«الماتى تۇرعىندارىنىڭ كوپشىلىگى, اسىرەسە, جاستار ءۇشىن باسپانا – ەڭ وزەكتى ماسەلە. قالادا پاتەردىڭ باعاسى تىم جوعارى. ارينە, ەڭبەك جولىن ەندى عانا باستاعان جاستار بىردەن پاتەر ساتىپ الا المايتىنى تۇسىنىكتى. بىراق, سولاي ەكەن دەپ ەش قارەكەتسىز قول قۋسىرىپ وتىرۋعا بولمايدى. جاستاردىڭ باسپانا الۋىنا جان-جاقتى جاعداي جاساۋ كەرەك. بۇل – مەملەكەتتىڭ باستى مىندەتىنىڭ ءبىرى», دەدى پرەزيدەنت.
وسى رەتتە مەملەكەت باسشىسى اكىمدىككە جالعا بەرىلەتىن تۇرعىن-ءۇي سالۋ ءۇشىن ينۆەستورلارعا تارتىمدى بولاتىن ءتيىمدى تاسىلدەر ويلاستىرۋدى تاپسىردى.
«جالدامالى ۇيلەر تىم قىمباتقا تۇسپەۋى كەرەك. ونداي پاتەرلەر, ەڭ الدىمەن, قولجەتىمدى بولۋعا ءتيىس. جالپى, الماتى جاستارى ءۇشىن باسپانالى بولۋ قول جەتپەس ارمان بولماۋى كەرەك. باسىندا باسپاناسى بار جاستاردىڭ ەرتەڭگى كۇنگە دەگەن سەنىمى ارتادى. قالادا تۇرعىن-ءۇي تاپشىلىعىن ازايتۋ – اسا ماڭىزدى مىندەت. كەلەسى جىلدان باستاپ تۇرعىن-ءۇي قۇرىلىسىن جىل سايىن 10 پايىزعا ارتتىرۋ قاجەت», دەدى ق.توقاەۆ.
ەل پرەزيدەنتى الماتىدا بوس جەردىڭ ازدىعى قۇرىلىستىڭ قارقىنىن كۇشەيتۋگە كەدەرگى كەلتىرۋى مۇمكىن ەكەنىن ايتتى. سول سەبەپتى, جاڭا جەرلەردى يگەرۋ كەرەك.
«قالادا 1500-گە جۋىق ەسكى ءۇي بار. شاعىن اۋدانداردا تۇرعان مۇنداي ۇيلەرگە كۇردەلى جوندەۋ جۇرگىزگەن ءجون. ال, جاڭعىرتۋعا كەلمەيتىندەرىن ءسۇرىپ تاستاۋ قاجەت. اكىمدىككە وسى شارۋانى كەزەڭ-كەزەڭمەن جۇزەگە اسىرۋ ءۇشىن ناقتى جوسپار ازىرلەۋدى تاپسىرامىن. جاڭعىرتۋ جۇمىستارىنىڭ تۇرعىندارعا قولايسىزدىق تۋدىرماۋىن ويلاستىرۋ كەرەك», دەدى ول.
