«MIG QAZAQSTAN» دەپ اتالاتىن جاڭا يادرولىق مەديتسينا ورتالىعىندا ەندى ناۋقاستارعا جوعارى تەحنولوگيالىق اپپاراتتىڭ كومەگىمەن ەمدەۋ شاراسى جۇرگىزىلەدى. اتاپ ايتقاندا, «Varian Halcyon» قوندىرعىسى ارقىلى قاتەرلى ىسىككە شالدىققان ناۋقاستار ساۋلەلىك تەراپيا بويىنشا ەم قابىلدايدى. مۇنداي قۇرىلعى كورشىلەس تمد مەملەكەتتەرى ىشىندە وزبەكستان مەن قىرعىزستاندا, ءتىپتى تاجىكستاندا دا جوق. سوندىقتان ورتالىق ازيادا تەڭدەسى جوق قۇرىلعى قازاقستاندا العاش رەت شىمكەنت قالاسىنداعى ونكولوگيالىق ورتالىقتا ورناتىلدى.
ايتا كەتۋ كەرەك, پەت/كت – بۇل كومپيۋتەرلىك توموگرافيامەن بىرىكتىرىلگەن پوزيتروندى-ەميسسيالىق توموگرافيا. ونىڭ باستى ەرەكشەلىگى, گليۋكوزا نەگىزىندە راديوفارمپرەپاراتتاردىڭ كومەگىمەن ونكولوگيالىق اۋرۋلار مەن باس ميىنىڭ اۋرۋلارىنا ءدال دياگنوستيكا جاساۋعا مۇمكىندىك بەرەدى.
قاتەرلى ىسىكتىڭ باستاپقى پايدا بولۋ ساتىسىن انىقتاۋعا جانە پاتولوگيالىق پروتسەستى باسقا ادىستەرگە قاراعاندا ەرتەرەك بىلۋگە سەپتىگىن تيگىزەتىن وسى زاماناۋي مەديتسينالىق قۇرال ارقىلى دارىگەرلەر وبىر اۋرۋلارىنىڭ وشاعىن ءدال تاۋىپ, پاتسيەنتتەردىڭ ەمدىك شارالارىن دەر كەزىندە باستاۋعا مۇمكىندىك تۋعىزادى.
ءوز كەزەگىندە قالا باسشىسى م.ايتەنوۆ يادرولىق مەديتسينالىق كلاستەر ءۇشىنشى مەگاپوليستىڭ مەديتسينالىق ءتۋريزمىن دامىتۋعا سەرپىن بەرەتىن بىردەن-ءبىر جوبا ەكەنىن ايتىپ ءوتتى.
«وسى وزىق تەحنولوگيانىڭ ناتيجەسىندە ءبىز شىمكەنت قالاسىنا عانا ەمەس, تۇركىستان, جامبىل, قىزىلوردا وبلىستارىنىڭ حالقىنا دا ساپالى مەديتسينالىق قىزمەت كورسەتە الامىز. مەملەكەتتىڭ باستى قۇندىلىعى ادام مەن ونىڭ دەنساۋلىعى ەكەنىن ەسكەرسەك, اتقارىپ جاتقان ءىس-شارالار وسى زاڭ تالابىنان تۋىپ وتىر. نەگىزىندە باعاسى وتە قىمبات سانالاتىن بۇل ەم-شارا ەندى جەرگىلىكتى حالىققا دا قولجەتىمدى بولادى», دەدى قالا اكىمى.
ينۆەستورلاردىڭ قارجىلاندىرۋىمەن اشىلعان بۇل ورتالىق زاماناۋي تەحنولوگيالىق اپپاراتتاردىڭ كومەگىمەن قاتەرلى ىسىكتى ەرتە كەزەڭدە انىقتاپ, ناۋقاستارعا دەر كەزىندە ساپالى مەديتسينالىق كومەك كورسەتۋمەن ەرەكشەلەنەدى.
سونداي-اق اشىلۋ راسىمىندە جوبا ينۆەستورى «المالى» حولدينگى باس ديرەكتورىنىڭ ورىنباسارى ب.ساپاروۆ تا قالا باسشىلىعىمەن بىرگە يادرولىق مەديتسينا ورتالىعىنىڭ مۇمكىندىكتەرىمەن تانىستى.
ءوز كەزەگىندە جوبا مەملەكەت-جەكەمەنشىك ارىپتەستىك شەڭبەرىندە «مەدينۆەستگرۋپپ قازاقستان» جشس-نىڭ قولداۋىمەن جۇزەگە اسقان. مەملەكەت تاراپىنان ورتالىق عيماراتىن تۇرعىزۋعا قارجى بولىنسە, وزگە جۇمىستار ينۆەستوردىڭ قاراجاتى ەسەبىنەن اتقارىلدى. قالاداعى اتالعان ورتالىق الداعى ۋاقىتتا رەسپۋبليكاداعى ونكولوگيالىق اۋرۋلاردى زاماناۋي تاسىلمەن ەمدەيتىن ءۇشىنشى ءىرى ەمدەۋ مەكەمەسىنە اينالادى. اسىرەسە, ورتالىققا ساۋلە تەراپياسىنا ارنالعان سوڭعى ۇلگىدەگى جابدىق ساتىپ الىندى. سوندىقتان بۇل رەسپۋبليكادا عانا ەمەس, ورتالىق ازيادا بالاماسى جوق اپپارات جانە ءبىرىنشى بولىپ شىمكەنتتە ىسكە قوسىلىپ وتىر.
