قازاقستاننىڭ بۇگىنگى تاڭداعى ەڭ ۇزدىك ۇستەل تەننيسشىسى كيريلل گەراسيمەنكو ەكەنىن جۇرت جاقسى بىلەدى. 25 جاستاعى جەرلەسىمىز 2016 جىلى ريو-دە-جانەيرو جانە 2021 جىلى توكيو وليمپيادالارىنا قاتىستى. كەزىندە گەراسيمەنكو «World Tour Hungarian Open», «ITTF Challenge Spanish Open» جانە «2021 ITTF Kazakhstan International Open» تۋرنيرلەرىن ۇتىپ, باسقا دا كوپتەگەن ءدۇبىرلى دودادا جۇلدەگەرلەر ساناتىنا قوسىلدى. بىرەر جىلدان بەرى ول اۋستريا مەن گەرمانيانىڭ ەڭ ۇزدىك كلۋبتارى ساپىندا ونەر كورسەتىپ ءجۇر. قازىرگى كەزدە كيريلل الەمدىك رەيتينگتە 31-ورىندى يەلەنۋدە. بۇل – بۇرىنعى كەڭەس وداعى قۇرامىندا بولعان «باۋىرلاس» رەسپۋبليكالار وكىلدەرى اراسىنداعى ەڭ ۇزدىك كورسەتكىش. وزگەلەردى ايتپاعاندا, مۇيىزدەرى قاراعايداي رەسەي مەن ۋكراينا سەكىلدى مەملەكەتتەردىڭ تەننيسشىلەرى وسى دەڭگەيگە جەتە العان جوق.
قازاقستاننىڭ وزگە ويىنشىلارى مىناداي ساتىلارعا جايعاستى: ايدوس كەنجەعۇلوۆ – 300, الان قۇرمانعاليەۆ – 324, ۆلاديسلاۆ زاحاروۆ – 403, ەريك رايتەر – 446, داستان كەنجەعۇلوۆ – 459, باقداۋلەت اكىمالى – 477 جانە ساعىنتاي قۇرمانباەۆ – 478.
كوشباسشىلار جايىندا ايتار بولساق, الەمدىك رەيتينگتەگى العاشقى ءۇش ورىندى قىتايدىڭ سپورتشىلارى ولجالاپ وتىر. ولار – فان چجەندون, ما لون جانە ۆان چۋتسين. العاشقى ەكى ورىندى ەنشىلەگەن ساڭلاقتاردىڭ وليمپيا ويىندارى مەن الەم چەمپيوناتتارىنىڭ بىرنەشە دۇركىن جەڭىمپازدارى دەگەن اتاقتارى بار. ال ۆان چۋتسين – ۇزدىكتەر ساناتىنا كەيىننەن عانا قوسىلعان دارىندى جاس. سونداي-اق توپ-10-دىقتىڭ قاتارىندا توماكازۋ حاريموتو (جاپونيا), ترۋلس مورەگارد (شۆەتسيا), ليان تسزينكۋن (قىتاي), ۋگو كالدەرانو (برازيليا), لين يۋنجۋ (تايپەي), دميتري وۆچاروۆ (گەرمانيا) جانە داركو يورگيچ (سلوۆەنيا) بار.
ايەلدەر اراسىندا دا ازيالىقتار الدارىنا جان سالار ەمەس. الەمدىك رەيتينگتەگى وزىق 10 ويىنشىنىڭ توعىزى سولار. اسىرەسە قىتاي قۇراماسىنىڭ قارقىنى وتە كۇشتى. العاشقى ءتورت ورىندى قىتاي ەلىنىڭ ارۋلارى يەلەنىپ وتىر. ولار – سۋن ينشا, چەن مەن, ۆان مانيۋ جانە ۆان يدي. بەسىنشى جانە التىنشى ورىنداردى جاپونيالىق ميما يتا مەن حينا حاياتا ەنشىلەۋدە. ودان كەيىنگى ساتىلارعا چەن سينتۋن (قىتاي), كاسۋمي يشيكاۆا (جاپونيا), دۋ حوي كەم (گونكونگ) جانە حان ين (گەرمانيا) تۇراقتاعان. قازاق قىزدارى اراسىنان زاۋرەش اقاشەۆا ەڭ ۇزدىك كورسەتكىشكە يە. ول ITTF تىزىمىندە 139-ورىندا تۇر. وزگە جەرلەستەرىمىز مىناداي ساتىلارعا تابان تىرەدى: سارۆينوز مىرقادىروۆا – 213, اناستاسيا لاۆروۆا – 214, ايا الىمباەۆا – 275, انگەلينا رومانوۆسكايا – 310, انەل باقىت – 336, جانەركە كوشكىمباەۆا – 471, الەكساندرا سميرنوۆا – 472 جانە اراي اشكەەۆا – 475.
الماتىدا وتكەن جارىستا دا ەلىمىزدە اسا دارىندى جاس ورەندەردىڭ قالىڭ شوعىرى ءوسىپ كەلە جاتقانىن انىق اڭعاردىق. راسىندا دا, ولاردىڭ ورەلى ونەرىن كورە وتىرىپ, كوڭىلىمىز تولدى. ماسەلەن, 15 جاسقا دەيىنگى ويىنشىلار اراسىندا توپ جارعان شىمكەنتتىك نۇريسلام قاسىم 15 كەزدەسۋدىڭ بارلىعىندا جەڭىسكە جەتتى. ناتيجەسىندە ول باس جۇلدەنى ولجالاسا, وسكەمەندىك ارنۇر ورالحانوۆ كۇمىسپەن كۇپتەلدى. قولا مەدال قوستانايلىق تەمىرلان بالتاشقا بۇيىردى.
قىزدار سايىسىندا ەليزاۆەتا لاۆروۆا الدىنا جان سالمادى. استانالىق سپورتشى 15 كەزدەسۋدىڭ 14-ىندە جەڭىس تويىن تويلادى. ەكىنشى جانە ءۇشىنشى ورىنداردى شىمكەنتتىك اقنيەت امانكەلدى مەن تارازدىق شۇعىلا مۇقاش يەلەندى.
18 جاسقا دەيىنگىلەر اراسىندا تانىمال ۇستەل تەننيسشىسى كيريلل گەراسيمەنكونىڭ ءىنىسى – تيموفەيدىڭ مەرەيى ۇستەم بولدى. استانادان كەلگەن ويىنشى 14 كەزدەسۋدىڭ ۇشەۋىندە عانا ۇتىلدى. الماتىلىق شي دانيان ەكىنشى ورىن السا, قاراعاندىلىق تەمىرلان كيم ۇزدىك ۇشتىكتى تۇيىندەدى. ءدال سول جاستاعى قىزدار اراسىندا جۇلدەلى ورىنداردىڭ بارلىعىن كەنشىلەر قالاسىنىڭ وكىلدەرى ەنشىلەدى. اتاپ ايتساق, جانەركە كوشكىمباەۆا قارسىلاس شاق كەلتىرمەي, التىننان القا تاقتى. الەكساندرا سميرنوۆا مەن ۆيكتوريا موچالكينا كۇمىس پەن قولا مەدالدەردى مويىندارىنا ءىلدى.
