شىمكەنت قالالىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى بەرەكە دۇيسەبەكوۆتىڭ ايتۋىنشا, 2022-2025 جىلدار ارالىعىندا 622 ملرد تەڭگەگە 66 جوبانى ىسكە اسىرۋ بويىنشا ارنايى پۋل جاساقتالدى. وسىنىڭ اياسىندا 3 جىلدا 8,3 مىڭ جۇمىس ورنىن قۇرۋ كوزدەلىپ وتىر. سونىڭ ىشىندە 2022 جىلى 1 مىڭنان استام ادامدى جاڭا جۇمىس ورنىمەن قامتاماسىز ەتەتىن قۇنى 51,4 ملرد تەڭگەنىڭ 14 ينۆەستيتسيالىق جوباسىن ىسكە قوسۋ جوسپارلانعان بولاتىن. بۇگىنگى تاڭدا جالپى سوماسى 29,2 ملرد تەڭگەنى قۇرايتىن 6 ينۆەستيتسيالىق جوبا ىسكە اسىرىلدى. سونىڭ ناتيجەسىندە جاڭادان 520 جۇمىس ورنى اشىلدى.
وسى جىلى ىسكە قوسىلعان جوبالاردىڭ ىشىنەن «Standard Steel» جشس-نىڭ ءتۇستى مەتالل كونتسەنتراتىن الۋ ءۇشىن قالدىقتاردى قايتا وڭدەۋ قوندىرعىسىن اتاۋعا بولادى. «بۇل كوممەرتسيالىق ەمەس, الەۋمەتتىك جوبا» دەيدى «ستاندارت» يندۋستريالىق ايماعىن باسقارۋشى كومپانيانىڭ ديرەكتورى ازامات مەلدىبەكوۆ. ويتكەنى كاسىپورىن بۇرىنعى قورعاسىن زاۋىتىنان تاۋ بولىپ ءۇيىلىپ قالعان قالدىقتاردى وڭدەۋمەن اينالىسادى. قورعاسىن زاۋىتىنىڭ ايماعى 118 گەكتار جەردى قۇرايدى. قازىر مۇندا جەكەمەنشىك «ستاندارت» يندۋستريالىق ايماعى سالىنىپ جاتىر. 2 ملن توننا قورعاسىن قالدىقتارىن وڭدەۋ ءۇشىن فابريكا تۇرعىزىلدى. جىلىنا مۇندا 500 مىڭ تەكشە مەتر قالدىق وڭدەلەدى. بەس جىلدا قالدىقتار تۇگەل وڭدەلىپ بىتۋگە ءتيىس. سوندا مەگاپوليس قالانىڭ كوركىن بۇزىپ كەلگەن بۇرىنعى زاۋىت پەن ونىڭ اۋماعىنداعى زياندى زاتتاردان تولىق تازاراتىن بولادى. جوبانىڭ كوممەرتسيالىقتان گورى الەۋمەتتىك سالماعى باسىم دەۋدىڭ سىرى دا وسىندا. بۇگىنگى تاڭدا قالدىقتاردى وڭدەۋدەن الىنعان مىس كونتسەنتراتى وزبەكستانعا ەكسپورتتالىپ جاتىر. ءوز كەزەگىندە پرەزيدەنت قاسىم-جومارت توقاەۆتىڭ وڭدەۋ ونەركاسىبىنە كوڭىل ءبولۋ قاجەتتىگى تۋرالى تاپسىرماسىنا سايكەس كومپانيا وڭدەلگەن ءونىمدى شيكىزاتتاي شەتەلگە ساتپاي, وزىمىزدە قالدىرۋدى ءجون ساناپ وتىر. وسىعان سايكەس الداعى ۋاقىتتا قالدىقتاردان تازا مىرىش ءوندىرىپ, ونى وتاندىق «كازتسينك» كومپانياسى ساتۋ جوسپاردا بار. بۇل جوبانى ىسكە اسىرۋ ءۇشىن «Standard Steel» جشس ارنايى زاۋىت سالىپ جاتىر. ال وڭدەۋدەن كەيىنگى قالعان سوڭعى قالدىقتاردى كومپانيا قالاداعى تسەمەنت زاۋىتىنا وتكىزبەك نيەتتە. جالپى, جەكەمەنشىك «ستاندارت» يندۋستريالىق ايماعىندا كەلەشەكتە قوسىمشا وندىرىستىك عيماراتتار مەن قويمالار سالىنادى. ولار جەرگىلىكتى «ىسكەر قالا» باعدارلاماسى اياسىندا شاعىن جانە ورتا كاسىپكەرلىك سۋبەكتىلەرىنە جالعا بەرىلەتىن بولادى. اتالعان باعدارلاما بويىنشا جالداۋ قۇنىنىڭ ءبىر بولىگىن باستاپقى جىلدارى مەملەكەت كاسىپكەرگە وتەپ بەرىپ وتىرادى.