قالا اكىمىنىڭ ايتۋىنشا, گەوساياسي جانە پاندەميالىق جاعدايعا بايلانىستى ورتالىقتىڭ اشىلۋى 4 ايعا كەشىككەن. دەسەك تە, ينۆەستوردىڭ قاجىرلى ەڭبەگىنىڭ ناتيجەسىندە جوبا اياقسىز قالعان جوق. سول ءۇشىن دە قالا باسشىسى كاسىپكەرگە ءوز اتىنان ريزاشىلىعىن ءبىلدىردى. بۇگىنگى تاڭدا ءبىر اپتانىڭ ىشىندە 22 ناۋقاس ەم الىپ ۇلگەرگەن. سونداي-اق قىزمەتكەرلەر ارنايى بىلىكتىلىك ارتتىرۋ كۋرسىنان دا ءوتىپ كەلدى.
مامانداردىڭ ايتۋىنشا, جوبا اياسىندا راديوفارمپرەپاراتتاردىڭ كەڭەيتىلگەن جەلىسىن جانە ونكولوگيالىق اۋرۋلاردى ەمدەۋگە ارنالعان جوعارى دالدىكتەگى راديولوگيا ورتالىعىن پايدالانا وتىرىپ, راديونۋكليدتىك دياگنوستيكا ورتالىعىن اشۋ ءىسى دە كوزدەلىپ جاتىر.
«شىمكەنتتە كوپتەن كۇتكەن يادرولىق مەديتسينالىق ورتالىقتىڭ تۇساۋى كەسىلدى. مۇنداعى قوندىرعى – Siemens كومپانياسىنىڭ كومپيۋتەرلىك توموگرافيامەن بىرىكتىرىلگەن پوزيتروندى-ەميسسيالىق توموگرافيا (پەت/كت) اپپاراتى. ەڭ باستىسى, بۇل قۇرىلعى شىمكەنتتىكتەرگە تەرەڭدەتىلگەن دياگنوستيكا جاساۋعا مۇمكىندىك بەرەدى. ماسەلەن, پەت/كت اپپاراتى جوق كەزدە ءبىز ناۋقاستاردى استانا مەن الماتى قالالارىنا جولداما نەگىزىندە جىبەرەتىن ەدىك. 2022 جىلدىڭ 10 ايىندا 240 ناۋقاستىڭ دياگنوستيكالىق تەكسەرۋدەن ءوتۋى ءۇشىن جولعا شىعۋىنا تۋرا كەلدى. قۇرىلعى كۇنىنە 20 ادامدى انىقتاپ-تەكسەرە الادى. ياعني پەت/كت شىمكەنتتىڭ ونكولوگياداعى دياگنوستيكا ماسەلەسىن تولىق شەشە الادى. سەبەبى وسى ۋاقىتقا دەيىن ءار اي سايىن پەت/كت كومەگىنە 20-30 ناۋقاستان جۇگىنىپ كەلگەن. ال جاڭا ورتالىقتىڭ جۇمىسىن باستاۋمەن بىزگە كورشىلەس وڭىرلەردەن جانە مەملەكەتتەردەن مەديتسينالىق قىزمەتكە جۇگىنگەن ازاماتتار كوپتەپ كەلە باستايدى. بۇل ءوز كەزەگىندە مەديتسينالىق ءتۋريزمدى دامىتۋعا كەرەمەت مۇمكىندىكتەر سىيلايدى. سونىمەن قاتار بۇل ورتالىقتا ناۋقاستاردى ساۋلەلى تەراپيامەن ەمدەۋ شارالارى قولعا الىنىپ وتىر. بۇگىنگە دەيىن مىڭعا جۋىق ناۋقاس ەم الىپ ۇلگەردى. Varian فيرماسىنىڭ Halcyon ساۋلەلى ەمدەۋ جۇيەسىنىڭ قاتەرلى ىسىكتى ەمدەۋدەگى كومەگى زور بولىپ تۇر. پەت/كت رەسپۋبليكادا ەكى-ءۇش-اق قالادا بولسا, Halcyon ساۋلەلى ەمدەۋ جۇيەسى رەسپۋبليكادا العاش رەت شىمكەنتتە ورناتىلىپ وتىر», دەدى قالالىق دەنساۋلىق باسقارماسىنىڭ باسشىسى ن.اسىلبەكوۆ.
