەر جۇرگىزىلەدى. ەرتە جاستاعى بالالارعا كۇتىم جاساۋ ماسەلەلەرى بويىنشا كەڭەس بەرۋ ءۇشىن 1500-دەن استام بالانى دامىتۋ كابينەتى ۇيىمداستىرىلعان», دەدى مينيسترلىكتىڭ ءباسپاسوز قىزمەتى.
