«جايلى مەكتەپ» ۇلتتىق جوباسىن جۇزەگە اسىرۋعا 2,6 ترلن تەڭگە بولىنەدى. 2026 جىلعا قاراي قالالار مەن ەلدى مەكەندەردە كەمىندە 800 مىڭ وقۋشى جاڭا ءبىلىم شاڭىراعىندا ءتالىم الادى دەپ كۇتىلۋدە. 2023-2025 جىلدار ارالىعىندا ۇلتتىق جوبا ءۇشىن بيۋدجەتتەن 2 606 596 055 مىڭ تەڭگە ءبولۋ جوسپارلانۋدا. ونىڭ ىشىندە 646 535 206 مىڭ تەڭگە – ۇلتتىق قور قاراجاتى ەسەبىنەن جانە 1 960 060 849 مىڭ تەڭگە رەسپۋبليكالىق بيۋدجەت ەسەبىنەن يگەرىلمەك.
كەربۇلاق اۋدانىنىڭ مادەيەت ۇيىندە وتكەن جيىندا ينە شانشار ورىن بولعان جوق. اۋىل-اۋىلداردان جينالعان مۇعالىمدەر جاڭا وقۋ جىلىنداعى وزگەرىستەردى ءمينيستردىڭ ءوز اۋزىنان ەستىدى. ەسەپ بەرۋ كەزدەسۋى ەكى ساعاتقا سوزىلدى. ۆەدومستۆو باسشىسى اتقارىلىپ جاتقان جۇمىستارى جايىندا ايتىپ, اۋىل تۇرعىندارىنىڭ سۇراقتارىنا جاۋاپ بەردى. اتا-انالاردى, ارىپتەس مۇعالىمدەردى, مەكتەپ ديرەكتورلارىن الاڭداتقان ماسەلەلەر, ياكي مۇعالىمدەردىڭ ساعات جۇكتەمەسى, ديرەكتورلاردىڭ روتاتسياسى, تۇلەكتەردى جۇمىسقا ورنالاستىرۋ, مەكتەپتەردىڭ الەۋەتىن ارتتىرۋ, كوللەدج بىلىمىنە گرانتتاردى ءبولۋ تەتىگى تۋرالى كەڭىنەن باياندادى.
«بۇعان دەيىن مەكتەپتەردە پەداگوگ-اسسيستەنت لاۋازىمىن ەنگىزگەن ەدىك. بۇگىنگى تاڭدا مامان سانى 1 500 ادامنان استى. بالاباقشالاردا دا تاربيەشى-اسسيستەنت قىزمەتى ەنگىزىلۋ تۋرالى ناقتى ۇسىنىستار قاراستىرىلىپ جاتىر», دەدى ا.ايماعامبەتوۆ.
ەسەپ بەرۋ كەزدەسۋىنەن كەيىن مينيستر سارىوزەك اۋىلىنداعى كۇرەڭبەل مەكتەبى مەن «اي-سانا» بالاباقشاسىنا باردى. 900 ورىنعا ەسەپتەلگەن مەكتەپتە 875 بالا وقىپ جاتىر. ءبىرىنشى كەزەكتە ول قاۋىپسىزدىك جۇمىسىنىڭ قالاي ۇيىمداستىرىلعانىن, بەينەباقىلاۋ كامەرالارىنىڭ جانە «دابىل تۇيمەلەرىنىڭ» جۇمىسىن باقىلادى. ءتىپتى دابىل تۇيمەسىن باسىپ, مەكتەپكە جەدەل جەتكەن پوليتسيا قىزمەتكەرلەرىمەن دە تىلدەستى. ولارعا وقۋشىلاردىڭ قاۋىپسىزدىگى وتە ماڭىزدى ەكەنىن جەتكىزدى.
سونىمەن قاتار وقۋ كابينەتتەرىن, كىتاپحانا مەن اسحانانى دا ارالادى. ۇستازدارمەن اشىق سويلەسىپ, سانات بەرۋ, ەسەپتىلىك, ۇبت وتكىزۋ ماسەلەلەرىن تالقىلادى. جالپى ءبىلىم بەرۋ نىساندارىن ارالاعاندا انىقتالعان ەسكەرتۋلەر بويىنشا اۋداندىق ءبىلىم باسقارماسىنىڭ باسشىسىنا ولاردى جويۋعا تاپسىرما بەرىلدى.
جەتىسۋ وبلىسى
