- بۇل ءبىزدىڭ ديپلوماتيامىزعا دا قاتىستى, ونىڭ ءرولى قازىرگى گەوساياسي شىندىقتا ايتارلىقتاي ارتىپ كەلەدى. قازاقستان ۇلتتىق مۇددەلەردى قورعاۋعا, بەيبىتشىلىك, سەنىم جانە ىنتىماقتاستىق قۇندىلىقتارىن ىلگەرىلەتۋگە باعىتتالعان بەلسەندى سىرتقى ساياسات جۇرگىزەدى, - دەدى قاسىم-جومارت كەمەل ۇلى.
سونداي-اق ءبىزدىڭ سىرتقى ساياساتىمىز ەلىمىزدىڭ قاۋىپسىزدىگىن نىعايتۋعا, ينۆەستيتسيالار تارتۋعا, كولىك-ترانزيتتىك الەۋەتتى دامىتۋعا, ەكسپورتتى ىلگەرىلەتۋگە باعىتتالعانىن دا اتاپ ءوتتى.
- مۇنىڭ ءبارى, سايىپ كەلگەندە, حالقىمىزدىڭ ءال-اۋقاتىن ارتتىرۋعا ىقپال ەتەدى. حالىقارالىق ماسەلەلەردە قازاقستان ارقاشان بىرىككەن ۇلتتار ۇيىمىنىڭ امبەباپ قاعيداتتارىن بەرىك ۇستاناتىن بولادى. ەكىنشى جاعىنان, ۇيىمنىڭ ءوزى بارلىق مەملەكەتتەردىڭ مۇددەلەرىن ەسكەرەتىن نەعۇرلىم ينكليۋزيۆتى جاھاندىق قۇرىلىمعا اينالۋ تۇرعىسىنان رەفورمالاردى قاجەت ەتەدى, - دەدى ەل پرەزيدەنتى.
ق.توقاەۆتىڭ ايتۋىنشا, بۇل اسىرەسە الەمنىڭ تۇكپىر-تۇكپىرىندە اسكەري قاقتىعىستار تۋىنداعان كەزدە, مەملەكەتتەر اراسىندا سەنىمسىزدىك ارتىپ, ءارتۇرلى تەرروريستىك جانە گيبريدتىك قاۋىپتەر كۇشەيگەن كەزدە وتە ماڭىزدى. سوندىقتان قازاقستان ەۋرازيانىڭ قاق ورتاسىندا بولا وتىرىپ, ولاردىڭ ىقپالىن سەزىنەدى.
- الايدا, ءبىز تۇپكى ماقساتى قۋاتتى مەملەكەت, ءادىل قوعام قۇرۋ بولىپ تابىلاتىن رەفورمالاردىڭ بەلگىلەنگەن جولىنان باس تارتپايمىز, - دەدى مەملەكەت باسشىسى.
پرەزيدەنت جالپىۇلتتىق ديالوگتىڭ ارتقاندىعىنا دا توقتالدى.
- جالپىۇلتتىق ديالوگتىڭ,ازاماتتىق قوعامنىڭ بەلسەندىلىگىنە ارقاسىندا ەلىمىز اۋقىمدى ساياسي وزگەرىستەردى جۇزەگە اسىردىق. ساياسي رەفورمالاردىڭ ءتورت پاكەتى جۇزەگە اسىرىلدى. بەيبىت جينالىستار تۋرالى تۇبەگەيلى جاڭا زاڭ قابىلداندى. اۋىل اكىمدەرىن سايلاۋ ەنگىزىلدى, اۋدان باسشىلارىن سايلاۋعا كوشۋ جوسپارلانۋدا. پارتيالار قۇرۋ ءۇشىن جاعدايلار جەڭىلدەتىلىپ, ماجىلىسكە ءوتۋ شەگى تومەندەتىلدى. ايەلدەرگە, جاستارعا جانە ەرەكشە قاجەتتىلىكتەرى بار ادامدارعا ارنالعان سايلاۋ تىزىمدەرىنە 30 پايىزدىق كۆوتا ەنگىزىلدى, - دەپ اتاپ ءوتتى قاسىم-جومارت كەمەل ۇلى.
پرەزيدەنت اتاپ وتكەندەي مۇنىڭ ءبارى ازاماتتاردى مەملەكەتتىك شەشىمدەر قابىلداۋعا, ادال جانە ءادىل ويىن ەرەجەلەرىن قالىپتاستىرۋعا, ءفاۆوريتيزمنىڭ كەز-كەلگەن ءتۇرىن جويۋعا باعىتتالعان باستامالاردىڭ از عانا بولىگى.
- ءبىز اۋقىمدى ساياسي وزگەرىستەردى دايەكتى تۇردە جۇزەگە اسىرامىز, ەكونوميكا مەن الەۋمەتتىك سالاداعى رەفورمالاردى جۇزەگە اسىرامىز, دەپ توقتالدى ق.توقاەۆ.
قاسىم-جومارت كەمەل ۇلى بۇل رەفورمالار حالىقارالىق قوعامداستىقتىڭ قولداۋىنا يە ەكەنىن ايتادى.
- ءبىزدىڭ قازاقستاندى جاڭعىرتۋ جونىندەگى كۇش-جىگەرىمىزدى رەفورمانى شەكتەۋ رەتىندە ۇسىنۋعا جانە ونى شەتەلدىك ساياساتكەرلەر مەن ساراپشىلاردى سەندىرۋگە تىرىساتىندار مۇلدەم قاتەلەسەدى. شىندىعىندا, وتە ۇلكەن جۇمىس جاسالدى. بۇكىل الەمدە قازاقستان جاڭا مازمۇن مەن كەلبەتكە يە بولعانىن مويىندايدى. بۇل جەردە ەشقانداي اسىرا سىلتەۋ جوق. ەڭ باستىسى, رەفورمالار ودان ءارى داميدى. قازاقستان قارقىندى دامىپ, بارلىق توقىراۋ قۇبىلىستارىنان ارىلاتىن بولادى, - دەپ تۇيىندەدى مەملەكەت باسشىسى.
