ۆولگودونوۆكا اۋىلىنىڭ جانىندا ورنالاسقان «SG Beton» زاۋىتى 15 مىڭ شارشى مەتر اۋماقتى الىپ جاتىر. زاماناۋي جابدىقتارمەن تولىق جابدىقتالعان. ەڭ باستىسى, وزىق تەحنولوگيالاردى مەيلىنشە ءتيىمدى پايدالاناتىن ەلىمىزدەگى ەڭ ءىرى كاسىپورىننىڭ ءبىرى. كاسىپورىن قۇرىلىس ماتەريالدارىنىڭ بىرنەشە ءتۇرىن بارىنشا ساپالى ەتىپ شىعارۋدى جوسپارلاپ وتىر. العا قويعان مىندەت مەجەسى وڭىنان وڭعارىلسا, قولجەتىمدى تۇرعىن ءۇي بويىنشا بىرقاتار مەملەكەتتىك باعدارلامانىڭ ءساتتى ىسكە اسۋىنا سەپتىگىن تيگىزبەك.
زاۋىتتا جول پليتالارى, ءارتۇرلى ولشەمدەگى باسپالداقتار, پانەلدىك ەدەندەر مەن ىرگەتاس بلوكتارى ءتارىزدى بىرنەشە ءتۇرلى ءونىم شىعارىلماق. جىلىنا 456 600 شارشى مەتر قۇرىلىستىڭ ىرگەتاسىن بەرىك ەتۋگە قاجەتتى وتكىر قادالاردى شىعارۋ جوسپارلانۋدا. بۇل كولەمدى تارازى باسىنا تارتساڭىز, زاۋىت تاۋلىگىنە ەكى شاقىرىم بولاتىن قادالاردى شىعارادى دەگەن ءسوز. مۇنداي ونىمدەر وڭىردەگى قۇرىلىس جۇمىستارى ءۇشىن وتە قاجەت. اتالعان ونىمدەر وندىرىلسە, وڭىردەگى قۇرىلىس قارقىنى بۇگىنگىدەن دە ارتا تۇسەتىنى داۋسىز. ەڭ باستىسى, 240 جۇمىس ورنى اشىلماق. قازىر 106 ادام جۇمىسقا ورنالاسقان. الداعى ۋاقىتتا زاۋىت جۇمىسشىلارىنىڭ كاسىبي دەڭگەيىن كوتەرۋ ءۇشىن وقىتۋ كوزدەلىپ وتىر. زاۋىت جۇمىسشىلارىنىڭ ورتاشا ەڭبەكاقىسى 300-350 مىڭ تەڭگە شاماسىندا. ولاردىڭ الاڭسىز جۇمىس ىستەۋىنە بارلىق قولايلى جاعداي جاسالعان.
– جەرگىلىكتى جەردە جۇمىس بولعانى, جۇمىسشىلاردىڭ تولىمدى ەڭبەك العانى وتە جاقسى, – دەيدى دانەكەرلەۋشى وپەراتور الەكساندر زاياتس, – زاۋىتتاعى بارلىق جۇمىس اۆتوماتتاندىرىلعان. قول ەڭبەگى كوپ قاجەت ەتىلمەيدى. الداعى ۋاقىتتا جۇمىسشىلاردىڭ دا بارىنشا ءبىلىمدى بولعانى دۇرىس. ويتكەنى ەندى بىزگە جاڭا قۇرىلعىلارمەن جۇمىس ىستەۋگە تۋرا كەلەدى.
تەمىربەتون قۇرىلعىلارىن ءوندىرۋ كەزىندە تەحنولوگيالىق پروتسەستىڭ بارلىق كەزەڭى دۇرىس ساقتالسا, ۇلكەن جۇكتەمەگە توتەپ بەرە الادى. ءونىم ءوندىرۋ بىرنەشە كەزەڭگە بولىنگەن. بارلىعى مۇلتىكسىز جۇمىس ىستەپ, وندىرىلەتىن ءونىمنىڭ ساپاسىنا اسەر ەتپەك. زاۋىت زامان تالابىنا تولىق جاۋاپ بەرەتىن نەمىستىڭ «ماكسترۋدەر» فيرماسىنىڭ جابدىقتارىمەن قامتاماسىز ەتىلگەن. تولىق اۆتوماتتاندىرىلعان جۇيە جۇمىسشىنىڭ قاتەلىگىنە جول بەرمەيدى. جاڭا تەحنولوگيالاردى قولدانۋ زاۋىتتىڭ جوعارى ونىمدىلىگىن, سونداي-اق شيكىزات پەن سۋدى ۇنەمدەپ تۇتىنۋعا مۇمكىندىك بەرەدى. زاۋىتتاعى جۇمىس ەكى اۋىسىم بويىنشا ۇيىمداستىرىلىپ وتىر.
قۇرىلىس ماتەريالدارىنىڭ قىمباتتاۋى ەلىمىزدەگى سالاعا كەرى اسەرىن تيگىزگەنى انىق. ال جەرگىلىكتى جەردە مۇنداي ءونىمنىڭ ءوندىرىلۋى حالىققا قولجەتىمدى ءارى ساپالى تۇرعىن ءۇي سالۋعا جول اشادى. شىن مانىندە تەمىربەتون زاۋىتىنىڭ ىسكە قوسىلۋى بۇل تاراپتاعى مەملەكەت باسشىسىنىڭ تاپسىرمالارىن ويداعىداي ورىنداۋعا ىقپال ەتەدى. ياعني تەمىربەتون ونىمدەرىنىڭ ءوندىرىسى وڭىردە عانا ەمەس, ەلىمىزدەگى سۇرانىستى اقتاماق. ونىڭ ۇستىنە قۇرىلىس جۇمىستارى قارقىندى جۇرگىزىلىپ جاتقان ەلورداداعى قاجەتتىلىكتى جەرگىلىكتى ونىممەن وتەيدى.
– «SG Beton» زاۋىتى «G-PARK» كومپانيالار توبىنا كىرەدى. ءدال قازىر 650 مىڭ شارشى مەتر كوپقۋىستى پليتالار مەن 457 مىڭ وتكىر قادالار شىعارۋعا مۇمكىندىك بار, – دەيدى سەرىكتەستىك ديرەكتورى امانگەلدى كاكىباەۆ, – الداعى ۋاقىتتا ءونىم كولەمىن ەكى ەسەگە ارتتىرامىز. كەلەسى جىلى بەتون دايىنداۋ زاۋىتى سالىنباقشى. مىنە, سول كەزدە قۇرىلىسقا قاجەتتى قىرۋار دۇنيەنىڭ سۇرانىسىن وتەيمىز دەپ مەجەلەپ وتىرمىز.
قۇرىلىس سالاسى قارقىندى دامىعان كەزدە وزگە دە سالالاس كوپتەگەن جۇمىس العا باساتىن بولادى.
اقمولا وبلىسى,
ارشالى اۋدانى
