«بيىل قازاقستاندا تىركەلگەن بارلىق قىلمىستىق قۇقىق بۇزۋشىلىقتاردىڭ بەستەن ءبىر بولىگى الماتىدا جاسالعانى انىقتالدى. ولاردىڭ نەگىزگى بولىگى ۇرلىق پەن الاياقتىققا بايلانىستى بولدى. مەملەكەتتىڭ باستى باسىمدىعى - ازاماتتاردىڭ قاۋىپسىزدىگىن قامتاماسىز ەتۋ, ءومىرىن, دەنساۋلىعى مەن مۇلكىن قورعاۋ. سوندىقتان قالاداعى قىلمىستارعا توسقاۋىل قويۋ كەرەك», دەدى پرەزيدەنت كەزدەسۋ بارىسىندا.
قاسىم-جومارت توقاەۆ قازاقستاندا پوليتسيانىڭ سەرۆيستىك مودەلىن ەنگىزۋگە باعىتتالعان جۇيەلى رەفورما جۇرگىزىلىپ جاتقانىن ەسكە سالدى.
«الاتاۋ اۋدانىندا جۇزەگە اسىرىلىپ جاتقان پيلوتتىق جوبا جاقسى ناتيجە كورسەتۋدە. سوندىقتان كەلەسى جىلدىڭ سوڭىنا دەيىن قالانىڭ بارلىق اۋداندارىندا پوليتسيانىڭ سەگىز سەرۆيستىك ورتالىعىن اشىپ, قوعامدىق ءتارتىپتى قامتاماسىز ەتۋ ءۇشىن ۆەدومستۆوارالىق توپتار قۇرۋدى تاپسىرامىن. مۇنداي قادام پوليتسيا بولىمشەلەرىنىڭ جۇمىس تيىمدىلىگىن ارتتىرۋعا مۇمكىندىك بەرەدى», دەپ اتاپ ءوتتى مەملەكەت باسشىسى.
قالادا قاۋىپسىزدىك دەڭگەيىن ارتتىرۋ ماقساتىندا اكىمدىككە 2025 جىلعا دەيىن قالا كوشەلەرى مەن قوعامدىق كەڭىستىكتەردى ءجۇز پايىز جارىقتاندىرۋمەن قامتاماسىز ەتۋى تاپسىرىلدى.