سونىمەن بىرگە بيىل «KAZALPACK» جشس-نىڭ اليۋميني بانكىلەرىن ءوندىرۋ جوباسى ىسكە قوسىلدى. اتالعان كاسىپورىن قالا ىرگەسىندەگى «وڭتۇستىك» يندۋستريالىق ايماعىندا ورنالاسقان. بۇل سۋسىندارعا ارنالعان اليۋميني بانكىلەرى مەن قاقپاقتاردى وندىرەتىن ورتالىق ازياداعى بالاماسى جوق كاسىپورىن سانالادى. جىلدىق قۋاتتىلىعى 500 ملن جيىنتىق. اليۋميني قۇتىلارى بۇگىنگى تاڭدا سۋسىندار وندىرىسىندە اسا سۇرانىسقا يە جانە ءوز كەزەگىندە باسقا ىدىستارعا قاراعاندا ەكولوگيالىق تازا بولىپ سانالادى. سونىمەن بىرگە «قاراپايىم زاتتار ەكونوميكاسى» مەملەكەتتىك باعدارلاماسى اياسىندا قارجىلاندىرىلعان مەگاپوليستەگى ەڭ ءىرى جوبالاردىڭ ءبىرى. زاۋىتتىڭ جالپى اۋماعى 20 مىڭ شارشى مەتردى قۇرايدى. سونداي-اق كاسىپورىن اقش-تىڭ زاماناۋي قوندىرعىسىمەن جابدىقتالعان. وسى جوبا اياسىندا جۇقا, قاقپاعى وڭاي اشىلاتىن شىرىنعا, ءتۇرلى ءالسىز, كۇشتى گازدالعان, الكوگولدى جانە الكوگولسىز سۋسىندارعا ارنالعان اليۋميني بانكىلەرى شىعارىلۋ ۇستىندە. كاسىپورىن ءونىمىنىڭ ناتيجەسىندە قازاقستاندا اليۋميني قۇتىلارىنا قاجەتتى سۇرانىستىڭ 80 پايىزى وتەلەدى. بۇل ءونىمنىڭ ەكولوگيالىق پايدالى جاعى دا بار. ويتكەنى الەمدە اليۋميني بانكىلەرى ەڭ كوپ وڭدەلەتىن ءارى تابيعي تازا ىدىس بولىپ سانالادى. مۇنىمەن قوسا اليۋميني بانكىلەرىنىڭ جارتىسىنان كوبى ەكىنشى قايتارا وڭدەلىپ جاتادى. سوندىقتان قايتا وڭدەپ, ءتۇرلى سالادا قولدانا بەرۋگە بولادى. جاڭا كاسىپورىن ءونىم شىعارىپ قانا قويمايدى, سونىمەن بىرگە بيۋدجەتتىڭ ءبۇيىرىن تومپايتۋعا ۇلەسىن قوسىپ كەلەدى. ويتكەنى زاۋىت مەگاپوليستەگى بيۋدجەتتىك سالىق تولەيتىن ەڭ ءىرى ءوندىرىس وشاقتارىنىڭ قاتارىندا تۇر. سونىمەن بىرگە كاسىپورىن ىرگەسىنىڭ قالانۋىمەن 145 ادام وزىنە تۇراقتى جۇمىس كوزىن تاپتى. ءوز كەزەگىندە ولاردىڭ بارلىعى دا ەل زاڭناماسىنا سايكەس كەپىلدەندىرىلگەن الەۋمەتتىك تولەمدەرمەن قامتاماسىز ەتىلگەن. زاۋىت قۇرىلىسىن جۇرگىزۋگە مەملەكەت تاراپىنان دا قوماقتى قولداۋ كورسەتىلدى. ماسەلەن, «بيزنەستىڭ جول كارتاسى-2020» باعدارلاماسى اياسىندا ينجەنەرلىك ينفراقۇرىلىمى تولىق جۇرگىزىلگەن جەر ۋچاسكەسى بەرىلدى. سونىمەن بىرگە «قاراپايىم زاتتار ەكونوميكاسى» باعدارلاماسى بويىنشا «دامۋ» كاسىپكەرلىكتى دامىتۋ قورى ارقىلى 6 پايىزدىق جەڭىلدىكپەن 19,2 ملرد تەڭگە نەسيە قاراستىرىلدى.
