توقسانىنشى جىلدارى بەرىك جەتپىسباەۆتىڭ اتاعى الىسقا جايىلدى. بالاۋسا شاعىنان باقىت قوقىسبەكوۆتەي بىلىكتى باپكەردەن ءتالىم-تاربيە العان سامبوشى ۋاقىت وزا ەلىمىزدىڭ بەدەلدى بالۋاندارىنىڭ بىرىنە اينالدى. 57 جانە 62 كيلو سالماق دارەجەلەرىندە بەلدەسكەن ول 1994 جىلى يۋگوسلاۆيانىڭ نوۆيت ساد قالاسىندا جاسوسپىرىمدەردىڭ الەم بىرىنشىلىگىندە كۇمىس مەدالدى يەلەنسە, كەلەسى جىلى بولگاريانىڭ باس شاھارى – سوفيادا جاستار اراسىندا وتكەن الەم چەمپيوناتىندا باس جۇلدەنى ولجالادى. ودان كەيىن ەرەسەكتەر دۋىنا ەركىن قوسىلىپ, كوپتەگەن بايراقتى باسەكەدە اتوي سالدى. اتاپ ايتساق, توكيودا الەم چەمپيوناتىنىڭ قولا جۇلدەگەرى, ۇلانباتىر مەن كراسنويارسكىدە ازيا چەمپيونى, ماسكەۋدە الەم كۋبوگىنىڭ كۇمىس جۇلدەگەرى, كستوۆودا «حارلامپيەۆ مەموريالىنىڭ» ءفيناليسى دەگەن اتاقتارعا يە بولدى. وسى تابىستارىنىڭ ارقاسىندا جەتپىسباەۆ «حالىقارالىق دارەجەدەگى سپورت شەبەرى» ءنورماتيۆىن ورىندادى.
بەرىك سامبومەن قاتار دزيۋدونى دا جەتىك مەڭگەردى. ءالى ەسىمىزدە,1996 جىلى الماتىدا سانجار جاندوسوۆتى ەسكە تۇسىرۋگە ارنالعان حالىقارالىق تۋرنير دۇركىرەپ تۇرىپ وتكەن ەدى. ۇلتتىق قۇراما باپكەرلەرى بۇل جارىستى تاياۋ كۇندەرى اتلانتادا الاۋى تۇتاناتىن وليمپيا ويىندارى قارساڭىنداعى ىرىكتەۋ سىنى رەتىندە قاراستىردى. قاتىسۋشىلار قاتارىندا جەتپىسباەۆ تا بولدى. ول كەزدە كەيىپكەرىمىز بەدەلدى سامبوشى رەتىندە ءوزىن مويىنداتقانىمەن, دزيۋدو كۇرەسىنىڭ مايتالماندارى ونى ءجىتى تانىمايتىن. سوعان قاراماستان, بەرىك تاتاميدە ءوزىن جاقسى قىرىنان كورسەتتى. باستاپقى بەلدەسۋلەرىندە ول زەكەن شايمەردەنوۆ پەن يۆان باعىلاەۆ سىندى ەلىمىزدىڭ اتاقتى دزيۋدوشىلارىن ايقىن باسىمدىقپەن جەڭىپ, جەڭىس تۇعىرىنا كوتەرىلدى. سول كەزدە سامبودان ەندى عانا اۋىسىپ كەلگەن 20 جاستاعى جىگىتتىڭ حالىقارالىق ارەنادا وزدەرىنىڭ مىقتىلىعىن مويىنداتىپ ۇلگەرگەن تاجىريبەلى تاتامي شەبەرلەرىن «قىلقىندىرۋ» ادىسىمەن ۇتقانى بالۋان شولاق اتىنداعى سپورت سارايىنا جينالعان سان مىڭ جانكۇيەردىڭ تاڭدانىسىن تۋدىرعان ەدى. بىراق قاپيادا العان جاراقاتىنىڭ سالدارىنان قازاقتىڭ قايسار ۇلىنا تورتجىلدىقتىڭ باستى دوداسىندا باق سىناۋ باقىتى بۇيىرمادى. دەسەك تە, سپورتتىڭ بۇل تۇرىنەن دە «سپورت شەبەرى» اتانعان جەتپىسباەۆ كوپتەگەن حالىقارالىق جارىستا ەل نامىسىن ابىرويمەن قورعادى.
