جەڭىمپازداردى اسكەري وركەستردىڭ اۋەنىمەن قارسى العان قالا تۇرعىندارى, كلۋب جانكۇيەرلەرى, ءبىر توپ سپورت سۇيەر قاۋىم قالاداعى ء«ال-فارابي» الاڭىنا جينالىپ, سالتاناتتى قۇتتىقتاۋ راسىمىنە قاتىستى. مۇندا قالالىق اكىمدىكتىڭ باسشىلىق قۇرامى جەڭىسپەن ورالعان جەرگىلىكتى كلۋبقا فۋتبولدان قازاقستان كۋبوگىن سالتاناتتى تۇردە تاپسىرىپ, ورداباسىلىق ويىنشىلاردى ۇلكەن ماراپاتىمەن قۇتتىقتادى.
العاشقى بولىپ ءسوز العان شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان چەمپيونداردى ناعىز باتىرلارعا تەڭەپ, كوماندانىڭ جەڭىسى مەگاپوليستىڭ فۋتبول تاريحىندا قول جەتكىزگەن ۇلكەن تابىسىنىڭ ءبىرى بولعانىن اتاپ ءوتتى.
– «ورداباسى» كومانداسىن فۋتبولدان وتكەن جارىستا 2022 جىلعى قازاقستان كۋبوگىن يەلەنۋمەن قۇتتىقتايمىز! سىزدەر اقتىق سىندا تاباندىلىق تانىتىپ, جەڭىستى جۇلىپ اكەتتىڭىزدەر. سول ءۇشىن دە شىمكەنتتىك جانكۇيەرلەر سىزدەرگە ريزا. جارايسىزدار, قاندى تۋلاتقان ناعىز تارتىستى ويىن كورسەتتىڭىزدەر. سىزدەرمەن ەل ماقتانادى. تالانتتى ويىنشى ەكەندىكتەرىڭىزدى دالەلدەدىڭىزدەر. حالىقتىڭ سەنىمىن اقتاعاندارىڭىز ءۇشىن مىڭ العىس. شىمكەنت قالاسىنىڭ اكىمى مۇرات دۇيسەنبەك ۇلى سالەم جولداپ, قۇتتىقتاپ جاتىر. بۇل تىلەككە قوسىلا وتىرىپ, شىمكەنت قالاسىنىڭ تۇرعىندارى اتىنان دا, «ورداباسى» جانكۇيەرلەرى اتىنان دا قۇتتى بولسىن دەيمىز, – دەگەن شىڭعىس جۇمابەك ۇلى ءسوزىن ساباقتاپ, قالا اكىمى فينالدىق ويىندا ستاديوندا بولىپ, ماتچ بىتكەنشە جانكۇيەرلەرمەن بىرگە جارىستى تاماشالاعانىن جەتكىزدى.
– وسىلايشا قالا باسشىلىعى وزدەرىڭىزگە قولداۋ كورسەتىپ, ىستىق ىقىلاسىن ءبىلدىردى. جالپى, تارتىسقا تولى بولعان «استانا-ارەناداعى» ويىندا بارشا شىمكەنتتىك جانكۇيەر جۇمىلا جۇدىرىق بولىپ سىزدەرگە مىقتى رۋحاني دەمەۋ كورسەتكەنىن كوردىك. قۇداي قالاسا, كەلەسى جىلعى ەل چەمپيوناتىندا العا قويعان ۇلكەن ماقساتتار ورىندالىپ, العاشقى ۇشتىكتەن كورىنەرسىزدەر دەگەن ۇمىتتەمىز. 2023 جىلى مەگاپوليستى سپورتتا ۇلكەن سىي كۇتىپ تۇر. شىمكەنت قالاسى ەۋروكۋبوك ويىندارىن قابىلدايدى. البەتتە بۇل – تەك «ورداباسى» كلۋبىنىڭ عانا ەمەس, بۇكىل شىمكەنتتىڭ, ميلليونان استام تۇرعىنى بار رەسپۋبليكاداعى اسەم شاھاردىڭ فۋتبول سپورتىنداعى تۇعىرلى جەڭىسى. ارينە, وسىنداي سپورتشىلار ارقىلى اۋلادا دوپ تەپكەن تالاي بالانىڭ ارمانى بيىككە قاراي ورلەيتىنى انىق, بۇل – جاستار ءۇشىن ەلىكتەۋگە تۇراتىن جايت. ەندىگى تىلەگىمىز بەن نيەتىمىز «ورداباسىنىڭ» ەرلىكتى قايتالاپ, كەلەسى جىلى چەمپيون بولۋى! – دەدى ول.
وسىدان كەيىن ءسوز العان «ورداباسى» كلۋبىنىڭ پرەزيدەنتى باۋىرجان ابدۋبايتوۆ جەڭىمپازداردى كوپتەن اڭساعان كۋبوگىمەن قۇتتىقتاپ, الداعى ۋاقىتتا دا جەرگىلىكتى كوماندانىڭ جانكۇيەرلەردى جەڭىستەرىمەن قۋانتا بەرەتىنىنە سەندىردى. ەندىگى جەردە كوپ ەڭبەكتەنىپ, كوماندانىڭ ساپالىق دارەجەسىن جاڭا ساتىعا كوتەرۋ جولىندا جۇيەلى جۇمىس جالعاساتىنىن جەتكىزدى.
