«مەن وبلىستارعا ساپارىمدا جالپى ەلدىڭ ماسەلەلەرىن كوتەرىپ ءجۇرمىن. ايماقتاردا ايتىلعان وي-پىكىرلەرىمدى بۇگىن قورىتقىم كەلىپ وتىر. ءبىز جاڭا قوعام قۇرىپ جاتىرمىز. سوڭعى بىرنەشە جىلدا ساياسي رەفورما اياسىندا كوپتەگەن وزگەرىس جاسادىق. بىراق ءبىز تەك ساياسي ماسەلەمەن شەكتەلىپ قالمايمىز. الدا ەكونوميكالىق, الەۋمەتتىك جانە باسقا دا باعىتتار بويىنشا اۋقىمدى جۇمىس تۇر. دەگەنمەن, تۇپكى ماقساتىمىزعا جەتۋ ءۇشىن بۇل جەتكىلىكسىز. ءبىز وزگەرىستى, ەڭ الدىمەن, وزىمىزدەن باستاۋىمىز كەرەك. ۇلتتىڭ جاڭا ساپاسىن قالىپتاستىرۋىمىز قاجەت. ءار ازاماتتىڭ, بۇكىل قوعامنىڭ ساناسى وزگەرمەيىنشە, باسقا رەفورمانىڭ ءبارى بەكەر. ۇلتتىڭ جاڭا ساپاسى جاڭا قۇندىلىقتار ارقىلى قالىپتاسادى», دەدى قاسىم-جومارت كەمەل ۇلى.
وسى ورايدا, مەملەكەت باسشىسى قازاق حالقى ءۇشىن ماڭىزدى قاسيەتتەر مەن قۇندىلىقتارعا قىسقاشا توقتالىپ ءوتتى.
ء«بىرىنشى ماڭىزدى ماسەلە. ءبىز ەڭبەكقور بولۋىمىز قاجەت. قوعامىمىزدا ەڭبەك ادامى ءبىرىنشى ورىندا تۇرۋعا ءتيىس. شىن مانىندە, بارلىق جەتىستىكتىڭ باستاۋى – ادال ەڭبەك جانە ىسكەرلىك. تابىسقا جەتۋدىڭ جالعىز جولى – ءوز كاسىبىنىڭ شەبەرى بولۋ جانە ەرىنبەي ەڭبەك ەتۋ. ءتۇرلى قارجى پيراميداسىنا, قۇمار ويىندارعا اۋەس ادامدار اقشانىڭ وڭاي جولمەن كەلمەيتىنىن ءتۇسىنۋى كەرەك. ماڭداي تەرىمەن تابىس تاپقان ادام ونى ماقساتسىز شاشىپ, ىسىراپ قىلمايدى. ۇنەمشىل, قاناعاتشىل ءارى ۇقىپتى بولادى», دەپ اتاپ ءوتتى پرەزيدەنت.
بۇل رەتتە قاسىم-جومارت توقاەۆ بەلگىلى اكادەميك اسقار جۇمادىلداەۆتىڭ ءسوزىن نەگىزگە الىپ, جاستاردى ادال ەڭبەك ەتۋگە شاقىردى.
«اكادەميك اسقار جۇمادىلداەۆ ايتقان پايىممەن تولىق كەلىسەمىن. حالقىمىز وسىنداي كۇردەلى زاماندا ەڭ الدىمەن, الەمگە پراگماتيكالىق كوزبەن قاراۋى كەرەك. جاستارىمىزدىڭ ساناسى سەرگەك, ەتى ءتىرى, شيراق بولۋى قاجەت. كورشى مەملەكەتتەردەگى جاس ازاماتتار شەتەلگە بارىپ, كاسىپورىندار, دۇكەندەر اشىپ, جاقسى ءومىر ءسۇرۋ ءۇشىن جاڭا داعدىلاردى يگەرىپ جاتىر. ولار, شىن مانىندە, باسەكەگە قابىلەتتى ەڭبەكقور ادامدار. قازىرگى جاعدايدا مەن ءبىر جەردە ءومىر سۇرەمىن, بالالارىممەن ءومىر بويى بىرگە تۇرامىن دەگەن ۇعىم ابدەن ەسكىرگەن. سوندىقتان قۇرمەتتى اعايىن, ءبارىمىز وزىق بولايىق! سوندا عانا جاستارىمىزدىڭ كوزى اشىق, كوكىرەگى وياۋ, ويلارى ۇشقىر بولادى, كوپتەگەن سىن-قاتەرگە توتەپ بەرە الادى. ءوز جاعدايىن وزدەرى جاساپ, جاقسى ءومىر سۇرە الادى», دەدى مەملەكەت باسشىسى.