بوزكىلەممەن قوشتاسقاننان كەيىن كەيىپكەرىمىز بىرەر جىل جاتتىقتىرۋشىلىق قىزمەتپەن اينالىستى. بۇل رەتتە دە نەسىبەسىز ەمەس. بەرىك سارسەنبەك ۇلى ءوزىنىڭ اۋىلداسى ازامات مۇقانوۆتىڭ مىقتى بالۋان بولىپ قالىپتاسۋىنا سۇبەلى ۇلەس قوستى. ءدال وسى ماماننان ءتالىم-تاربيە العان ازامات دزيۋدودان الەم چەمپيوناتىنىڭ كۇمىس جانە ازيا ويىندارىنىڭ قولا جۇلدەگەرى, سامبودان الەم چەمپيونى جانە سول جارىستىڭ ءتورت دۇركىن قولا جۇلدەگەرى دەگەن اسا مارتەبەلى اتاقتارعا يە بولدى. كەيىننەن ول ءوزىنىڭ جەكە كاسىبىن اشتى. بىراق قايدا جۇرسە دە ول سپورتتان الىستاعان جوق. جەتپىسباەۆ وسى كۇنگە دەيىن جاس جەتكىنشەكتەر مەن جالىندى جاستارعا ۇنەمى قامقورلىق كورسەتىپ, دۇرىس باعىت-باعدار بەرىپ ءجۇر.
اتالعان ءتۋرنيردى تاماشالاۋ ءۇشىن ونىڭ دوستارى, جورا-جولداستارى, بۇرىنعى كوماندالىق ارىپتەستەرى قوناەۆقا كوپتەپ كەلدى. سولاردىڭ اراسىنان كەزىندە الەمدىك جانە قۇرلىقتىق دەڭگەيدەگى دودالاردا دارالانعان ەرجان كەنجەباەۆ, ايدار قايىرباەۆ, مارات تاقانوۆ, مەيىرجان قاشاعانوۆ سىندى بالۋانداردى, رۋسلان سىمتىقوۆ پەن داستان سادۋاقاسوۆتاي مايتالمان مامانداردى كوزىمىز شالدى. باسەكەلەردىڭ وزىنە كەلەر بولساق, جەرگىلىكتى سپورت مەكتەبىنىڭ تاتاميىندە مۇحامماد رىسىلحان, ازامات نۇرباق, بەكزات ەركىن, جانبولات مالىك, ماحمۇد ايدوس ۇلى, جانايىم ماراتبەك, تاۋكە داۋلەت ۇلى, ابدراحمان داۋرەن ۇلى, دىنمۇحامەد تىنىشبەك, داۋرەن ىبىرايىم, ەسبول ءابدىراحمان, زەينەپ تىلەپبەرگەن, ايگەرىم سەرجانقىزى, سۇلۋ ايىپباەۆا, نايليا اكىمباي جانە تاعى باسقا بالعىن بالۋاندار ءوز سالماق دارەجەلەرى بويىنشا جەڭىس تۇعىرىنىڭ ەڭ بيىك ساتىسىنا كوتەرىلىپ, كورەرمەندەردىڭ قوشەمەتىنە بولەندى.
– مەنىڭ ومىردە دە, سپورتا دا ۇستازدارىم مىقتى بولدى. بوزكىلەمدە باقىت قوقىسبەكوۆ, كەرەي قويشىبەك, ماناربەك تاۋتانوۆ سىندى بىلگىر باپكەرلەردەن كوپ نارسە ۇيرەندىم. ومىردە قايرات مەيرەمباەۆ, قايرات شاراباسوۆ, رادج ميماش ۇلى, الپىس راقىموۆ, ەرجان كەنجەباەۆتان ۇلكەن تاعىلىم مەن جاقسى ءتالىم-تاربيە الدىم. وسى ازاماتتارعا مەن ماڭگى قارىزدارمىن. اللاعا شۇكىر, سپورتتا ءبىراز بەلەستى باعىندىردىم. ءدۇبىرلى دودالاردا ەل نامىسىن ابىرويمەن قورعادىم. باپكەر رەتىندە دە مويىندالدىم. ەندى ءوسىپ كەلە جاتقان جاستارعا قامقورلىق كورسەتىپ, ولارعا دۇرىس باعىت-باعدار بەرۋدى وزىمە مىندەت سانايمىن. سول ءۇشىن دە جەرگىلىكتى ازاماتتارمەن بىرلەسە وتىرىپ, قوناەۆ قالاسىندا وسىنداي تۋرنير ۇيىمداستىرىپ جاتقان جايىمىز بار. ارينە, بۇل جارىستا كۇرەسىپ جاتقان جاس جەتكىنشەكتەردىڭ بارلىعى دا كەلەشەكتە چەمپيون بولمايتىنى انىق. بىراق ءبىز ءۇشىن باستى نارسە بۇل ەمەس. ءبىزدىڭ مىندەت – جاستاردى سالاماتتى ءومىر سالتىنا ىنتالاندىرىپ, ولاردى وتانىن سۇيەتىن, تۋعان جەرىن قاستەرلەيتىن, دەنى ساۋ, رۋحى مىقتى, پاراساتى بيىك ازاماتتار ەتىپ تاربيەلەۋ, – دەيدى بەرىك جەتپىسباەۆ.
قوناەۆ