– بۇل جەڭىسكە بارشا قالا تۇرعىنىنىڭ دا قوسقان ۇلەسى بار. سىزدەردىڭ قوشەمەتتەرىڭىز, قالا اكىمىنەن باستاپ بارلىق جانكۇيەرلەرگە دەيىنگى بىلدىرگەن ىستىق ىقىلاستارىڭىز فۋتبولشىلارعا, جالپى كوماندا مۇشەلەرىنە رۋحاني ازىق, مىقتى ىنتالاندىرۋشى كۇش بولدى. وسىنداي قولداۋشىلارىمىزدىڭ بارىنا قۋانامىز. ءاردايىم اماندىقتا جۇرىڭىزدەر, – دەدى كلۋب پرەزيدەنتى.
جينالعان بارشا جۇرتتىڭ الدىندا ءسوز باستاعان كوماندا كاپيتانى سامات ءشامشى «استانا ارەناداعى» ماتچتىڭ اسا تارتىستى وتكەنىن, بار وي-ارمان قالايدا جەڭىسكە جەتۋ بولعانىن ايتتى. ءالى دە ىشتەي تولقىپ تۇرعانىن جاسىرماعان ول الاڭدا ويناپ ءجۇرىپ ستاديونداعى بارلىق جانكۇيەردىڭ قولداۋىن سەزىنگەنىن جەتكىزدى. سودان جىگىتتەر جىگەرلەنىپ, سوڭىنا دەيىن تالاسىپ, نامىسقا تىرىسقان. سونىڭ ناتيجەسىندە سوڭعى مينۋتتار قالعاندا ەسەپتى ءوز پايدالارىنا شەشىپ, جەڭىستى قارسىلاسىنىڭ قولىنان ج ۇلىپ اكەتكەن.
– شىمكەنتتىك جانكۇيەرلەرگە راحمەت! استانادا ۇنەمى ءبىزدىڭ قاسىمىزدان تابىلدى. قانداي قولداۋ بىلدىرە الاتىندارىن ءوز كوزىمىزبەن كوردىك. مۇندايدا ىشكى سەزىمدى, كوڭىل تولقىتقان ەموتسيالاردى ايتىپ جەتكىزۋ قيىن عوي, ءسىرا. ماۋسىم بويى بىزدەن كومەگىن اياماعان قالا اكىمىنە, سپورت سالاسىنا جاۋاپتى بارشا مامانعا جانە كلۋب باسشىلارىنا تەگىس العىس ايتامىز. قۋانىشپەن ايتقىم كەلىپ تۇرعانى, مىنە, اراعا 11 جىل سالىپ, قازاقستان كۋبوگى شىمكەنتكە ەكىنشى مارتە قايتا ورالىپ وتىر. بىزگە تىلەكشى بولعان بارشاڭىزعا العىس جاۋدىرامىن!, – دەدى كوماندا كاپيتانى.
وسىناۋ ءىس-شارادا الاڭعا جينالعان جانكۇيەرلەر فۋبولشىلاردى قاۋمالاپ قۇرمەت كورسەتىپ, قوشەمەتتەرىن ايامادى. قالا اكىمىنىڭ ورىنباسارى ماقسۇت يساحوۆ تا تەبىرەنە ءسوز سويلەپ, فۋتبول كلۋبىنىڭ ەرلىگىنە شىنىمەن ءتانتى بولعانىن ايتتى.
– قۇرمەتتى شىمكەنت قالاسىنىڭ تۇرعىندارى. بۇل جەڭىستىڭ باعاسى ءبىز ءۇشىن وتە قىمبات. ونىڭ وزىندىك سەبەپتەرى دە جوق ەمەس. ويتكەنى «ورداباسىنىڭ» جولىندا ءارتۇرلى كەدەرگىلەر, قيىندىقتار كەزدەسىپ جاتتى. ونى جاقسى بىلەمىز. ەكىنشىدەن, «ورداباسى» – قازاقستان پرەمەر-ليگاسىنداعى ەڭ جاس كوماندا. فۋتبولشىلاردىڭ ورتاشا جاسى 22-ءنى قۇرايدى. مىنە, وسىنداي سەبەپتەرگە قاراماستان, ءبىزدىڭ جىگىتتەر تاباندىلىق كورسەتىپ, جانكۇيەرلەرگە, بىزگە كۇشتى كوڭىل كۇي, قۋانىش سىيلادى. تاعى دا ماقتانىشپەن ايتقىم كەلگەنى, فينالدىق كەزدەسۋدە الاڭعا العاشقى مينۋتتاردان باستاپ شىققان 11 فۋتبولشىنىڭ جەتەۋى – ءوزىمىزدىڭ قازاقستاندىق ويىنشىلار. ال جالپى, كلۋبتاعى 25 ويىنشىنىڭ 17-ءسى – قازاقتىڭ قارادومالاق بالالارى, شىمكەنتتىڭ تۇلەكتەرى. ياعني ولاردىڭ بارلىعى دا كلۋبتىڭ تاربيەلەنۋشىلەرى. دەسەك تە كەلەسى جىلى الدىمىزعا قويىپ وتىرعان ۇلكەن ماقساتتار بار. ەندەشە 11 جىلدان كەيىن شىمكەنتكە كەلىپ جەتكەن كۋبوك تاعى دا قۇتتى بولسىن! – دەدى ول.
ءوز كەزەگىندە كوپشىلىكتىڭ قوشەمەتىمەن «ورداباسى» فۋتبول كلۋبىنىڭ كاپيتانى سامات ءشامشى قازاقستان كۋبوگىن قالا اكىمىنىڭ ءبىرىنشى ورىنباسارى شىڭعىس مۇقانعا سالتاناتتى تۇردە تابىستادى. ءىس-شارا سوڭىندا جەرگىلىكتى كوركەمونەرپازدار كونتسەرت قويىپ, ءان-جىردان شاشۋ شاشتى.
شىمكەنت