پرەزيدەنتتىڭ قوعامدا دۇرىس قۇندىلىقتار ورنىقپاسا, جەمقورلىق, ماسىلدىق, ىسىراپشىلدىق سياقتى الەۋمەتتىك كەسەلدەر تامىر جاياتىنىن قاداپ ايتتى.
ء«بىز جاستارعا وزىق بىلىممەن قاتار ونەگەلى تاربيە بەرۋگە ءتيىسپىز. ۇرپاقتىڭ بويىنا ادامگەرشىلىك قاسيەتتى سىڭىرە الماساق, ءبىلىمنىڭ پايداسىنان زيانى كوپ بولۋى مۇمكىن. قانشا جەردەن ءبىلىمدى بولسا دا, جاقسىلىققا ۇمتىلماعان ادامنان ەش قايىر جوق. قوعامدا دۇرىس قۇندىلىقتار ورنىقپاسا, جەمقورلىق, ماسىلدىق, ىسىراپشىلدىق سياقتى الەۋمەتتىك كەسەلدەر تامىر جايادى. قاتىگەزدىك, نەمقۇرايلىق, جالقاۋلىق – ۇلتتىڭ بولمىسىنا تەرىس اسەر ەتەتىن جاعىمسىز ادەتتەر. قازىرگى الماعايىپ زاماندا ءبىز سابىرلى, بايىپتى بولۋىمىز قاجەت. ءتۇرلى ارانداتۋعا ىلەسپەي, ءار نارسەگە ۇستامدىلىقپەن قاراۋىمىز كەرەك. بارلىعىن ءبىر ساتتە وزگەرتەمىن دەۋگە بولمايدى. حالىققا قاجەتتى شارالاردى بىرتىندەپ جۇزەگە اسىرىپ جاتىرمىز.
ەلىمىزدە جاۋاپكەرشىلىك يدەولوگياسى ورنىعۋعا ءتيىس. ويلانباي جاسالعان ءبىر قادام, اڭداماي ايتىلعان ءبىر اۋىز ءسوز, اشۋمەن ىستەلگەن ءبىر ارەكەت بۇكىل ەلگە قاۋىپ ءتوندىرۋى مۇمكىن. سوندىقتان ءاربىر ادام ەل الدىنداعى جاۋاپكەرشىلىگىن تەرەڭ سەزىنۋگە ءتيىس. ءبىز ءاردايىم ءوزارا باۋىرمالدىق پەن تىلەكتەستىكتى, مەيىرىمدىلىكتى دارىپتەۋىمىز كەرەك. ازاماتتاردىڭ ءبىر-بىرىنە قامقورلىعى ەلگە دەگەن جاناشىرلىققا ۇلاسادى. ءبىز وتانشىل جانە مەملەكەتشىل بولۋىمىز كەرەك. شىن مانىندە, تۋعان جەرىڭدى سۇيۋدەن اسقان باقىت جوق. جۇرەگى وتانىم, ەلىم, جەرىم دەپ سوققان ادام ەشتەڭەدەن قايمىقپايدى. ءبىزدىڭ قازاقستاننان باسقا وتانىمىز جوق. ەڭ باستى بايلىعىمىز – تۋعان ەلىمىز. سوندىقتان مەملەكەت مۇددەسى قاشاندا بارلىعىنان بيىك تۇرادى», دەپ قوستى ول.
