اۋەلى ۆەدومستۆو باسشىسى كوكسۋ قانت زاۋىتىنا بارىپ, كاسىپورىننىڭ جۇمىس بارىسىمەن تانىستى. زاۋىت بۇگىندە 100 ادامدى تۇراقتى, 450-گە جۋىق ادامدى ماۋسىمدىق جۇمىسپەن قامتاماسىز ەتىپ وتىر. بىلتىر قانت قۇراعىن وڭدەۋگە 200 ملن تەڭگە ينۆەستيتسيا تارتىلعان ەدى. كاسىپورىننىڭ جىلدىق قۋاتى – 250 مىڭ توننا, تاۋلىگىنە 2 مىڭ توننا قانت قىزىلشاسى وڭدەلەدى. ءىسساپار بارىسىندا مينيستر: «ەلىمىزدە 4 قانت زاۋىتى بار. ونىڭ ەكەۋى – جەتىسۋ وڭىرىندە. ءبىز قانت قىزىلشاسىن وندىرۋگە باسا نازار اۋدارىپ وتىرمىز», دەدى.
ودان كەيىن ەسكەلدى اۋدانىنداعى «حيلنيچەنكو ي ك» ءوندىرىس ورنىنا بارىپ, كاسىپورىننىڭ تىنىس-تىرشىلىگىمەن تانىستى. اۋىل شارۋاشىلىعى ونىمدەرىن ءوندىرۋ جانە قايتا وڭدەۋ تسەحى 2016 جىلدان بەرى جۇمىس ىستەپ كەلەدى. قويمانىڭ سىيىمدىلىعى – 5 مىڭ توننا.
كەلەسى كەزەكتە سەرىك جۇمانعارين ءتىل سارايىندا ءوڭىر جۇرتشىلىعىمەن كەزدەستى. ءىس-شارا بارىسىندا ۆيتسە-پرەمەر ازاماتتاردى الەۋمەتتىك قولداۋ, ازىق-ت ۇلىك باعاسىن تۇراقتاندىرۋ ماقساتىندا قابىلدانىپ جاتقان شارالار تۋرالى باياندادى.
«جەتىسۋ وبلىسى الەۋمەتتىك تۇرعىدان بەلسەندى دامىپ كەلەدى. قازىر كەربۇلاق اۋدانىنىڭ سارىوزەك اۋىلىندا ەمحانا سالىنۋدا. 2025 جىلعا دەيىن الاكول اۋداندىق ەمحاناسى تۇرعىزىلادى. تالدىقورعاندا وبلىستىق بالالار اۋرۋحاناسى جانە ونكولوگيالىق ديسپانسەر, اقسۋ جانە كەربۇلاق اۋداندارىنا تاعى اۋرۋحانا سالۋ كوزدەلىپ وتىر. سونىمەن قاتار پانفيلوۆ اۋدانىندا اۋدانارالىق اۋرۋحانانى جاڭعىرتۋ جوسپارلانۋدا. بۇدان باسقا 15 دارىگەرلىك امبۋلاتوريا, 39 فەلدشەرلىك-اكۋشەرلىك جانە 5 مەديتسينالىق پۋنكت ىسكە قوسىلادى», دەدى ۆيتسە-پرەمەر.
سونىمەن قاتار مادەنيەت سالاسىندا 2025 جىلعا ولكەتانۋ مۇراجايى, كىتاپحانا, 7 اۋىلدىق مادەنيەت ءۇيى بوي كوتەرمەك. ءوڭىردىڭ سپورتتىق دامۋى ءۇشىن 6 سپورتتىق جانە 6 دەنە شىنىقتىرۋ-ساۋىقتىرۋ كەشەنىن سالۋ دا جوسپارلانۋدا. باسقوسۋدا ۆەدومستۆو باسشىسى اتاۋلى الەۋمەتتىك كومەك بويىنشا اتقارىلىپ جاتقان شارۋالارعا دا توقتالدى.
«وڭىردە اتاۋلى الەۋمەتتىك كومەكتى شامامەن 7 400 وتباسى الادى. كەيبىر ازاماتتار مەملەكەتتەن قولداۋ الۋ ءۇشىن قانداي قۇجاتتاردى جانە ولاردى قايدا تاپسىرۋ كەرەكتىگىن بىلمەي جاتادى. الەۋمەتتىك سالادا, سونداي-اق دەنساۋلىق ساقتاۋ, ءبىلىم بەرۋ سالالارىندا مەملەكەتتىك قولداۋ شارالارىن تاعايىنداۋدىڭ پرواكتيۆتى فورماتىنا كوشۋ ءۇشىن «وتباسىنىڭ تسيفرلىق كارتاسى» اقپاراتتىق جۇيەسى ازىرلەنۋدە. جۇيە ازاماتتار تۋرالى بارلىق مالىمەتتى ءارتۇرلى مەملەكەتتىك ورگاننان بىرىڭعاي بازاعا بىرىكتىرەدى. وسى ارقىلى ازاماتتاردىڭ الەۋمەتتىك دەڭگەيىن ايقىنداۋعا جانە ولارعا پرواكتيۆتى فورماتتا كەپىلدى مەملەكەتتىك قولداۋ كورسەتۋگە مۇمكىندىك تۋادى», دەدى پرەمەر-ءمينيستردىڭ ورىنباسارى.
جيىن بارىسىندا الەۋمەتتىك ماڭىزى بار ازىق-ت ۇلىك تاۋارلارىنىڭ باعاسىن رەتتەۋ بويىنشا اتقارىلىپ جاتقان جۇمىستار دا كەڭىنەن تالقىلاندى. سالا باسشىسى بيىل 12 قازاندا ساۋدا كوميتەتى, الەۋمەتتىك-كاسىپكەرلىك كورپوراتسيالار مەن قانت زاۋىتتارى اراسىندا ەل اۋماعىندا قانت باعاسىن رەتتەۋ تۋرالى مەموراندۋمعا قول قويىلعانىن جەتكىزدى. ايماقتار بويىنشا قانتقا دەگەن قاجەتتىلىك جانە قارجىلاندىرۋ مۇمكىندىكتەرى ەسەپتەلگەن. بۇگىندە 13 وڭىردە قارىز شارتتارى قول قويۋ ساتىسىندا. كوكسۋ قانت زاۋىتىمەن جالپى سوماسى 5,6 ملرد تەڭگەگە نەسيەلىك كەلىسىم اياقتالۋعا جاقىن.
ءىسساپار سوڭىنداعى قابىلداۋدا قالا تۇرعىندارى مەن كاسىپكەرلەر جەر, سۋ, اۋىل شارۋاشىلىعى, تۇرعىن ءۇي ماسەلەسى سىندى كوكەيدە جۇرگەن سۇراقتارىن قويىپ, تۇششىمدى جاۋاپ الدى.
جەتىسۋ وبلىسى