«Mega Smart B2B» جشس-نىڭ جيھاز فابريكاسىن دا بيىل ىسكە قوسىلعان تابىستى جوبالاردىڭ ءبىرى دەۋگە بولادى. اتالعان كاسىپورىننىڭ ورنالاسقان اۋماعى – «تاسساي» يندۋستريالىق ايماعى. جوبالىق قۋاتتىلىعى جىلىنا 120 مىڭ جيھاز وندىرۋگە قاۋقارلى. جالپى, جوبانى جۇزەگە اسىرۋعا 750 ملن تەڭگە جۇمسالدى. ەكى گەكتار اۋماقتى الىپ جاتقان ءوندىرىس وشاعىندا بۇگىنگى تاڭدا ءجۇز شاقتى ادام ەڭبەك ەتۋدە. كومپانيا تاريحى 2004 جىلدان باستالادى. 2016 جىلى العاشقى جيھاز وندىرەتىن Smart زاۋىتى سالىنادى. 2020 جىلى وسى زاۋىتتا 63 مىڭ دانا جيھاز وندىرىلەدى. 2021 جىلى مەكتەپ پەن كەڭسەلىك جيھازدىڭ سەريالىق وندىرىسكە ارنالعان ستاندارتتارى جاسالادى. فابريكا سونىمەن بىرگە مدف پانەلدەر شىعارادى. مۇندا مەكتەپ پارتالارى «پروپوليس» جۇيەسى بويىنشا, ال كەڭسەلىك جيھازدار Legro سەرياسىمەن وندىرىلەدى. كاسىپورىننىڭ كوممەرتسيالىق ديرەكتورى رازيا التاەۆانىڭ ايتۋىنشا, كومپانيا ەڭ ءبىرىنشى كەزەكتە ادامداردىڭ جايلىلىعىن ويلايدى. ويتكەنى ولار ءۇشىن ەڭ باستى بايلىق – ادام مەن ونىڭ قۇندىلىقتارى. وسى ورايدا كاسىپورىن بىلىكتى ماماندار دايارلاپ, ولاردىڭ ءوز ءىسىن جاقسى كورۋىنە كوپ كوڭىل بولەدى. Smart-تا ءوندىرىس قۋاتتىلىعى جۇيەلى جولعا قويىلعان. ءوندىرىس يننوۆاتسيالىق تەحنولوگيالارعا نەگىزدەلگەن. ماسەلەن, مۇندا يتاليا, گەرمانيانىڭ وتە دالدىكپەن جۇمىس ىستەيتىن زاماناۋي قوندىرعىلارى ورناتىلعان. روبوتتاندىرىلعان ستانوكتار ارقىلى بارلىق ولشەم ءدال كەسىلەدى. كومپانيا ساپاعا اسا ءمان بەرەدى. Smart جيھازدارىنىڭ برەندىن ىشكى نارىقتا عانا ەمەس, شەتەلدىك تۇتىنۋشىلار اراسىندا قالىپتاستىرۋدى قالايدى. ويتكەنى باسەكەلەستىك قىزىپ تۇرعان بيزنەس الەمىندە قايراڭداپ قالماۋدىڭ ءبىر جولى – ساپالى ءونىم شىعارۋ. سونداي-اق كاسىپورىندا سەرۆيستىك جۇيە جاقسى دامىعان. ءونىمدى جوبالاۋ, شىعىندارىن ەسەپتەۋ, بولاشاق جيھازدىڭ ديزاينىن