مەملەكەت باسشىسىنىڭ ايتۋىنشا, قازاقستان - ىشكى جانە سىرتقى ساياساتتا جانە بارلىق سالادا ادىلدىك قاعيداتىن بەرىك ۇستاناتىن مەملەكەت.
ء«بىزدىڭ ۇلتتىق ەرەكشەلىگىمىزدىڭ باستى سيمۆولدارى – كوك بايراعىمىز, تولقۇجاتىمىز جانە مەملەكەتتىك ءتىلىمىز. وزگە ەلدەر قازاقستان ازاماتىن, ەڭ الدىمەن, وسى قۇندىلىقتار ارقىلى تانىپ بىلەدى. بەرەكەلى قوعام جانە مىقتى مەملەكەت قۇرۋدىڭ تاعى ءبىر ماڭىزدى شارتى بۇل – الەۋمەتتىك ادىلدىك. ونسىز ەشبىر سالا دامىمايدى. ادىلەتسىز شىعارىلعان شەشىم قوعامعا ىرىتكى سالىپ, جۇرتتىڭ نارازىلىعىن تۋدىرادى. سوندىقتان ەشقاشان ادىلدىكتەن اتتاۋعا بولمايدى. ءبىز ىشكى جانە سىرتقى ساياساتتا, جالپى, بارلىق سالادا وسى ۇستانىمدى ساقتايمىز. ويتكەنى بۇل – تۇراقتىلىقتىڭ, تاتۋلىق پەن تىنىشتىقتىڭ باستى كەپىلى. ادىلدىك بار جەردە زاڭ ساقتالادى, ءتارتىپ بۇزىلمايدى. ءبىز وسى قاعيداتتاردى باسشىلىققا الا وتىرىپ, جاڭا قوعام قۇرامىز. وسى ورايدا, ەل اعالارىنىڭ جاستارعا دۇرىس باعىت-باعدار بەرۋى اسا ماڭىزدى. باستى قۇندىلىقتارىمىزدى وسكەلەڭ ۇرپاققا بايىپپەن ءتۇسىندىرىپ, ساناسىنا ءسىڭىرۋ – بارىمىزگە ورتاق پارىز. وسىندا وتىرعان ازاماتتار, سىزدەر دە وسى جۇمىسقا مول ۇلەس قوساسىزدار دەپ سەنەمىن», دەدى پرەزيدەنت كەزدەسۋ بارىسىندا.
ءسوزىن قورىتىندىلاي كەلە, مەملەكەت باسشىسى پرەزيدەنتتىك قىزمەتتىڭ نەگىزگى ءرولىن اتادى.
«مەنىڭ تۇسىنىگىمدە, پرەزيدەنت – جالدامالى مەنەدجەر, حالىق ونىمەن بەلگىلى ءبىر مەرزىمگە كەلىسىمشارت جاسايدى. ازاماتتاردىڭ ەركىن تاڭداۋىنىڭ ناتيجەسىندە ەلدەگى ەڭ جوعارى مەملەكەتتىك لاۋازىمعا يە بولعان ادام ميلليونداعان وتانداستارىنىڭ داۋىسىمەن بەكىتىلگەن كەلىسىمشارتقا قول قويادى. سوندىقتان پرەزيدەنتتىڭ لاۋازىمى – ارتىقشىلىقتان بۇرىن زور جاۋاپكەرشىلىك. بۇل قىزمەتتى اتقارعان جانە اتقاراتىن ءاربىر ادام ەڭ قاتال ءۇش سوتتىڭ – حالىقتىڭ, تاريحتىڭ جانە ءوز ار-ۇجدانىنىڭ الدىندا جاۋاپ بەرەدى. سەنىم – ەلدىڭ يگىلىگى مەن دامۋىنا, حالىقتىڭ ىنتىماعىنا نەگىز بولاتىن قاستەرلى ۇعىم», دەپ اتاپ ءوتتى قاسىم-جومارت توقاەۆ.