ال «MIG QAZAQSTAN» يادرولىق مەديتسينالىق ورتالىعىنىڭ ديرەكتورى داۋلەت ەرجانوۆتىڭ ايتۋىنشا, ورتالىق جىلىنا پەت/كت اپپاراتىندا
5 مىڭعا جۋىق ازاماتقا دياگنوستيكا جاساپ, قاتەرلى ىسىككە شالدىققان 5 مىڭداي ناۋقاسقا Halcyon ساۋلەلى ەمدەۋ جۇيەسى ارقىلى كومەك كورسەتەتىن بولادى.
«يادرولىق مەديتسينا ورتالىعىنىڭ اشىلۋى – وڭتۇستىك ءوڭىردىڭ عانا ەمەس, تۇتاستاي ەلىمىزدىڭ مەديتسيناسىن دامىتۋعا جاساعان ۇلكەن قادام دەپ باعالاعان ءجون. ارينە, حالىقتىڭ امان-ساۋ بولعانى ءبىزدىڭ باستى تىلەگىمىز بەن ماقساتىمىز. دەگەنمەن ءومىر بولعان سوڭ ادام تاعدىرىندا ءتۇرلى جاعدايلاردىڭ ورىن الاتىنى زاڭدى قۇبىلىس. ياعني قاتەرلى ىسىكتەن ەشكىم ءبىر-بىرىنە كەپىلدىك بەرە المايدى. سوندىقتان ورتالىقتاعى زاماناۋي قۇرىلعىلار وبىر اۋرۋىن ەرتە كەزەڭدە انىقتاپ, ونىڭ وزگە ورگاندارعا ءوتىپ كەتپەۋىنىڭ الدىن الادى جانە جانى قينالعان ناۋقاستار ءۇشىن اۋىرتپاي ەمدەۋگە بىردەن-ءبىر سەپ. سونىمەن بىرگە پەت/كت حالىقتىڭ ءومىر ءسۇرۋ جاسىن ۇزارتۋعا دا ءوزىنىڭ ۇلكەن ۇلەسىن قوسارى داۋسىز. جوباعا جالپى قۇنى 6,5 ملرد تەڭگە قارجى جۇمسالدى. ءبىز ءارى قاراي دا ورتالىقتى دامىتىپ, وڭتۇستىكتەگى يادرولىق مەديتسينانىڭ حابىنا اينالدىرۋدى الدىمىزعا ماقسات تۇتتىق», دەدى ينۆەستور ب.ساپاروۆ.
بۇل رەتتە مەديتسينالىق مەكەمەنىڭ راديولوگى و.اقجولدىڭ ايتۋىنشا, يادرولىق ورتالىقتاعى دياگنوستيكا بەلگىلەنگەن تارتىپپەن جۇزەگە اسىرىلاتىن بولادى.
«الدىمەن ناۋقاس دارىگەردەن جولداما الىپ, يادرولىق مەديتسينا ورتالىعىنىڭ قابىلداۋىنا جازىلادى. ودان كەيىن قابىلداۋدان 36 ساعات بۇرىن ارنايى ديەتالىق رەجىمدى ساقتاي وتىرىپ, زەرتتەۋگە دايىندالادى. بۇدان سوڭ ورتالىققا كەلىپ, راديوفارمپرەپاراتتى قابىلدايدى. ءارى قاراي 50 مينۋتتاي دارىگەردىڭ باقىلاۋىندا بولىپ, پەت/كت اپپاراتىنا تۇسەدى. راديولوگ-مامان ناۋقاستى 20 مينۋتتاي اپپاراتتىڭ كومەگىمەن تەكسەرىپ, الىنعان دەرەكتەردى وڭدەيدى. ناۋقاستىڭ دەنساۋلىعى جايلى ۇيعارىمدى دارىگەر 2 تاۋلىكتەن سوڭ شىعارىپ بەرەدى», دەدى مامان.
ايتا كەتۋ كەرەك, ورتالىقتا مەديتسينالىق كومەكتىڭ كەپىلدىك بەرىلگەن كولەمى شەڭبەرىندە تەگىن جانە قولجەتىمدى زەرتتەۋلەر جاسالادى. سونداي-اق ماماندار ەرتە انىقتالعان قاتەرلى ىسىككە دەر كەزىندە ەم-دوم جۇرگىزەدى. مۇندايدا دەرتتەن ايىعۋ مۇمكىندىگىنىڭ مولايا تۇسەتىنى بەلگىلى. قورىتا ايتقاندا, ورتالىقتاعى قۇرىلعىنىڭ ءبىرى دەرتتى ەرتە انىقتاۋعا كومەكتەسسە, ەكىنشىسى ناۋقاستىڭ وزگە اعزاسىنا زيانىن تيگىزبەي, قاتەرلى ىسىكتى ساۋلە ارقىلى ەمدەۋگە مۇمكىندىك بەرەدى. مۇنىمەن قوسا ونكولوگيالىق دەرتتەن بولاتىن ءولىم-ءجىتىمدى ازايتىپ, حالىقتىڭ ءومىر ءسۇرۋ جاسىنىڭ ۇزاقتىعىن ارتتىرۋعا پايداسىن تيگىزەرى انىق.
شىمكەنت