جاساۋ, تۇتىنۋشىعا جەتكىزىپ بەرۋگە دەيىنگى جۇمىستار جان-جاقتى ويلاستىرىلعان. ءبىر ارتىقشىلىعى, Smart ءوز تاۋارىنا 3 جىلعا دەيىن كەپىلدىك بەرەدى. ماماندار توبىنىڭ كاسىبي شەبەرلىگىنىڭ, بيزنەس پەن ءوندىرىس پروتسەستەرىنىڭ دۇرىس جولعا قويىلۋىنىڭ ناتيجەسىندە كومپانيا ءوز ونىمىنە وتە ىڭعايلى باعالار ۇسىنادى جانە جەتكىزىپ بەرۋدە ۋاقىتتى كوپكە سوزبايدى.
ء«بىز ءوز ءىسىمىزدى وتە قاتتى جاقسى كورەمىز. سوندىقتان دا جۇمىستى بار ىنتامىزبەن ىستەيمىز. باستى ماقساتىمىز – تۇتىنۋشىلاردىڭ كوڭىلىنەن شىعۋ. قاي كەزدە دە ساپا بيىگىنەن تۇسپەۋگە ۇمتىلامىز. وسى كۇنگە دەيىن رەسپۋبليكانىڭ تۇكپىر-تۇكپىرىنە ونىمدەرىمىزدى جونەلتىپ ۇلگەردىك. وسى رەتتە قازاقستاندىق نارىقتا ءبىزدى تانيتىندار, ارىپتەستىك بايلانىس ورناتقىسى كەلەتىندەر سانى ارتىپ كەلەدى. وسىنىڭ ءوزى كومپانيا ءۇشىن ۇلكەن مارتەبە. ەندىگى جوسپارىمىز – ءوندىرىس اۋقىمىن كەڭەيتۋ. ءونىم تۇرلەرىن ارتتىرىپ, جاڭا جوبالار مەن ديزاينعا دەن قويۋ. بيزنەس سالاسىندا ۇنەمى دامىپ وتىرۋ ماڭىزدى. ويتكەنى الەم كۇن سايىن وزگەرىپ جاتىر. بۇرىنعى تالاپ قازىر وزەكتى بولماۋى مۇمكىن. سوندىقتان زامان كوشىنەن قالماۋعا تىرىسۋ قاجەت. اسىرەسە كاسىپكەرلىكتە بۇل وتە ماڭىزدى», دەيدى ر.التاەۆا.
جۋىردا قالا اكىمى مۇرات ايتەنوۆتىڭ قاتىسۋىمەن كەزەكتى ينۆەستيتسيالىق شتاب وتىرىسى ءوتتى. وندا شىمكەنتتە كەلەسى جىلدان باستاپ جىلىنا 80 مىڭ توننا تۇيىرشىكتەلگەن پوليپروپيلەن وندىرەتىن جاڭا زاۋىتتىڭ قۇرىلىسى باستالاتىنى ايتىلدى. ناتيجەسىندە 250 ازامات جۇمىسپەن قامتىلماق. جوبانىڭ جالپى قۇنى 38 ملرد تەڭگەگە تەڭ.
شاھار باسشىسى ءوز سوزىندە ءۇشىنشى مەگاپوليستىڭ يمپورتقا تاۋەلدىلىگىن ازايتىپ, ەكسپورتىن كوبەيتۋ تۋرالى باياندادى. وسى باعىتتا قالا ەكونوميكاسىنا ينۆەستيتسيا تارتۋ جالعاسا بەرەدى جانە سول ارقىلى جاڭادان اشىلعان جۇمىس ورىندارىنىڭ قاتارى دا كوپتەپ ارتادى.
جاۋاپتى باسقارما باسشىلارى, اۋدان اكىمدەرى مەن ينۆەستورلار قاتىسقان جيىندا جالپى 7 جاڭا جوبا تانىستىرىلدى. اتاپ ايتقاندا, تۇركيالىق «Stars Cosmetics» جشس باسشىسى ابدۋلحاكيم مۋحاممادمۋسا «وڭتۇستىك» يندۋستريالىق ايماعىنان سۇيىق سابىن ءوندىرىسىن اشپاق نيەتتە. 1,5 ملرد تەڭگەنى قۇرايتىن ينۆەستجوبانىڭ قۋاتتىلىعى جىلىنا 3 مىڭ توننانى قۇرايدى. بۇل 2023 جىلى جۇزەگە اسىرىلادى. سونىڭ ناتيجەسىندە 30 ادام وزىنە تۇراقتى جۇمىس تابادى. سونىمەن بىرگە «Milat Hali» دەپ اتالاتىن تاعى ءبىر تۇركيالىق كومپانيا باسشىسى يسكاندەر كاپلان «وڭتۇستىك» يندۋستريالىق ايماعىنان 2,5 گەكتار جەرگە كىلەم وندىرەتىن زاۋىت قۇرىلىسىن سالماق. جوبانىڭ جالپى قۇنى 4,5 ملرد تەڭگە بولادى. وسى جوبانىڭ اياسىندا جىلىنا 5 ملن شارشى مەتر كىلەم وندىرىلەدى. سونىمەن بىرگە اتالعان كىلەم فابريكاسى ارقىلى جۇمىسسىز جۇرگەن 100-گە جۋىق ازامات تۇراقتى جۇمىسپەن قامتىلادى. ءوز كەزەگىندە «ەلمەحمونتاج» جشس باسشىسى ەرجان قاناتبەكوۆ قۇرىلىسقا ارنالعان گازبلوكتار شىعاراتىن زاۋىتتىڭ جوباسىمەن تانىستىردى. جىلىنا 60 مىڭ تەكشە مەتر بلوك شىعاراتىن قۋاتتى ءوندىرىس وشاعى «جۇلدىز» يندۋستريالىق ايماعىندا ورنالاسادى. جوبانىڭ قۇنى 500 ملن تەڭگەنى قۇرايدى. نىسان قۇرىلىسى 2023 جىلى سالىنادى دەپ جوسپارلانۋدا. جوبا ءساتتى جۇزەگە اسىپ, زاۋىت جۇمىسىن باستاعان جاعدايدا 20 ازامات تۇراقتى ەڭبەكپەن قامتىلادى.
شتاب وتىرىسىندا بۇدان باسقا قۇرامالى كونتەينەر وندىرەتىن, تەرەزە جاقتاۋلارىن جاساپ شىعاراتىن جانە سانتەحنيكالىق جيھازدار مەن ساۋلەتتىك فورمالار وندىرەتىن ينۆەستيتسيالىق جوبالار پىسىقتالدى. جوعارىدا اتالعان 3 جوبا قولعا الىنسا, قالاعا قوسىمشا 1 ملرد 200 ملن تەڭگە ينۆەستيتسيا تارتىلىپ, جالپى سانى 75 جۇمىس ورنى اشىلادى. مۇرات دۇيسەنبەك ۇلى ZOOM بەينەكونفەرەنتسيا ارقىلى جوبالاردىڭ ارقايسىسىمەن جەكە-جەكە تانىسىپ, مەملەكەتتىك قولداۋ تۇرلەرى مەن قالانىڭ جوعارى مۇمكىندىكتەرى جايلى مالىمدەدى. سونىمەن بىرگە تالقىلاۋدان وتكەن جوبالاردىڭ بارلىعىن تەرەڭ زەردەلەۋ ءۇشىن جەتەكشى سالا باسشىلارىنا ءتيىستى تاپسىرمالار جۇكتەدى.
شىمكەنت
